Atir 11 - ÎVUKU RÎA ÛVORO MWARO

¹ Jefitha ûrîa warî Mûgileadi aarî mûthigari njamba. Nwatî ng'ina aarî mûmaraa nake îthe wa Jefitha eetagwa Gileadi.

² Îthe Gileadi nîwagîre na avîcî engî na mûka ûrîa aavikirie. Rîrîa avîcî acio maakûrire, nîmaavinyûririe Jefitha na makîmwîra atîrî, “Gûtirî kîndû ûkagaa kuuma kûrî vava, nîûndû ûrî mûvîcî wa mûndûmûka wîngî.”

³ Jefitha nîwaûrire akiuma kûrî aa mûrwang'ina na akîthiî gûtûûra vûrûrirî wa Tobu. Arî kûu Tobu, Jefitha nîwanyitanîre na gîkundi Kîam andû mataarî kîene na nîmaathiîcanagia nake makîtharîkagîra andû.

⁴ Vuva wa kavinda, andû a Amoni nîmaathiîre kûrûa na andû a Isiraeli.

⁵ Rîrîa Aamoni maambîrîrie kûtharîkîra Aisiraeli, athuuri a Gileadi nîmaathiîre kûgîra Jefitha kûrîa aarî vûrûrirî wa Tobu.

⁶ Nîmaamwîrire atîrî, “Ûka ûtûtongorie, nîguo tûrûe na Aamoni.”

⁷ Nwatî Jefitha nîwacokerie athuuri acio a Gileadi atîrî, “Kinthî mûtiamenire na mûkîmîngata kuuma mûciî kwa vava? Mwambîcîra rîu nîkî rîrîa mûrî na thîna?”

⁸ Nao athuuri acio a Gileadi nîmeerire Jefitha atîrî, “Kîu nîkîo gîatûma tûgwîcîra nîguo tûthiî nawe tûkarûe na Aamoni na ûtuîke mûtongoria wetû na wa andû onthe arîa matûûraga Gileadi.”

⁹ Nake Jefitha nîwerire athuuri acio atîrî, “Ethîrwa nîmûkûnjokia mûciî nîguo tûkarûe na Aamoni, nake Ngai-Mûnene amvotithie kûmavoota, nînie ngaatuîka mûthamaki wenyu.”

¹⁰ Athuuri acio nîmeerire Jefitha atîrî, “Îî nîtwetîkîra, na Ngai-Mûnene nîke mûira wetû.”

¹¹ Kwoguo Jefitha nîwathiîre marî na athuuri acio a Gileadi, na andû nîmaamûtuire mûtongoria na mûthamaki wao. Jefitha nîwaririe maûndû monthe marîa aarî namo kûu Mizipa arî mbere ya Ngai-Mûnene.

¹² Jefitha nîwacokire agîtûma anjaama kûrî mûthamaki wa Aamoni makamwîre atîrî, “Nî atîa tûkûvîtîrîtie, atî nîguo ûke ûrûe na andû a vûrûri wakwa?”

¹³ Nake mûthamaki wa Aamoni nîwacokerie anjaama a Jefitha atîrî, “Rîrîa Aisiraeli maaumire Misiri nîmaanjunire vûrûri wakwa kuuma rûnjî rwa Arinoni nginya rûnjî rwa Jaboku na rûnjî rwa Jorodani. Kwoguo rîu njokeria na thayû.”

¹⁴ Jefitha nîwatûmire anjaama rîngî kûrî mûthamaki wa Aamoni

¹⁵ makamwîre atîrî, “Andû a Isiraeli matiacuna andû a Moabu vûrûri wao kana andû a Amoni vûrûri wao.

¹⁶ Nwatî rîrîa Aisiraeli maaumire Misiri nîmaavîtûkîrîre werûrî nginya îria îtune na magîkinya Kadeshi.

¹⁷ Aisiraeli nîmaacokire magîtûma anjaama mathiî kûrî mûthamaki wa Edomu makamûrie atwîtîkîrie tûvîtûkîrîre vûrûrirî waku. Nwatî mûthamaki wa Edomu ndaametîkîria. Nîmaacokire magîtûmana kûrî mûthamaki wa Moabu, nwatî wanake ndaametîkîria. Kwoguo Aisiraeli nîmeekarire wa kûu Kadeshi.

¹⁸ Nîmaacokire makîthiî na mbere mavîtûkîrîrîte werûrî. Nîmaathiûrûrûkire vûrûri wa Edomu na vûrûri wa Moabu nginya magîkinya mwena wa îrathîro wa Moabu îrîa yarî mwena ûcio wîngî wa rûnjî rwa Arinoni. Nîmaambire magema mao vau, nwatî matiaringa rûnjî rwa Arinoni nîûndû nîruo rwarî mûvaka wa Moabu.

¹⁹ Aisiraeli nîmaacokire magîtûma anjaama kûrî Sihoni, mûthamaki wa Amori, ûrîa wathanaga arî Heshiboni makamwîre ‘Twakûthaitha ûtwîtîkîrie tûvîtûkîrîre vûrûrirî waku tûkinye vûrûrirî wetû.’

²⁰ Nwatî Sihoni ndetîkîria Aisiraeli mavîtûkîrîra vûrûrirî wake. Vandû va ûguo, Sihoni nîwaûnganirie andû ake onthe vamwe na makîamba magema kûu Jahazi na makîtharîkîra Aisiraeli.

