Atir 20 - ÎVUKU RÎA ÛVORO MWARO

Aisiraeli nîmeevarîrie kûrûa

¹ Andû onthe a Isiraeli kuuma Dani mwena wa rûgûrû nginya Berisheba mwena wa îveti, vamwe na a kuuma vûrûrirî wa Gileadi mwena wa îrathîro, nîmaagomanire vamwe mbere ya Ngai-Mûnene marî gîkundi kîmwe kûu Mizipa.

² Atongoria a mîvîrîga yonthe ya Isiraeli maarî vau mûcemaniorî ûcio wa andû a Ngai, na kwarî na athigari ngiri magana mana (400,000) arîa maathiîcaga na magûrû.

³ Andû a mûvîrîga wa Benjamini nîmeguire atî Aisiraeli arîa engî onthe nîmaagomanîte kûu Mizipa. Aisiraeli nîmaaûririe Mûlawi ûrîa atîrî, “Twîre ûrîa mavîtia mama meekirwe.”

⁴ Nake Mûlawi ûrîa warî mûthuuri wa mûndûmûka ûcio nîwaugire atîrî, “Nie na mûka wakwa ûrîa naaigîte twathiîre Gibea vûrûrirî wa Benjamini kûraara kuo.

⁵ Arûme a Gibea nîmaaûkire kûntharîkîra na makîthiûrûrûkîria nyomba îrîa naamamîte. Meendaga kûmbûraga, nwatî vandû va ûguo maamenyanire na mûka wakwa wa kwiga kîîmwîrî na vinya na agîkua.

⁶ Nînoocire mwîrî wake, ngîûtinangia icunjî na ngîtûmana wa gîcunjî kîvirwe kûrî mîvîrîga yonthe îkûmi na îîrî ya Isiraeli nîûndû nîmeekîte ûndû mûcûku na wa ûûra nthoni gatagatîrî getû.

⁷ Mue muonthe mûrî ava mûrî Aisiraeli. Twîreni ûrîa twagîrîrwe nî gwîka.”

⁸ Nao andû onthe nîmaarûngamire vamwe na makiuga atîrî, “Gûtirî mûndû wanarî ûmwe wa cietû ûkûthiî îgemarî rîake, na gûtirî wanarî mûndû ûmwe ûkwînûka.

⁹ Nwatî nîtwîka atîrî, nîtwikia mîtî nîguo tûthuure arûme arîa makûthiî kûtharîkîra Gibea.

¹⁰ Tûcoke tûthuure arûme îkûmi a Isiraeli varî andû îgana rîmwe, varî andû ngiri îmwe tûthuure arûme îgana rîmwe, varî andû ngiri îkûmi tûthuure andû ngiri îmwe, nîguo makagîrîre andû arîa makûthiî kûverithia andû a Gibea irio nîûndû wa waganu ûcio mekîte kûu Isiraeli.”

¹¹ Kwoguo andû onthe a Isiraeli nîmaagomanire marî kîndû kîmwe nîguo matharîkîre îtûûra rîu.

¹² Andû a mîvîrîga ya Isiraeli nîmaatûmire anjaama mathiî vûrûrirî wonthe wa mûvîrîga wa Benjamini makaûrie atîrî, “Nîkwa mwîkîte waganu wa mûthemba ûrîkû?

¹³ Tûretereni andû acio aganu marî Gibea nîguo tûmaûrage, na tûthirie ûcûku ûcio gûkû Isiraeli.” Nwatî andû a Benjamini matiathikîrîria ûrîa andû acio engî a Isiraeli maaugaga.

¹⁴ Nao andû a Benjamini nîmaagomanire vamwe kûu Gibea maumîte matûûrarî mao na makîthiî kûrûa na Aisiraeli acio engî.

¹⁵ Mûthenya ûcio kwarî na andû ngiri mîrongo îîrî na ithathatû (26,000) a Benjamini arîa maaumire matûûrarî mao. Gatagatîrî ka acio, nîmaathuurîte arûme magana mûgwanja (700) arîa maarî aro mûno.

¹⁶ Gatagatî ka andû acio kwarî na andû magana mûgwanja (700), wa mûndû ûngîavotaga gwikia kathiga na gîkûtha gakaringa vandû varî na wariî ta wa rûcuîrî na ndangîvîtia.

