Atir 2 - ÎVUKU RÎA ÛVORO MWARO

Mûraika wa Ngai-Mûnene arî Bokimu

¹ Mûraika wa Ngai-Mûnene nîwathiîre Bokimu aumîte Giligali na akîra Aisiraeli atîrî, “Naamûrutire Misiri na ngîmûrete vûrûrirî ûrîa nerîîre methe menyu ma tene na mwîvîtwa atî nîngaamava. Naugire ndikauna kîrîkanîro gîetû namue.

² Namue mûtikathondeke kîrîkanîro wanarî kîmwe na andû arîa matûûraga vûrûrirî ûyû. Nwanginya mwomomore metha ciao cia magongoona. Nwatî mûtiavingia ûrîa naamwîrire. Mwekire ûguo nîkî?

³ Kwoguo rîu nîramwîra atî, ndikengata andû aya kuuma kûrî mue. Makethagîrwa marî nthû cienyu na mûkaveenagîrîrua nî ngai ciao cia mîvuanano.”

⁴ Rîrîa mûraika wa Ngai-Mûnene aarîkirie kûvecana ûvoro ûcio, andû onthe a Isiraeli nîmaambîrîrie kûrîra maugîrîrîtie.

⁵ Kîu nîkîo gîatûmire mete vandû vau Bokimu, na makîrutîra Ngai-Mûnene magongoona vo.

Gûkua kwa Joshua

⁶ Rîrîa Joshua aarîkirie kwîra andû a Isiraeli mathiî, wa mûndû nîwathiîre vûrûrirî wake ûrîa aagaîrîtwe.

⁷ Nao andû nîmaatungatîre Ngai-Mûnene vîndî cionthe ûtûûrorî wa Joshua. Vuva wa gûkua kwa Joshua, Aisiraeli nîmaathiîre na mbere gûtungatîra Ngai-Mûnene vîndî cionthe rîrîa athuuri maatûûraga mwoyo arîa meeyonerete o ene maûndû manene marîa Ngai-Mûnene ekîrîte andû a Isiraeli.

⁸ Nayo ndungata ya Ngai-Mûnene, Joshua mûvîcî wa Nuni aakwire arî na ûkûrû wa mîaka îgana rîmwe na îkûmi.

⁹ Nîwathikirwe mûgûndarî wake kûu Timunathiheresi vûrûri ûrîa ûrî irîma wa Efiraimu mwena wa rûgûrû wa kîrîma Kîam Gaashu.

¹⁰ Vuva wa ûguo, andû onthe a rûciaro rûu nîmaakuire. Nao andû a rûciaro rûu rwarûmîrîre nîmaariganîrwe nî Ngai-Mûnene na maûndû marîa Ngai-Mûnene eekîrîte andû a Isiraeli.

Aisiraeli nîmaatigire kûgooca Ngai-Mûnene

¹¹ Andû a Isiraeli nîmeekire maûndû macûku mbere ya Ngai-Mûnene na njîra ya gûtungatîra Baali.

¹² Nîmaatigire kûgooca Ngai-Mûnene ûrîa arî ke Ngai wa methe mao ma tene, ûrîa wamarutire vûrûrirî wa Misiri na makîambîrîria kûgooca ngai cia mîvuanano cia andû arîa maamathiûrûrûkîrîtie. Nîmaagoocire ngai icio na makîrakaria Ngai-Mûnene.

¹³ Maatigire kûgooca Ngai-Mûnene na makîambîrîria gûtungatîra ngai cia mîvuanano cia Baali na Ashitarothu.

¹⁴ Kwoguo Ngai-Mûnene nîwarakarire nîûndû wa Aisiraeli na akîmarekereria kûrî nthû, nacio nîciaîire indo ciao. Nîwarekererie nthû cionthe irîa ciamathiûrûrûkîrîtie imavoote, na Aisiraeli matingîavotire kwîgitîra.

¹⁵ Vîndî cionthe mathiî mbaararî, Ngai-Mûnene nîwareganaga nao wata ûrîa aamerîte atî nîakameeka. Nao nîmaathînîkire mûno.

¹⁶ Ngai-Mûnene nîwacokire akîva Aisiraeli atongoria arîa maamavonokirie kuuma kûrî andû arîa maatavaga indo ciao.

¹⁷ Nwatî Aisiraeli matiathîkîra atongoria acio. Nîmaaregire gûtuîka evokeku kûrî Ngai-Mûnene na makîgooca ngai ciîngî. Methe mao nîmaavingagia maathani ma Ngai-Mûnene, nwatî o nîmaatigire kûmûgooca.

¹⁸ Vîndî îrîa Ngai-Mûnene ava Aisiraeli mûtongoria, Ngai-Mûnene nîwatethagia mûtongoria ûcio na nîwavonokagia Aisiraeli kuuma kûrî nthû ciao vîndî cionthe rîrîa mûtongoria ûcio ethagîrwa arî mwoyo. Ngai-Mûnene nîwegucagîra Aisiraeli ntha, nîûndû wa mathîna ma andû arîa maamavinyagîrîria.

¹⁹ Nwatî rîrîa mûtongoria akua, andû nîmaacokaga gwîka maûndû macûku wana gûkîra marîa methe ma tene meekaga. Nîmaatungatagîra ngai cia mîvuanano na makenamagîrîria mothiû mao mbere yacio makîigoocaga. Nîmaathiîcaga na mbere gwîka maûndû macûku na matiatiganîria mîtugo yao mîcûku.

²⁰ Kwoguo Ngai-Mûnene nîwarakarirue nî Aisiraeli na akiuga atîrî, “Nîûndû andû a rûciaro rûrû nîmaregete kûvingia kîrîkanîro kîrîa naathondekire na methe mao ma tene na nîmareganîte nanie

²¹ ndigûcoka kwîngata rûrîrî wanarî rûmwe rwa ndûrîrî irîa ciatigirwe nî Joshua rîrîa aakwire.

²² Ngaavûthîra ndûrîrî icio kûgeria Aisiraeli nîguo menye kana makambathîkagîra ta ûrîa methe mao ma tene meekaga.”

²³ Kwoguo Ngai-Mûnene nîwetîkîrie ndûrîrî icio ciîkare vûrûrirî ûcio. Ndaarekereria mavootwa nî Joshua na vuva wa Joshua gûkua ndaamengata wa rîmwe.