Atir 18 - ÎVUKU RÎA ÛVORO MWARO

Mika na andû a mûvîrîga wa Dani

¹ Îvindarî rîu, Isiraeli gûtiarî na mûthamaki. Nao andû a mûvîrîga wa Dani nîmaacaragia vûrûri ûrîa mangîîgwatîra rîrî îgai rîao na magatûûra kuo. Meekaga ûguo nîûndû matiarî na vûrûri wao o ene gatagatîrî ka mîvîrîga ya Isiraeli.

² Kwoguo andû a Dani nîmaathuurire arûme atano arîa maarî njamba kuuma kûrî nyomba cionthe cia mûvîrîga wao kuuma matûûrarî ma Zora na Eshitaoli na makîmatûma magatuîrie vûrûri ûcio. Rîrîa maakinyire vûrûrirî ûrîa ûrî irîma wa Efiraimu, nîmaararire kwa Mika mûciî.

³ Marî wa kûu, nîmeguire mwarîrie wa mwanake ûcio warî Mûlawi na makîmûmenya. Kwoguo nîmaathiîre kûrî ke na makîmûûria atîrî, “Nû wakûretire gûkû? Ûreka atîa gûkû?”

⁴ Nake nîwamacokerie atîrî, “Twarîkanîre na Mika andîvage, nanie nîmûtungatagîre nîrî mûthînjîri-Ngai wake.”

⁵ Nao nîmaamwîrire atîrî, “Twakûthaitha, tûrîrie kûrî Ngai kana rûgendo rûrû tûthiîte nî rûkûrathimwa.”

⁶ Nake mûthînjîri-Ngai nîwamacokerie atîrî, “Thiîni na thayû Ngai-Mûnene nîakûmûmenyerera rûgendorî rwenyu.”

⁷ Kwoguo arûme acio atano nî maambîrîrie rûgendo na magîkinya îtûûrarî rîa Laishi. Nîmoonire atî andû a Laishi maatûûraga ta ûrîa andû a Sidoni maatûûraga matarî na thîna, marî na thayû, matagûtetania wanarî na mûndû. Maarî na indo cionthe. Maatûûraga kûraca na andû a Sidoni na matiarî na ûndû mangîagwatanîre na arîa engî.

⁸ Rîrîa arûme acio atano maacokire kûu Zora na Eshitaoli, andû a vûrûri wao nîmaamaûririe ûrîa moonete.

⁹ Nao nîmaamerire atîrî, “Ûkîrani tûthiî tûkatharîkîre îtûûra rîa Laishi. Nîtwonire vûrûri ûcio na nî mwaro mûno. Tigani gwîkara gûkû mûtagwîka ûndû. Thiîni na îvenya na mwîgwatîre vûrûri ûcio!

¹⁰ Mwakinya kuo nîmûkwîthîra andû mekarîte matarî na thîna na gûtarî na ûndû maretigîra. Nî vûrûri mûnene, ûrî na indo cionthe na Ngai nîamûvete guo.”

¹¹ Kwoguo arûme magana matandatû (600) a mûvîrîga wa Dani nîmaaumire Zora na Eshitaoli marî na indo cia mbaara mevarîrîtie kûrûa.

¹² Nîmaathiîre na makîamba magema mao mwena wa îthûîro wa Kiriathu Jearimu kûu Juda. Kîu nîkîo gîtûmaga kûndû kûu gwîtwa Mahanedani nginya ûmûnthî.

¹³ Nîmaaumire kûu na makîthiî vûrûrirî ûrîa ûrî irîma wa Efiraimu na magîkinya kwa Mika mûciî.

¹⁴ Arûme acio atano arîa maathiîte kûthigana vûrûri wa Laishi nîmeerire andû ao atîrî, “Nî mwîcî atî nyombarî îmwe ya ino kûrî na ngai ya mûvuanano îvakîtwe sîlûva kuonthe? Kûrî wana mîvuanano îngî na efodi. Rîu îîcirieni ûrîa mûgwîka.”

¹⁵ Kwoguo nîmaatonyire nyomba kwa Mika kûrîa mwanake ûcio Mûlawi aatûûraga na makîmûûria ûvoro wake.