¹⁷ Andû acio engî a mîvîrîga ya Isiraeli arîa maathomithîtue kûrûa maarî ngiri magana mana (400,000).

Aisiraeli nîmaarûire na Aabenjamini

¹⁸ Aisiraeli nîmaathiîre Betheli na makîûria Ngai atîrî, “Nî andû a mûvîrîga ûrîkû makûthiî kûtharîkîra Aabenjamini marî a mbere?” Nake Ngai-Mûnene nîwacokirie atîrî, “Nî andû a mûvîrîga wa Juda makwambîrîria.”

¹⁹ Kwoguo Aisiraeli nîmaambîrîrie rûgendo kîraûko kîu Kîamrûmîrîrîte, makîthiî na makîamba magema vakuvî na îtûûra rîa Gibea.

²⁰ Nîmaathiîre kûrûa na andû a Benjamini na makiga athigari ao merekanîrîte na a Benjamini kûu Gibea.

²¹ Andû a mûvîrîga wa Benjamini nîmaaumire îtûûrarî makarûe, na mbere ya mûthenya ûthire nîmaaûragîte Aisiraeli ngiri mîrongo îîrî na igîrî (22,000).

²² Nwatî Aisiraeli nîmeeyûmîrîrie na makîîvanga rîngî wa varîa meevangîte mbere nîguo makarûe.

²³ Nîmaathiîre vandû varîa vaagoocagîrwa na nîmaarîrîre Ngai-Mûnene nginya kîvwaî. Nîmaamûririe atîrî, “Nî waro tûthiîte kûrûa na andû etû a Benjamini?” Nake Ngai-Mûnene nîwacokirie atîrî, “Îî.” Kwoguo Aisiraeli nîmeeyûmîrîrie na makiga athigari ao varîa maamaigîte mbere.

²⁴ Kwoguo Aisiraeli nîmaakuvîvîrie andû a Benjamini riita rîa kaîrî.

²⁵ Nao andû a Benjamini nîmaaumire Gibea riita rîa kaîrî na makîûraga athigari a mbaara a Isiraeli ngiri îkûmi na inyanya (18,000).

²⁶ Andû onthe a Isiraeli nîmaacokire makîthiî Betheli na magîcakaîra kuo. Nîmeekarire mbere ya Ngai-Mûnene kuo na makîînyerekia nginya kîvwaî na nîmaarutîre Ngai-Mûnene magongoona ma kûvîvua na ma thayû.

²⁷ Vîndî îo, îthandûkû rîa kîrîkanîro Kîam Ngai-Mûnene rîarî Betheli.

²⁸ Nake Finehasi, mûvîcî wa Eliazaru nîke warîmenyagîrîra. Eleazaru aarî mûvîcî wa Aroni. Andû a Isiraeli nîmaaûririe Ngai-Mûnene atîrî, “Nî waro tûthiîte kûrûa na andû etû a Benjamini rîngî, kana twîkare?” Nake Ngai-Mûnene nîwamacokerie atîrî, “Thiîni mûkarûe nao. Rûyû nîngaamûvotithia kûmavoota.”

²⁹ Kwoguo Isiraeli nîmaaigire athigari amwe ao mathiûrûrûkîrîtie îtûûra rîa Gibea methithîte.

³⁰ Andû a Isiraeli nîmaakuvîvîrie andû a Benjamini mûthenya wa kathatû nîguo marûe nao. Nîmaaigire athigari ao a mbaara mang'ethanîrîte na îtûûra rîa Gibea wata ûrîa meekîte mbere.

³¹ Andû a Benjamini nîmaaumire îtûûrarî na makîthiî kûrûa na Aisiraeli. Nîmaambîrîrie kûûragîra Aisiraeli amwe njîrarî îrîa îthiîte Betheli na îrîa îthiîte Gibea wata ûrîa meekîte mbere. Nîmaaûragire Aisiraeli ta mîrongo îthatû (30).

³² Aabenjamini nîmaacokire makiuga atîrî, “Twamaûraga wata ûrîa twekire mbere.” Nwatî andû a Isiraeli nîmaavangîte kûmengata kuuma îtûûrarî mathiî na kûu njîrarî.

