Atir 17 - ÎVUKU RÎA ÛVORO MWARO

Mîvuanano ya Mika

¹ Vîndî îmwe kwarî na mûndû watûûraga vûrûrirî ûrîa ûrî irîma wa Efiraimu. Mûndû ûcio eetagwa Mika.

² Mika nîwerire ng'ina atîrî, “Tûcunjî ngiri îmwe na îgana twa sîlûva twaku tûrîa twaîirwe na ûkîruma mwîi wa tuo, taroria, nînie nîrî na tuo. Nînie naatwocire.” Nake ng'ina nîwaugire atîrî, “Ngai-Mûnene arokûrathima mûvîcîwa!”

³ Mika nîwacokerie ng'ina tûcunjî tûu ngiri îmwe na îgana twa sîlûva, nake ng'ina akîmwîra atîrî, “Nînyamûrîra Ngai-Mûnene sîlûva îno nîguo kîrumi gîtigakûgwate mûvîcîwa. Ikaavûthîrwa na kûthondeka mûvuanano wa kumua ûvakîtwe sîlûva kuonthe. Kwoguo rîu nîngûgûcokeria cio.”

⁴ Rîrîa Mika aacokerie ng'ina sîlûva icio, ng'ina nîwocire tûcunjî magana maîrî kuuma kûrî cio na akîvirîra mûturi wa indo cia cuuma. Mûturi ûcio nîwathondekire mûvuanano na akîûvaka sîlûva kuonthe. Mûvuanano ûcio nîwacokire ûkigwa kwa Mika mûciî.

⁵ Mika aarî na vandû vake varîa aagoocagîra. Nîwathondekire mîvuanano na efodi na akîthuura mûvîcî ûmwe agîtuîka mûthînjîri-Ngai wake.

⁶ Vîndî îo, kûu Isiraeli gûtiarî na mûthamaki. Kwoguo wa mûndû eekaga wa ûrîa oonaga kwagîrîrîte.

⁷ Vîndî îo kwarî na mwanake Mûlawi warî wa kuuma Bethilehemu ya Juda.

⁸ Mwanake ûcio nîwaumire îtûûrarî rîa Bethilehemu na akîthiî gûcaria vandû vengî va gûtûûra. Wa athiîte, nîwakinyire kwa Mika mûciî vûrûrirî ûrîa ûrî irîma wa Efiraimu.

⁹ Mika nîwamûririe atîrî, “Umîte kû?” Nake nîwamûcokerie atîrî, “Nie nîrî Mûlawi na nyumîte îtûûrarî rîa Bethilehemu kûu Juda na nîracaria vandû nîngîtûûra.”

¹⁰ Mika nîwamwîrire atîrî, “Îkarania nanie ûtuîke mûthînjîri-Ngai wakwa na ûndaarage. Ngaakûvecaga tûcunjî îkûmi twa sîlûva wa mwaka, nguo cia gwîkîra na irio.”

¹¹ Mûlawi ûcio nîwetîkîrire gwîkarania na Mika na nîwatuîkire ta ûmwe wa avîcî a Mika.

¹² Mika nîwamûtuire mûthînjîri-Ngai wake na agîtûûra mûciî kwa Mika.

¹³ Mika nîwacokire akîîra na ngoro atîrî, “Rîu nîmbicî atî Ngai-Mûnene nîakûmbîka maûndû maro, nîûndû nîrî na Mûlawi arî mûthînjîri-Ngai wakwa.”