Atir 19 - ÎVUKU RÎA ÛVORO MWARO

Mûlawi na mûndûmûka wake wa kwiga

¹ Vîndî îo mbere ya kûgîa na mûthamaki kûu Isiraeli, kwarî na Mûlawi ûmwe watûûraga kûndû kûraca vûrûri ûrîa ûrî irîma wa Efiraimu. Mûlawi ûcio nîwocire mûndûmûka kuuma Bethilehemu ya Juda nîguo atuîke mûka wa kwiga.

² Mûka ûcio wa kwigwa nîwarakarirue nî Mûlawi ûcio na agîcoka kwao mûciî Bethilehemu na agîkara kuo îvinda rîa mîeri îna (4).

³ Mûlawi nîwacokire akîrûmîrîria mûka ûcio na akîgeria kûmûthaitha nîguo amûcokerere. Aathiîre marî na ndungata yake na mvunda igîrî. Rîrîa aakinyaga mûciî kwa îthe wa mûka ûcio, îthe wa mûka nîwamûgwatire ûgeni arî na gîkeno.

⁴ Îthe wa mûndûmûka nîwaringîrîrie Mûlawi ndakathiî. Kwoguo nîwekarire kuo îvinda rîa mîthenya îthatû. Nao nîmaarîre, makînyua na makîrara kuo.

⁵ Kîraûko Kîam mûthenya wa kana, nîmaaramûkire tene na makîîvarîria kûthiî. Nwatî îthe wa mûndûmûka ûcio nîwerire Mûlawi atîrî, “Amba ûrîe irio nîguo ûgîe vinya. Nwa ûthiî vuvarî.”

⁶ Kwoguo arûme acio oîrî nîmeekarire nthî, makîrîcanîra na makînyunyanîra vamwe. Îthe wa mûndûmûka ûcio nîwerire Mûlawi atîrî, “Nakûthaitha wîtîkîre kûraara gûkû ûmûnthî na wîthîrwe ûrî mûkenu.”

⁷ Rîrîa Mûlawi aaûkîrire akîenda kûthiî, îthe wa mûndûmûka nîwamûririe etîkîre gwîkarakara. Kwoguo nîwararire kuo rîngî.

⁸ Mûthenya wa gatano Mûlawi nîwaramûkire kîraûko tene nîguo athiî. Nwatî îthe wa mûndûmûka nîwamwîrire atîrî, “Amba ûrîe irio na weterere ûkaathiî kîvwaî.” Kwoguo nîmaarîre irio marî vamwe.

⁹ Rîrîa Mûlawi, mûndûmûka ûrîa aaigîte na ndungata yake maaûkîrire nîguo mathiî, îthe wa mûndûmûka ûcio nîwaugire atîrî, “Taroriani, rîu kîvwaî kîrî vakuvî gûkinya na nduma îthiîte kûruma. Rarani gûkû rîngî na mûkene na rûyû nîmûkaaramûka kîraûko mwînûke.”

¹⁰ Nwatî Mûlawi ndeendaga kûraara kuo rîngî. Kwoguo nîwocire mûka ûrîa aaigîte, ndungata yake na mvunda ciake cioîrî ikuîte mîrigo na makîambîrîria rûgendo.

¹¹ Nîmaakinyire vakuvî na Jebusi (Jerusalemu) kûthiîte gûtuka. Kwoguo ndungata nîyerire mwathi wayo atîrî, “Ûka tûtonye îtûûrarî rîrî rîa Ajebusi tûrarîrîre kuo.”

¹² Nwatî mwathi wayo nîwamîrire atîrî, “Tûtikûrara îtûûrarî rîrî na andû ageni arîa matarî Aisiraeli. Tûvîtûke tûthiî Gibea.

¹³ Nîwacokire akîra ndungata ciake atîrî ‘Ûkani tûthiî tûkarare Gibea kana Rama.’ ”

¹⁴ Kwoguo nîmaavîtûkire na makîthiî mbere na rûgendo. Riûa rîkîthûa, nîmaakinyire îtûûrarî rîa Gibea îrîa îrî mûvîrîgarî wa Benjamini.

¹⁵ Nîmaarûngamire na magîtonya îtûûrarî rîa Gibea nîguo mararîrîre kuo. Nîmeekarire nthî kîvarorî gîa îtûûra rîu, nwatî gûtirî mûndû wamagwatire ûgeni gwake mûciî.

