Atir 13 - ÎVUKU RÎA ÛVORO MWARO

Gûciarwa gwa Samusoni

¹ Andû a Isiraeli nîmeevîrie Ngai-Mûnene rîngî, nake Ngai-Mûnene nîwamarekererie wathanirî wa Afilisiti îvinda rîa mîaka mîrongo îna.

² Vîndî îo kwarî na mûndû wetagwa Manoa warî wa kuuma îtûûrarî rîa Zora. Manoa aarî wa mûvîrîga wa Dani na mûka aarî nthata.

³ Mûraika wa Ngai-Mûnene nîwaumîrîre mûndûmûka ûcio na akîmwîra atîrî, “Taroria, we ûtûîre ûrî nthata, nwatî îvinda rîtarî îraca nîûkûgîa îvu na nîûgaaciara kavîcî.

⁴ Kwoguo îîmenyerere na ndûkanyue ndivei kana njovi, kana ûrîa kîndû kîrî mûgiro,

⁵ na rîrîa ûgaaciara, kavîcî kau gatikenjwa njuîrî nîûndû gakethîrwa kamûrîrîtwe Ngai kuuma gûciarwa gwako na gakethîrwa karî Mûnazari. Nîke ûkambîrîria kûvonokia Aisiraeli kuuma kûrî Afilisiti.”

⁶ Nake mûndûmûka ûcio nîwathiîre na akîra mûthuuriwe atîrî, “Mûndû wa Ngai nîwaûka kûrî nie. Nîonekaga arî wa kûgegania ta mûraika wa Ngai. Nie ndinamûûria kûrîa araumîte na ndanambîra rîîtwa rîake.

⁷ Nwatî nîambîrire atî nîngûgîa îvu na nîngaaciara kavîcî. Nîacokire ambîra atî ndikanyue ndivei kana njovi kana kîndû kîrî mûgiro nîûndû kavîcî kau nîgakaamûrîrwa Ngai ûtûûrorî wako wonthe na gakethîrwa karî Mûnazari.”

⁸ Nake Manoa nîwavoire Ngai-Mûnene akiugaga atîrî, “Nakûthaitha, Ngai-Mûnene, tiga mûndû wa Ngai ûrîa watûmire aûke rîngî kûrî tue nîguo atwîre ûrîa twagîrîrwe nî gwîka na kavîcî kau rîrîa gagaaciarwa.”

⁹ Ngai nîwekire ûrîa Manoa aamûririe, na mûraika wa Ngai nîwacokire kûrî mûka wa Manoa na akîmwîthîra mûgûndarî ekarîte nthî. Nwatî matiarî na mûthuuriwe, Manoa.

¹⁰ Kwoguo nîwavinyûrire kûrî mûthuuriwe, na akîmwîra atîrî, “Taroria! Mûndû ûrîa waûkîte kûrî nie mûthenya ûrîa wîngî nîwanyumîrîra rîngî.”

¹¹ Manoa nîwaûkîrire na makîthiî na mûka. Nîwathiîre kûrî mûndû ûcio na akûmûria atîrî, “We nîwe waragia na mûka wakwa?” Nake mûndû ûcio nîwacokirie atîrî, “Îî nînie.”

¹² Manoa nîwaûririe mûndû ûcio atîrî, “Rîrîa ciugo ciaku ikaavinga-î, mûtûûrîre wa kaana kau ûkethîrwa ûrî wa mûthemba ûrîkû, na gakaaruta wîra ûrîkû?”

¹³ Nake mûraika wa Ngai-Mûnene nîwerire Manoa atîrî, “Nwanginya mûkaguo akaavingia maûndû monthe marîa naamwîrire.

¹⁴ Ndakarîe kîndû wa kîonthe kiumîte mîthaviburî, ndakanyue ndivei, kana njovi kana arîa irio wa cionthe irî mûgiro. Nîwagîrîrwe nî kûvingia maûndû monthe marîa naamwathire eke.”

¹⁵ Nake Manoa nîwerire mûraika wa Ngai-Mûnene atîrî, “Nakûthaitha ndûkathiî. Tiga tûkûrugîre koori.”

¹⁶ Nwatî mûraika wa Ngai-Mûnene nîwerire Manoa atîrî, “Ethîrwa nîngwîkara gûkû, tîndîa irio cienyu. Nwatî ethîrwa nîmûkwenda kûivarîrîria, ivîvieni rîrî îtega kûrî Ngai-Mûnene.” (Manoa ndaamenyaga atî ûcio aarî mûraika wa Ngai-Mûnene.)

¹⁷ Nake Manoa nîwerire mûraika wa Ngai-Mûnene atîrî, “Twîre rîîtwa rîaku nîguo tûgaagûtîîa rîrîa ciugo ciaku ikaavinga.”

¹⁸ Nake mûraika wa Ngai-Mûnene nîwaûririe Manoa atîrî, “Ûrenda kûmenya rîîtwa rîakwa nîkî? Rîîtwa rîakwa nî rîa kûgegania.”

¹⁹ Kwoguo Manoa nîwocire koori na ngano na agîitegera Ngai-Mûnene na agîcigîrîra îgûrû rîa îthiga. Ngai-Mûnene ûcio nîke wîkaga maûndû ma magegania.

²⁰ Rîrîa nînîmbî cia mwaki ciaunûkagia na îgûrû kuuma metharî ya kîgongoona, Manoa na mûka nîmoonire mûraika wa Ngai-Mûnene aunûkîtie na îgûrû arî nînîmbîrî cia mwaki. Manoa na mûka nîmeenamîrîrie mothiû mao nthî makîgooca na matiacoka kwona mûraika ûcio rîngî.

²¹ Mûraika wa Ngai-Mûnene ndaanaumîrîra Manoa na mûka rîngî. Nao nîmaamenyire atî ûcio aarî mûraika wa Ngai-Mûnene.

²² Manoa nîwacokire akîra mûka atîrî, “Na ma nîtûgûkua nîûndû nîtwonete Ngai.”

²³ Nwatî mûka nîwamûcokerie atîrî, “Kethîrwa Ngai-Mûnene nîwendete gûtûûraga, ndangîretîkîrire matega metû na ndangîtwonetie maûndû mama monthe kana atwîra maûndû ta mama.”

²⁴ Mûndûmûka ûcio nîwaciarire kavîcî agîgatuîra rîîtwa Samusoni. Kavîcî kau nîgaakûrire na Ngai-Mûnene nîwakarathimire.

²⁵ Naguo Roho wa Ngai-Mûnene nîwambîrîrie kûmwîkîra vinya arî kûrîa mbarî ya Dani yambîte magema gatagatî ka Zora na Eshitaoli.