¹⁶ Vîndî îo athigari magana matandatû (600) kuuma Dani maarî na indo cia mbaara, maarûngamîte kîvingorî.

¹⁷ Athigani acio atano nîmaathiîre magîtonya nyomba na magîoca mûvuanano ûrîa wavakîtwe sîlûva, mîvuanano îo îngî vamwe na efodi. Nake mûthînjîri-Ngai na athigari arîa magana matandatû (600) marî na indo cia mbaara maarî kîvingorî.

¹⁸ Rîrîa arûme acio atano maatonyire kwa Mika mûciî na magîoca indo icio cionthe, mûthînjîri-Ngai nîwamaûririe atîrî, “Nîkwa mûreka atîa?”

¹⁹ Nao nîmaamwîrire atîrî, “Kira kivi na ndûkagambe. Ûka tûthiî nawe nîguo ûgatuîke mûthînjîri-Ngai wetû na mûtûtaari vandû va gûtuîka mûthînjîri-Ngai wa mûciî wa mûndû ûmwe tu.”

²⁰ Ûvoro ûcio nîwakenirie mûthînjîri-Ngai mûno. Nîwacokire agîoca indo icio ntheru na makîthiî na arûme acio.

²¹ Kwoguo nîmaagarûrûkire na makîambîrîria rûgendo. Ciana ciao, ndîthia na indo irîa maarî nacio nîcio ciathiîre itongoretie.

²² Rîrîa meethîrirwe mathiîte vandû varaca kuuma kwa Mika mûciî, Mika nîwetire arûme a mîciî îrîa yatûûranîrîte na mûciî wake na makîûngana vamwe na makîrûmîrîria andû acio a mûvîrîga wa Dani.

²³ Rîrîa maamakinyîre nîmaaugîrîrie andû acio a Dani, nao andû a Dani nîmeevûgûrire na makîûria Mika atîrî, “Nî atîa ûrenda, ûgîûka na andû acio onthe?”

²⁴ Nake Mika nîwacokirie atîrî, “Mûrauga atîa rîrîa mûrambûria, nîrenda atîa? Mwakuua ngai îrîa naathondekire na mwathiî na mûthînjîri-Ngai wakwa! Natigwa na ndûî?”

²⁵ Nao andû a mûvîrîga wa Dani nîmaamwîrire atîrî, “Ndûkagwete ûndû wîngî nîûndû weka ûguo nîûkûrakaria andû aya na makûtharîkîre na maûrage andû onthe a mûciî waku.”

²⁶ Andû acio a Dani nîmaacokire makîthiî mbere na rûgendo rwao. Rîrîa Mika oonire atî andû acio maarî na vinya kûmûkîra, nîwagarûrûkire na agîcoka mûciî.

²⁷ Andû a mûvîrîga wa Dani nîmaathiîre na mûthînjîri-Ngai vamwe na indo irîa Mika aathondekete na makîtharîkîra îtûûra rîa Laishi kûrîa andû a kuo maarî avoreri na maarî na thayû. Andû a Dani nîmaaûragire andû a îtûûra rîa Laishi na makîrîvîvia.

²⁸ Gûtirî mûndû ûngîamavonokirie nîûndû îtûûra rîa Laishi rîarî kûraca na Sidoni na matiagwatanagîra na andû engî. Îtûûra rîa Laishi rîarî vakuvî na Kîamnda Kîam Bethirehobu. Andû a Dani nîmaatumire îtûûra rîa Laishi rîngî na magîtûûra kuo.

²⁹ Nîmaagarûrire rîîtwa rîa îtûûra rîu rîa Laishi na makîrîîta Dani. Maarîtanirie na îthe wao wa tene Dani ûrîa warî mûvîcî wa Jakovu.

³⁰ Andû a Dani nîmaarûthire mûvuanano wa kûgoocagwa. Jonathani mûvîcî wa Gerishomu, Gerishomu mûvîcî wa Musa na ndungata ciake nîo maatungataga marî athînjîri-Ngai kûu mûvîrîgarî wa Dani nginya rîrîa vûrûri ûcio watavirwe.

³¹ Mûvuanano ûrîa Mika aathondekete wekarire kuo mîthenya yonthe îrîa îgema rîrîa Ngai aagoocagîrwa rîekarire Shilo.