Atir 1 - ÎVUKU RÎA ÛVORO MWARO

Mîvîrîga ya Juda na Simioni nîyatavire Adonibeseki

¹ Vuva wa Joshua gûkua, Aisiraeli nîmaaûririe Ngai-Mûnene atîrî, “Gatagatîrî ka mîvîrîga yetû-î nî mûvîrîga ûrîkû ûkwîthîrwa ûrî wa mbere kûthiî kûrûa na Akanaani?”

² Nake Ngai-Mûnene nîwamacokerie atîrî, “Mûvîrîga wa Juda nîguo ûkûthiî ûrî wa mbere. Nie nînîmavete ûvootani îgûrû rîa vûrûri ûcio.”

³ Andû a mûvîrîga wa Juda nîmeerire andû a mûvîrîga wa Simioni atîrî, “Ûkani tûnyitane tûthiî vûrûrirî ûrîa tûvetwe nîguo tûkarûe na Akanaani. Vuvarî nîtûgaacoka tûthiî vûrûrirî ûrîa mûvetwe tûrî wa namue.” Kwoguo andû a mûvîrîga wa Simioni

⁴ na wa Juda nîmaathiîre mbaararî vamwe. Nake Ngai-Mûnene nîwamavotithirie kûvoota Akanaani na Aperizi. Nîmaavootire andû ngiri îkûmi kûu Bezeki.

⁵ Nîmaacemanirie na Adonibeseki kûu Bezeki na makîrûa nake.

⁶ Adonibeseki nîwaûrire, nwatî andû a mûvîrîga Juda na wa Simioni nîmaamûvinyûririe, makîmûnyita na makîmûtinia ciara irîa nene cia njara na cia magûrû.

⁷ Adonibeseki nîwacokire akiuga atîrî, “Nîkwarî na athamaki mîrongo mûgwanja maatinîtue ciara irîa nene cia njara wana cia magûrû. Athamaki acio moocanagia rwîtîki rungu rwa metha yakwa makîrîcaga. Wata ûrîa nekire andû, nwaguo Ngai ambîka.” Adonibeseki nîwacokire akîvirwa Jerusalemu, kûrîa aakuîrîre.

Mûvîrîga wa Juda nîwavootire andû a Jerusalemu na Heburoni

⁸ Andû a Juda nîmaatharîkîre îtûûra rîa Jerusalemu na makîrîtava. Nîmaaûragire andû a îtûûra rîu na magîcoka makîrîvîvia.

⁹ Vuva wa ûguo, andû a Juda nîmaathiîre kûrûa na andû a Kanaani arîa maatûûraga vûrûrirî ûrîa ûrî irîma, arîa maarî Negebu na arîa maatûûraga vûrûrirî ûrîa mwaraganu.

¹⁰ Andû acio a Juda nîmaacokire makîthiî kûrûa na Akanaani arîa maatûûraga îtûûrarî rîa Heburoni. Îtûûra rîu rîa Heburoni mbererî rîetagwa Kîriathi-ariba. Andû acio a Juda nîmaavootire andû a mbarî ya Shashai, Ahimani na Tulimani.

Othinieli nîwarûire na andû a îtûûra rîa Debiri

¹¹ Andû a Juda nîmaacokire makiuma kûu na makîthiî kûrûa na andû arîa maatûûraga îtûûrarî rîa Debiri. Îtûûra rîu rîa Debiri mbererî rîetagwa Kiriathi-seferi.

¹² Mûndû ûmwe wa Juda wetagwa Kalebu nîwaugire atîrî, “Mûndû ûrîa ûkaarûa na îtûûra rîa Kiriathi-seferi na arîtave nîke ngaava mwarîwa Akisa atuîke mûka.”

¹³ Othinieli, mûvîcî wa mûrwang'ina na Kalebu ûrîa mûnini wetagwa Kenazi nîke watavire îtûûra rîu. Kwoguo Kalebu nîwavere Othinieli mwarî Akisa atuîke mûka.

¹⁴ Rîrîa mûthenya wa kûvikania wakinyire, Othinieli nîwaringîrîrie Akisa eere îthe Kalebu amûve kîveo. Akisa nîwaumire îgûrû rîa mvunda yake, nake Kalebu akîmûria atîrî, “Nîndûî ûrenda?”

¹⁵ Nake Akisa nîwacokirie atîrî, “Mva ithima cia manjî, nîûndû mûgûnda ûrîa ûmvete ûrî vûrûrirî mûmagaru mûno.” Kwoguo Kalebu nîwavere Akisa mûgûnda wî na ithima cia manjî mwena wa rûgûrû wana wa îveti.

Mîvîrîga ya Juda na Benjamini nîyavootanire

¹⁶ Njiarwa cia mûthoniwe wa Musa ûrîa warî Mûkeni, vamwe na andû a Juda nîciaumire Jeriko îtûûra rîa Mîkîndû na makîthiî werûrî wa Juda ûrîa ûrî Negebu vakuvî na Aradi. Kûu nîkuo maatûûranirie na Amaleki.

