Atir 10 - ÎVUKU RÎA ÛVORO MWARO

Tola

¹ Vuva wa Abimeleki nîgwacokire gûgîûka mûndû wetagwa Tola, mûvîcî wa Pua nîguo avonokie Aisiraeli. Pua aarî mûvîcî wa Dodo na aarî wa mûvîrîga wa Isakaru. Tola aatûûraga Shamiru vûrûrirî ûrîa ûrî irîma wa Efiraimu.

² Tola nîwatongoririe Aisiraeli îvinda rîa mîaka mîrongo îîrî na îthatû (23). Nîwacokire agîkua na akîthikwa kûu Shamiru.

Jairi

³ Vuva wa Tola, Jairi wa kuuma Gileadi nîwaûkire. Jairi nîwatongoririe Aisiraeli îvinda rîa mîaka mîrongo îîrî na îîrî (22).

⁴ Jairi aarî na avîcî mîrongo îthatû (30) arîa maathiîcaga matûîte njaû mîrongo îthatû cia mvunda. Nao maarî na matûûra mîrongo îthatû kûu vûrûrirî wa Gileadi marîa matwîre metagwa Havothu-Jairu nginya ûmûnthî.

⁵ Jairi nîwacokire agîkua na akîthikwa kûu Kamoni.

Jefitha

⁶ Aisiraeli nîmeevîrie Ngai-Mûnene rîngî. Nîmaagoocire Baali, Maashitarothu na ngai cia Moabu, Aamoni, na cia Filisiti. Nîmaatiganîrie Ngai-Mûnene na magîtiga kûmûtungatîra.

⁷ Kwoguo Ngai-Mûnene nîwarakarire nîûndû wa Aisiraeli, na akîmarekereria kûrî Afilisiti na Aamoni.

⁸ Nao Afilisiti na Aamoni nîmaarivire na makîvinyîrîria andû onthe a Isiraeli arîa maatûûraga vûrûrirî wa Amori mwena wa îrathîro wa Jorodani kûu Gileadi îvinda rîa mîaka îkûmi na înana (18).

⁹ Aamoni nîmaaringire Jorodani na makîthiî kûrûa na andû a mûvîrîga wa Juda, Benjamini, na nyomba ya Efiraimu. Kwoguo Aisiraeli maarî na thîna mûno.

¹⁰ Aisiraeli nîmaacokire makîrîrîra Ngai-Mûnene makiugaga atîrî, “Nîtûkûvîtîrîtie, nîûndû nîtûgûtiganîrîtie we Ngai wetû na tûgatungatîra Baali ngai cia mîvuanano.”

¹¹ Nake Ngai-Mûnene nîwamerire atîrî, “Kinthî ndiamûvonokirie kuuma kûrî Amisiri, Aamori, Aamoni na Afilisiti?

¹² Asidoni, Amaleki na Aamidiani wanao nîmaamûvinyîrîrîtie, na rîrîa mwandîrîre nînaamûvonokirie kuuma kûrî o.

¹³ Nwatî nîmwandiganîrie na mûgîtungatîra ngai ciîngî. Kwoguo ndikamûvonokia rîngî.

¹⁴ Thiîni mûkarîrîre ngai icio mwathuurire nîguo imûvonokie rîrîa mûranyamarîka.”

¹⁵ Nwatî andû a Isiraeli nîmeerire Ngai-Mûnene atîrî, “Nîtwîvîtie. Twîke wa ûrîa ûkwona kwagîrîrîte, nwatî twakûthaitha ûtûvonokie ûmûnthî.”

¹⁶ Kwoguo nîmaatere ngai icio maarî nacio na magîtungatîra Ngai-Mûnene. Nake Ngai-Mûnene nîwegwire ntha nîûndû wa ûrîa Aisiraeli maanyarirîkîte.

¹⁷ Aamoni nîmaaûnganire na makîamba magema mao kûu Gileadi. Nao andû a Isiraeli makîûngana na makîamba magema kûu Mizipa îrîa îrî Gileadi.

¹⁸ Marî wa kûu, atongoria a andû a Isiraeli nîmaambîrîrie kûrania o ene atîrî, “Nî ûrîkû ûkwambîrîria kûtharîkîra andû a Aamoni? Ûrîa ûgwîka guo nîke ûgûtuîka mûtongoria wa andû onthe arîa matûûraga Gileadi.”