³³ Rîrîa Aisiraeli maaûnganire vamwe kûu Baali-tamaru, arûme a Isiraeli arîa meethithîte mathiûrûrûkîrîtie îtûûra rîa Gibea nîmaaumîre wa rîmwe kuuma kûrîa meethithîte mwena wa îthûîro wa Gibea.

³⁴ Athigari njamba ngiri îkûmi (10,000) arîa maathuurîtwe kuuma Isiraeli kuonthe nîmaatharîkîre Gibea na mbaara îkîneneva. Andû a Benjamini matiamenyete atî maarî vakuvî kûthirua.

³⁵ Ngai-Mûnene nîwavotithirie Aisiraeli kûvoota andû a Benjamini na Aisiraeli makîûraga athigari ngiri mîrongo îîrî na ithano na îgana rîmwe (25,100) a Benjamini mûthenya ûcio.

³⁶ Vîndî îo andû a Benjamini nîmaamenyire atî maarî avoote. Andû a Isiraeli maacokire na vuva takwa makûûra nî andû a Benjamini nîûndû nîmeevokete arûme a Isiraeli arîa meethithîte mathiûrûrûkîrîtie Gibea.

Ûrîa Aisiraeli maavootanire

³⁷ Arûme acio nîmaavinyûrire Gibea wa rîmwe makînyagania îtûûrarî rîu na makîûraga andû onthe arîa maarî kuo.

³⁸ Kîmenyithia kîrîa andû a Isiraeli maarîkanîrîte na andû ao arîa meethithîte nî atî, rîrîa makona ndogo nyîngî yunûkîtie îkiumaga îtûûrarî,

³⁹ makaatharîkîra îtûûra rîu. Vîndî îo, Aabenjamini maarî aûragu Aisiraeli ta mîrongo îthatû. Meeîraga na ngoro atîrî, “Nama twamaûraga wata ûrîa twamaûragire mbere.”

⁴⁰ Rîrîa kîmenyithia Kîam ndogo yunûkîtie kuuma îtûûrarî Kîammbîrîrie kwoneka, Aabenjamini nîmaaroririe vuva wao na makîmaka mona îtûûra rîonthe rîkîrîrîmbûka mwaki.

⁴¹ Andû a Isiraeli nîmaagarûrûkire, nao andû a Benjamini makîmaka nîûndû nîmaamenyire atî maarî vakuvî kûthirua.

⁴² Nîmaaûrire nî Aisiraeli na makîthiî merekerete werûrî, nwatî Aisiraeli nîmaamavinyûririe na makîmakinyîrîra. Nao nîmeethîrîrie marî gatagatî ka athigari ikundi igîrî na andû a Isiraeli arîa maaumire îtûûrarî nîmaaûragîwe vau gatagatî.

⁴³ Aisiraeli nîmaathiûrûrûkîrie Aabenjamini na makîmarûmîrîria kuuma Noha makîmaûragaga nginya magîkinya Gibea mwena wa îrathîro.

⁴⁴ Athigari ngiri îkûmi na inyanya a Benjamini arîa maarî njamba nîmaaûragirwe mûthenya ûcio.

⁴⁵ Acio engî nîmaacokire na makîvinyûra merekerete werûrî na magîkinya îthigarî rîa Rimoni. Andû ngiri ithano ao nîmaaûragîrwe njîrarî îrîa nene maûrîte. Aisiraeli nîmaathiîre na mbere kûvinyûria acio engî nginya Gidomu na makîûraga andû ngiri igîrî (2,000).

⁴⁶ Mûthenya ûcio Aabenjamini onthe arîa maaûragirwe arîa maarî njamba maarî athigari ngiri mîrongo îîrî na ithano (25,000).

⁴⁷ Nwatî andû magana matandatû (600) nîmaatorokire na makîthiî werûrî nginya îthigarî rîa Rimoni na magîkara kuo îvinda rîa mîeri îna.

⁴⁸ Andû a Isiraeli nîmaacokire kûrî Aabenjamini acio engî na makîmaûraga onthe. Maaûragire arûme, aka na ciana wana ndîthia cionthe. Nîmaavîvirie matûûra monthe marîa maarî kûu.