¹⁷ Andû a Juda nîmaacokire makîthiî vamwe na andû a Simeoni na makîvoota andû a Kanaani arîa maatûûraga îtûûrarî rîa Zefathu na magîcûkangia îtûûra rîu viû. Îtûûra rîu nîrîacokire gwîtwa Horima.

¹⁸ Andû a mûvîrîga wa Juda nîmaavootire matûûra ma Gaza, Ashikeloni, Ekironi na mavûrûri marîa maamathiûrûrûkîrîtie.

¹⁹ Ngai-Mûnene nîwavotithirie andû a Juda kûnyita vûrûri ûrîa ûrî irîmarî, nwatî matiavota kûvoota andû arîa maatûûraga kûndû kûrîa kwaraganu nîûndû maarî na ikaari cia mbaara cia cuuma.

²⁰ Kalebu nîwaverwe îtûûra rîa Heburoni wata ûrîa Musa aaugîte. Nake Kalebu nîwengatire avîcî athatû a Anaki kuuma kuo.

²¹ Nwatî andû a mûvîrîga wa Benjamini matiengata Ajebusi arîa maatûûraga Jerusalemu, na kuuma vîndî îo Ajebusi matûûranagia na andû a Benjamini kûu Jerusalemu nginya ûmûnthî.

Mûvîrîga wa Efiraimu na wa Manase nîmaavootire Betheli

²² Andû a mûvîrîga wa Efiraimu na wa Manase nîmaathiîre kûtharîkîra îtûûra rîa Betheli. Nake Ngai-Mûnene aarî vamwe nao.

²³ Mbere nîmaatûmire athigani îtûûrarî rîu. Îtûûra rîu mbererî rîetagwa Luzi.

²⁴ Athigani acio nîmoonire mûndûmûrûme aumîte îtûûrarî rîu na makîmwîra atîrî, “Twakûthaitha ûtwonie njîra ya gûtonya îtûûra rîîrî, natue nîtûgûgwîka maûndû maro.”

²⁵ Nake nîwamoonirie njîra ya gûtonya îtûûra rîu. Nao athigani acio nîmaatonyire îtûûra rîu makîûraga andû onthe a kuo, nwatî nîmaarekererie mûndû ûcio na andû a mûciî wake.

²⁶ Mûndû ûcio nîwacokire akîthiî vûrûrirî wa Ahiti na nîwatumire îtûûra kuo na akîrîta Luzu, na rîtûîre rîtagwa ûguo nginya ûmûnthî.

Andû arîa mateengatwa nî Aisiraeli

²⁷ Andû a mûvîrîga wa Manase matiengata andû arîa maatûûraga matûûrarî ma Bethisheani, Taanaki, Doru, Ibileamu, Megido, na icagi irîa ithiûrûrûkîrîtie matûûra mau, nwatî Akanaani nîmaathiîre na mbere gûtûûra vûrûrirî ûcio.

²⁸ Rîrîa Aisiraeli maagîre na vinya, nîmaarutithirie Akanaani mawîra na vinya, nwatî matiamengata onthe viû.

²⁹ Andû a mûvîrîga wa Efiraimu matiengata Akanaani arîa maatûûraga îtûûrarî rîa Gezeri, kwoguo Akanaani nîmaathiîre na mbere gûtûûrania na andû a Efiraimu kûu Gezeri.

³⁰ Andû a mûvîrîga wa Zebuluni matiengata andû arîa maatûûraga Kitironi kana arîa maatûûraga Nahalali, kwoguo Akanaani nîmaathiîre na mbere gûtûûrania na Azebuluni kuo. Nao Azebuluni nîmaarutithagia Akanaani wîra na vinya.

³¹ Andû a mûvîrîga wa Asheri matiengata andû arîa maatûûraga matûûrarî ma Ako, Sidoni, Ahilabu, Akizibu, Heliba, Afeku na Rehobu.

³² Andû a Asheri maatûûranirie na Akanaani arîa maatûûraga kûu nîûndû matiamengata.

³³ Nao andû a mûvîrîga wa Nafutali matiengata andû arîa maatûûraga matûûrarî ma Bethishemeshi na Bethianathu. Maatûûranirie na Akanaani arîa maatûûraga vûrûrirî ûcio, nwatî nîmaarutithagia Akanaani acio wîra na vinya.

³⁴ Amori nîmeengatire na vinya andû a mûvîrîga wa Dani na makîthiî vûrûrirî ûrîa ûrî irîma na nîmaamagiririe manyûrûrûke kûndû kûrîa kwaraganu.

³⁵ Amori nîmaathiîre na mbere gûtûûra Aijaloni, Sha-alibimu, na kîrîmarî Kîam Herihezi. Nwatî andû a mîvîrîga ya Efiraimu na Manase nîmaamavootire na nîmaarutithagia Amori acio wîra na vinya.

³⁶ Mûvaka wa Amori wambîrîrîtie Sela ûkîvîtûkîrîra mwanyarî wa Akirabimu unûkîtie.