Atir 14 - ÎVUKU RÎA ÛVORO MWARO

Samusoni na mûndûmûka wa kuuma Timuna

¹ Mûthenya ûmwe Samusoni nîwanyûrûrûkire akîthiî Timuna. Arî wa kûu, nîwonire mûndûmûka ûmwe Mûfilisiti.

² Samusoni nîwacokire mûciî na akîra îthe na ng'ina atîrî, “Nîmonire mûndûmûka Mûfilisiti kûu Timuna. Kwoguo ngîrîrani ke nîmûvikie.”

³ Nwatî îthe na ng'ina nîmaamûririe atîrî, “Ûrenda kûvikia mûndûmûka kuuma kûrî Afilisiti arîa matarî aruu nîkî? Nîkwa ûtangîthuura mûndûmûka kuuma kûrî andû a mbarî yetû, kana gatagatîrî ka andû etû onthe?” Nwatî Samusoni nîwerire îthe na ng'ina atîrî, “Nîrenda mûngîrîre ûcio nîûndû nîke mendete mûno.”

⁴ Aciari a Samusoni matiamenyaga atî nî Ngai-Mûnene wendaga Samusoni eke ûguo. Ngai-Mûnene aacaragia kanya ga kûvûûra Afilisiti. Vîndî îo Afilisiti nîo maathaga Aisiraeli.

⁵ Samusoni nîwacokire makîthiî Timuna marî na aciari ake. Rîrîa maakinyire mîgûndarî ya mîthavibu kûu Timuna, Samusoni nîwegwire kaana ka mûnyambû gaûkîte kûrî ke gakîraramaga.

⁶ Roho wa Ngai-Mûnene nîwamûnyûrûrûkîre na vinya wa rîmwe na agîtucanga mûnyambû ûcio tûcunjî ta ûrîa mûndû atucangaga koori ka mbûri. Nwatî ndeera aciari ake ûrîa eekîte.

⁷ Nîwacokire akîthiî na makîaria na mûndûmûka ûcio na Samusoni akîmwenda.

⁸ Vuva wa mîthenya mînini Samusoni nîwacokire kûgîra mûndûmûka ûcio. Arî njîrarî nîwarûngamire na akîamba gûcaria kimba Kîam mûnyambû ûrîa aaûragîte. Nîwamakire rîrîa oonire gîtutu Kîam njûkî na ûûkî ûrî ndaarî ya kimba kîu.

⁹ Nîwekîrire ûûkî njararî na akîthiî akîrîcaga. Nîwathiîre kûrî aciari ake na akîmarûmia ûûkî ûcio na makîrîa. Nwatî Samusoni ndameera atî aarutîte ûûkî ûcio ndaarî ya kimba Kîam mûnyambû.

¹⁰ Îthe wa Samusoni nîwathiîre kûgîra mûndûmûka ûcio na Samusoni akîthondeka kîrugo kuo kûringana na mîtugo ya anake.

¹¹ Rîrîa Afilisiti moonire Samusoni, nîmaatûmire anake mîrongo îthatû (30) nîguo mathiî mekaranie nake.

¹² Samusoni nîwerire anake acio atîrî, “Nîngûmûgwatithia ndaî. Ethîrwa nîmûkûndaûrîra yo mîthenyarî îno mûgwanja ya kîrugo Kîam ûviki, nîngaamûva nguo mîrongo îthatû mbaro mûno na ciîngî mîrongo îthatû cia gûcenjia.

¹³ “Nwatî ethîrwa mûtingîvota kûndaûrîra yo nwanginya mûkaanengera nguo mîrongo îthatû mbaro mûno na ciîngî mîrongo îthatû cia gûcenjia.” Nao nîmaamwîrire atîrî, “Twîre ndaî îo yaku tûmîgue.”

¹⁴ Nake nîwamerire atîrî, “Kuuma kûrî mûrîcani nîkwaumire irio, kuuma kûrî ûcio ûrî vinya nîkwaumire mûrîo.” Anake acio matiavotete gûtaûra ndaî îo kwa îvinda rîa mîthenya îthatû.

¹⁵ Mûthenyarî wa kana, nîmeerire mûka wa Samusoni atîrî, “Thaîrîria mûthuuriguo nîguo atwîre ûrîa ndaî îo îrauga. Warega nîkwa tûgûkûvîvia mûrî na andû a mûciî waku. Nîkwa mwatwîtire gûkû nîguo mwîe indo cietû?”

¹⁶ Kwoguo mûka wa Samusoni nîwathiîre mbere ya Samusoni akîrîraga na akîmwîra atîrî, “Ndûmendete! Nîûmenete! Wagwatithirie andû a vûrûri wetû ndaî na ndwambîra ûrîa yugîte!” Nake Samusoni nîwerire mûka atîrî, “Ndirî mwîru vava kana nyanya, nîngîkwîra atîa?”

¹⁷ Mûka wa Samusoni nîwarîrire mîthenya îo mûgwanja ya kîrugo kîu nîguo Samusoni amûtaûrîre ndaî îo. Nwatî mûthenya wa mûgwanja Samusoni nîwerire mûka ûrîa ndaî îo yaugaga nîûndû nîwamûthînagia mûno. Nake mûka wa Samusoni nîwacokire akîra Afilisiti acio.

¹⁸ Kwoguo mûthenya wa mûgwanja mbere ya Samusoni atonye nyombarî îrîa aamamaga, andû a îtûûra nîmaathiîre kûrî ke na makîmwîra atîrî, “Nîndûî kîrî mûrîo gûkîra ûkî? Nîndûî kîrî vinya gûkîra mûnyambû?” Nake Samusoni nîwamerire atîrî, “Kethîwa mûtinarîma na ng'ombe yakwa, mûtingîavota gûtaûra ndaî yakwa.”

¹⁹ Roho wa Ngai-Mûnene nîwamûnyûrûkîre wa rîmwe na ûkîmwîkîra vinya. Nîwanyûrûrûkire Ashikeloni na akîûraga andû mîrongo îthatû kûu îtûûrarî. Nîwacokire akîmaruta nguo ciao irîa mbaro mûno na akîinenganîra kûrî andû arîa maataûrîte ndaî. Vuva wa ûguo, Samusoni nîwacokire mûciî arî mûrakaru.

²⁰ Mûka wa Samusoni nîwavecanirwe kûrî mûndûmûrûme ûrîa warûngamîrîrîte Samusoni ûvikirî.