¹⁶ Kîvwaî gîakinya, mûthuuri ûmwe nîwavîtûkîrîre vo aumîte wîrarî wake wa mûgûnda. Mûthuuri ûcio aarî wa kuuma vûrûrirî ûrîa ûrî irîma wa Efiraimu, nwatî aatûûraga kûu Gibea. Andû acio engî a îtûûra rîu maarî a mûvîrîga wa Benjamini.

¹⁷ Mûthuuri ûcio nîwaroririe na akîona mûndû ekarîte nthî kîvarorî gîa îtûûra na akîmûria atîrî, “Umîte kû na ûthiîte kû?”

¹⁸ Nake Mûlawi nîwamûcokerie atîrî, “Tumîte Bethilehemu kûu Juda na tûthiîte mûciî ûrîa ûrî kûraca vûrûrirî ûrîa ûrî irîma wa Efiraimu na gûtirî mûndû ûtûgwatîte ûgeni tûkararîrîre gwake mûciî.

¹⁹ Tûrî na nyaki na irio cia mvunda cietû, mîgate na ndivei yakwa na ya mûndûmûka ûrîa mbigîte wa vamwe na ya ndungata yakwa. Tûrî na indo cionthe irîa tûvatarîte.”

²⁰ Mûthuuri ûcio nîwaugire atîrî, “Tûthiîni gwakwa mûciî! Nîngûmûtethia na indo cionthe irîa mûngîenda. Mûtikarare ava kîvarorî.”

²¹ Kwoguo mûthuuri ûcio nîwathiîre nao gwake mûciî na akîva mvunda ciao irio. Ageni acio nîmeethambirie magûrû, makîrîa irio na makînyua.

²² Vîndî wa îo maakenaga, wa rîmwe gîkundi Kîam andû marî na mîtugo mîcûku maumîte îtûûrarî nîmaathiûrûrûkîrie nyomba îo na makîambîrîria kûrumia mûrango makîraga mûthuuri ûcio atîrî, “Ruta mûndû ûcio mûkire nake na gûkû nja! Tûrenda kûmenyana nake kîîmwîrî na vinya!”

²³ Nake mûthuuri mwene mûciî nîwaumire nja na akîmeera atîrî, “Naarî! Arata akwa! Namûthaitha mûtigeke ûndû mûcûku ta ûcio! Mûndû ûcio nî mûgeni wakwa.

²⁴ Taroriani! Mûndûmûka ûrîa aigîte arî gûkû na nîrî na mwîrîtu nthingi. Nîngûmûnengera o mwîke nao ûrîa mûkwona kwagîrîrîte. Nwatî mûtigeke mûndû ûcio ûndû ta ûcio mûcûku ûguo!”

²⁵ Nwatî andû acio nîmaaregire ûguo meeragwa. Kwoguo Mûlawi ûcio nîwarutire mûka wa kwigwa nja na akîmûnenganîra kûrî o. Nîmaamenyanire nake kîîmwîrî na vinya na makîmûvûthîra naaî ûtukû mûgima na makîmûrekereria athiî macangîa.

²⁶ Kûthiîte gûkîa mûndûmûka ûcio nîwathiîre na agîkinya mûrangorî wa mwene nyomba ya kûrîa mûthuuriwe aarî. Nîwagwîre nthî na agîkara vo nginya gûgîkîa.

²⁷ Rîrîa mûthuuriwe aaramûkire kîraûko, nîwavingûrire mûrango nîguo athiî, nîwonire mûndûmûka ûcio aaigîte agwîte vau mûrangorî wa nyomba nacio njara ciake inyitîte mûrango.

²⁸ Mûlawi nîwamwîrire atîrî, “Ûkîra tûthiî.” Nwatî ndaamûcokeria. Nîwacokire akîmûoca, akîmwigîrîra îgûrû rîa mvunda na makîambîrîria rûgendo menûkîte.

²⁹ Rîrîa aakinyire mûciî, nîwatonyire nyomba na agîoca kaviû. Nîwacokire agîoca mwîrî wa mûka wa kwigwa, agîûtinangia tûcunjî îkûmi na twîrî na agîtûmana wa gacunjî gakîthiî kûrî mûvîrîga ûmwe wa mîvîrîga îkûmi na îîrî ya Isiraeli.

³⁰ Andû onthe arîa moonire ûndû ûcio maaugaga atîrî, “Tûtianegua kana tûona ûndû ta ûyû wîkîtwe kuuma rîrîa Aisiraeli maaumire Misiri! Nwanginya twîcirieni ûvoro waguo na tûmenye ûrîa tûgwîka.”