Amosi 8 - ÎVUKU RÎA ÛVORO MWARO

Kîoneki gîa kana: Gîkavu kîa matunda

¹ Ngai-Mûnene nîwamonirie kîoneki kîngî: Nînonire gîkavu gîcûrîte matunda ma vîndî ya riûa.

² Ngai-Mûnene nîwacokire akîmbîra atîrî, “Amosi, nî ndûî ûrona?” Na nie nînamûcokerie atîrî, “Nîrona matunda ma vîndî ya riûa mecûrîte gîkavurî.” Nake Ngai-Mûnene nîwacokire akîmbîra atîrî, “Mûthiia wa andû akwa a Isiraeli nîwakinya, ndingîricûkwa rîngî ûvororî wîgiî kûmaverithia.

³ Mûthenya ûcio mûciî kwa mûthamaki gûkainwa nyîmbo cia macakaya. Gûkethîrwa na ciimba nyîngî, ikanyagarûkua kûndû kuonthe gûkirîtwe kivi.”

⁴ Tathikîrîria ûvoro ûyû mue arîa mwendaga kûvinyîrîria ngîa, na mwendaga kûthiria athîni vûrûrirî,

⁵ mûkiugaga ngororî cienyu atîrî, “Kîrugo Kîam mweri mûcerû gîkathira rî, nîguo twendie irio cietû cia mûgûnda? Thavatû îkaathira rî, twambîrîrie kwendia ngano cietû, na tûcenjia ithimi irîa tûthimaga nacio, nîguo tûveenie andû?

⁶ Tûkaagûraga arîa matarî na vinya na sîlûva, na arîa ngîa tûmagûrage na iratû cia nyamûga, na twendagie muura wa ngano.”

⁷ Ngai-Mûnene, Ngai wa Isiraeli nîevîtîte akauga atîrî, “Nama ndikariganîrwa nî ciîko ciao njûku.

⁸ Nîûndû wa gîtûmi gîkî, nthî nîkainaina, na mûndû wa wonthe ûtûûraga nthî acakae. Vûrûri wonthe nîûgecûra ta rûnjî rwa Nilo, ûgaaikanagia ta rûnjî rwa Nilo.”

⁹ Ngai-Mûnene arauga atîrî, Mûthenya ûcio nîngaatûma riûa rîthûe mûthenya, na ndûme kûgîe nduma.

¹⁰ Nîngaatûma irugo cienyu ituîke kîrîro, na nyîmbo cienyu cionthe ituîke cia macakaya. Nîngaatûma andû onthe mekîre nguo cia macakaya, na ndûme menje njuîrî cionthe ciongorî ciao, gûgekara ta andû magîcakaîra mwana wa kîmomwe, na mûthenya wa mûthiia ûkethîrwa ûrî na ûrûrû mwîngî.

¹¹ Ngai Mûnene arauga atîrî, “Taroria îvinda nîrîgûkinya, rîrîa ngaatûma kûgîe na yûra gûkû nthî, tî yûra rîa mûgate kana nyonda ya manjî, nwatî nî yûra na nyonda ya ndûmîrîri ya Ngai-Mûnene.

¹² Andû nîmakaathiûrûrûka kuuma îria rîmwe kûthiî rîrîa rîngî, na kuuma rûgûrû kûthiî îrathîro. Nîmakavinyûra ava na vaarîa magîcaria kiugo Kîam Ngai, nwatî matigakîona.

¹³ “Mûthenya ûcio erîtu na anake arîa marî na ûgima wa mwîrî, nîmakaagirîka nîûndû wa kûnyonda.

¹⁴ Nao arîa mevîtaga na Ngai ya mîvuanano ya Samaria makiugaga: ‘Wata ûrîa ngai ya Dani îtûûraga mwoyo,’ na makauga rîngî, kana ‘Wata ûrîa ngai ya Beerisheba îtûûraga mwoyo,’ andû acio nîmakagwa na matigaûkîra rîngî.”