²¹ Nwatî Ngai-Mûnene, Ngai wa Isiraeli nîwarekererie Sihoni na andû ake onthe kûrî Aisiraeli na makîmavoota. Kwoguo Aisiraeli nîmegwatîre vûrûri wonthe wa Aamori arîa maatûûraga vûrûri ûcio.

²² Nîmegwatîre vûrûri wonthe wa Aamori kuuma Arinoni nginya Jaboku na kuuma werûrî nginya Jorodani.

²³ Kwoguo Ngai-Mûnene, Ngai wa Isiraeli nîwengatire Aamori nîguo mathengutîre andû ake Aisiraeli. Nîkwa ûkwenda kwîgwatîra vûrûri wetû?

²⁴ Îigîre kîrîa Kemoshi, ngai yaku îkûveete? Natue nîtwîgwatîra kûrîa Ngai-Mûnene, Ngai wetû atûvete.

²⁵ Nîkwa wî mwaro gûkîra Balaki, mûvîcî wa Zipori, mûthamaki wa Moabu? Ke ndaananegenania na Aisiraeli, wana ndaanarûa nao.

²⁶ Aisiraeli matwîre Heshiboni, Aroeri na icagirî irîa imathiûrûrûkîrîtie vamwe na matûûra monthe marîa marî rûtere rwa rûnjî rwa Arinoni îvinda rîa mîaka magana mathatû (300). Waregire kûmengata kuo îvinda rîu rîonthe nîkî?

²⁷ Nie ndikûvîtîrîtie, nwatî we nîûramvîtîria nîûndû wa kwenda tûrûe nawe. Tiga Ngai-Mûnene ûrîa arî ke mûtucanîri, atwithanie ûmûnthî gatagatî ka andû a Isiraeli na andû a Amoni.”

²⁸ Nwatî mûthamaki wa Aamoni ndathikîrîria ndûmîrîri îo yaumîte kûrî Jefitha.

²⁹ Roho wa Ngai-Mûnene nîwacokire ûgîtonya kûrî Jefitha, nake nîwaumire kûu akîvîtûkîra Gileadi na Manase na agîcoka Mizipa kûu Gileadi na akîthiî nginya agîkinya Amoni.

³⁰ Jefitha nîwerîre Ngai-Mûnene atîrî, “Ethîrwa nîûkûmvotithia kûvoota Aamoni,

³¹ kîrîa gîkauma nyomba gwakwa kîrî Kîam mbere gîûkîte kûndûnga narîkia kûvoota Aamoni, nîngaakîvecana kûrî Ngai-Mûnene kîrî îtega rîa kûvîvua.”

³² Kwoguo Jefitha nîwaringire rûnjî athiîte kûrûa na Aamoni, nake Ngai-Mûnene nîwamûvotithirie kûmavoota.

³³ Nîwamaûragire kuuma Aroeri nginya vûrûrirî ûrîa ûthiûrûrûkîrîtie Minithi, matûûra mîrongo îîrî nginya Abeli-karemimu. Jefitha nîwaûragire andû engî mûno. Kwoguo andû a Amoni nîmaavootirwe nî andû a Isiraeli.

Mwarî wa Jefitha

³⁴ Rîrîa Jefitha aacokire mûciî kûu Mizipa, mwarî nîwaumire nja na akîthiî kûmûtûnga akîinagia akîvûraga tamburini. Nîke warî mwana wake wenga, ndaarî na mwana wîngî wa kavîcî kana wa kerîtu.

³⁵ Rîrîa Jefitha aamwonire, nîwatembûrangire nguo ciake nîûndû wa kîeva na akiuga atîrî, “Ûûi, mwarîwa! Nîwambûraga ngoro! Nîwatûma nyitwa nî mathîna meengî mûno. Nînerîrîre Ngai-Mûnene na mwîvîtwa na ndingîvota kûregana naguo!”

³⁶ Mwarî nîwamwîrire atîrî, “Vava, ethîrwa nîwîrîrîte Ngai-Mûnene ûndû na mwîvîtwa, mbîka ûrîa waugire na kanyua gaku atî nîûgeka, nîûndû Ngai-Mûnene nîakûrîvîrîrîtie kûrî nthû ciaku, Aamoni.”

³⁷ Nwatî nîwacokire akîra îthe atîrî, “Mbîtîkîria mbîke ûndû ûmwe. Tiga mbîthîrwe nîrî nienga îvinda rîa mîeri îîrî, nîguo tûthiî irîmarî na arata akwa tûgacakae nîûndû ngaakua ndarî mûviku.

³⁸ Jefitha nîwacokire akîra mwarî athiî na akîmûrekia athiî kwa îvinda rîa mîeri îîrî. Mwarî na arata ake nîmaathiîre kûu irîmarî na agîcakaya nîûndû agaakua atarî mûviku.

³⁹ Vuva wa mîeri îîrî, nîwacokire kûrî îthe ûrîa wamwîkire wata ûrîa eerîrîte Ngai-Mûnene nîageka. Mwarî ndaarî anamenyana kîîmwîrî na mûndû mûrûme wanarî ûrîkû.” Naguo ûndû ûcio nîwatuîkire mûtugo wa kûrûmîrîrwa kûu Isiraeli

⁴⁰ atî erîtu a Isiraeli maumage mîciî îvinda rîa mîthenya îna wa mwaka wa mwaka magacakae makîririkana mwarî wa Jefitha ûrîa Mûgileadi.