Atir 12 - ÎVUKU RÎA ÛVORO MWARO

Jefitha na andû a Efiraimu

¹ Andû a Efiraimu nîmaaûnganire vamwe na makîîvarîria kûrûa. Nîmaaringire Rûnjî rwa Jorodani na makîthiî Zafoni na nîmaaûririe Jefitha atîrî, “Ûvîtûkire mûvaka wathiî kûrûa na Aamoni nîkî na ndûnatwîta tûthiî nawe? Nîtûmundia nyomba yaku mwaki tûkûvîvîrie ndaarî!”

² Nwatî Jefitha nîwamerire atîrî, “Nie na andû akwa twarî avîtaniu na Aamoni. Rîrîa naamwîtire mûtiaûka kûmvonokia kuuma kûrî o.

³ Rîrîa noonire atî tîmûmvonokia, nînevirire ûgwatirî wa gîkuû na nînaaringire ngîthiî kûrûa na Aamoni na Ngai-Mûnene nîwamvotithirie kûmavoota. Kwoguo mûkîte kûrî nie mûkîenda tûrûe namue nîkî?”

⁴ Jefitha nîwacokire akîûngania vamwe arûme onthe a Gileadi, makîrûa na andû a Efiraimu na akîmavoota nîûndû andû a Efiraimu nîmaaugîte atîrî, “Mue andû a Gileadi aya mûtûûraga gatagatî ka Efiraimu mwatorokire kuuma Efiraimu mûkîthiî vûrûrirî wa Manase!”

⁵ Andû a Gileadi nîmeenyitîre mariûko monthe ma rûnjî rwa Jorodani kûrîa andû a Efiraimu mangîaringîre rûnjî. Nake mûndû wa wonthe wa Efiraimu angîaugaga etîkîrue aringe, andû a Gileadi nîmaamûragia atîrî, “We ûrî Mûefiraimu?” Nake angîaugire, “Naarî,”

⁶ nîmangîamwîraga atîrî, “Ta gweta kiugo gîkî, ‘Shibolethi’, nake akagweta, ‘Shibolethi,’ ” nîûndû ndangîavotaga gûkîgweta waro. Nîmaacokaga makamûnyita na makamûûragîra kûu mariûkorî ma Jorodani. Îvindarî rîu Aefiraimu ngiri mîrongo îna na igîrî (42,000) nîmaaûragirwe.

⁷ Jefitha nîwatirîrîre vûrûri wa Isiraeli îvinda rîa mîaka îtandatû. Nîwacokire agîkua na akîthikwa mûciî gwake kûu îtûûrarî rîa Gileadi.

Ibuzani, Eloni na Abudoni

⁸ Vuva wa Jefitha, Ibuzani wa kuuma Bethilehemu nîke watuîkire mûtirîrîri wa vûrûri wa Isiraeli.

⁹ Ibuzani aarî na avîcî mîrongo îthatû (30) na erîtu mîrongo îthatû (30). Nîwavecanire erîtu ake mîrongo îthatû makîvika nja ya mbarî yake, agîcoka akîrete erîtu mîrongo îthatû kuuma nja ya mbarî yake nîguo mavikue nî avîcî ake. Ibuzani aatirîrîre vûrûri wa Isiraeli îvinda rîa mîaka mûgwanja (7).

¹⁰ Nîwacokire agîkua na akîthikwa îtûûrarî rîa Bethilehemu.

¹¹ Vuva wa Ibuzani, Eloni wa mûvîrîga wa Zebuluni nîwatuîkire mûtirîrîri vûrûri wa Isiraeli. Eloni aatirîrîre vûrûri wa Isiraeli îvinda rîa mîaka îkûmi (10).

¹² Nîwacokire agîkua na akîthikwa kûu Aijaloni vûrûrirî wa Zebuluni.

¹³ Vuva wa Eloni, Abudoni mûvîcî wa Hileli wa kuuma Pirathoni nîwatuîkire mûtirîrîri vûrûri wa Isiraeli.

¹⁴ Abudoni aarî na avîcî mîrongo îna (40) na anake mîrongo îthatû (30) a avîcî ake arîa maathiîcaga matûîte mvunda mîrongo mûgwanja. Abudoni aatirîrîre vûrûri wa Isiraeli îvinda rîa mîaka înana.

¹⁵ Abudoni nîwacokire agîkua na akîthikwa kûu Pirathoni vûrûrirî wa Efiraimu îrîa îrî vûrûrirî ûrîa ûrî irîma wa Amaleki.