Amosi 9 - ÎVUKU RÎA ÛVORO MWARO

Îtuîro rîa Ngai-Mûnene

¹ Nînonire Ngai-Mûnene arûngamîte metharî ya kîgongoona. Nake nîwathanire atîrî, “Ringa ciongo cia itugî cia hekarû na vinya mûno, nginya mîcingi yayo inaine, mîomomore îgwîre andû arîa marî kuo, na arîa magatigara nîngaamaûraga na rûviû. Gûtirî mûndû wa naarî ûmwe ûkauma kuo, gûtirî wanarî ûmwe ûkaûra.

² Wana menja njîra îthiîte kwa arîa akuû, nîngaamaruta kuo na njara yakwa; wana mangîkaunûkia mathiî îgûrû, wana kuo nîngamanyûrûrûkia gûkû nthî.

³ Wana mangîkeethitha kîrîmarî gîa Karimeli îgûrû, nîngamacaria nîmarute kuo. Wana mangîkeethitha kûraca nanie îriarî kûrîa kûrikîru mûno, nîngaatha njoka îrîa îtûûraga îriarî îmarûme.

⁴ Mangîkaanyitwa nî nthû ciao mavirwe îthamîriorî, nîngaathana maûragîrwe kuo na rûviû. Nîngaarîthania nao nginyîrîrîtie nîmeeke maûndû macûku na tî maro.”

⁵ Ngai-Mûnene mwene vinya wonthe, ûrîa ûvutagia nthî îkararûka, na arîa onthe matûûraga kuo magacakaya, na vûrûri wonthe ûgecûra ta rûnjî rwa Nilo, na ûkavwa rîngî ta rûnjî rwa Nilo ya Misiri;

⁶ ûrîa ûtumaga nyomba yake îgûrû matuurî, na akaiga mûtambarûko wa matu îgûrû rîa nthî. Nîke ûnganagia manjî marîa marî îriarî, akametûrûra gûkû nthî nyûmû, rîîtwa rîake nî Ngai-Mûnene.

⁷ Ngai-Mûnene arauga atîrî, “Mue andû a Isiraeli, nîmwîciragia wata ûrîa nîîciragîria andû a Ethiopia. Nînarutire andû a Isiraeli vûrûrirî wa Misiri, na ngîruta Afilisiti kuuma Kirete, na andû a Sîria ngîmaruta Kiru.

⁸ Nie Ngai-Mûnene nîndoretie ûthamaki mwîvia wa Isiraeli, nîngaûcûkangia ûthire gûkû nthî, nwatî ndikaathiria nyomba ya Jakovu viû.

⁹ “Nîûndû nîngaathana na mvûnge andû a Isiraeli mavûrûrirî marîa mengî, ta ûrîa mûndû avûngaga ngano na gîcungi, na nîngaaruta kîndû kîonthe gîcûku.

¹⁰ Evia onthe gatagatîrî ka andû akwa nîmakaûragîrwa mbaararî, arîa maugaga atî, ‘Tûtikaanyitwa nî ûndû mûcûku.’

¹¹ Mûthenya ûcio nîngaarûngamia ûthamaki wa Daudi ûrîa wagwîre. Nîngaatuma rîngî nthingo ciaguo irîa ciarî nyomomoku, ciîkare ta ûrîa ciekariî mbere.

¹² Nao andû a Isiraeli nîmakegwatîra matigari ma Edomu, na mavûrûri monthe marîa metanîtue rîîtwa rîakwa.” Ûguo nîguo Ngai-Mûnene ûrîa ûgwîka maûndû mau augîte.

¹³ Ngai-Mûnene arauga atîrî, “Taroria, mîthenya nîgûkinya, rîrîa ngano îgaakûra na îvenya gûkîra rîrîa ikethagwa, na thavibu ikûre na îvenya gûkîra rîrîa ingîvivwa. Irîma ikaatherûkaga ndivei ya kûvivwa wa rîo, na tûrîma tûgetûrûraga ndivei.

¹⁴ Nîngacokia andû akwa vûrûrirî wao, nîmagaatuma rîngî matûûra marîa moomorirwe na matûûre kuo, nîmakaavanda mîthavibu na manyue ndivei ya yo, nîmakavanda irio mûgûndarî na marîe maketha ma yo.

¹⁵ Nîngatûma andû akwa mekare vûrûrirî wao, na matikaarutwa kuo rîngî.” Ûguo nîguo Ngai-Mûnene augîte.