Amosi 7 - ÎVUKU RÎA ÛVORO MWARO

Kîoneki kîa mbere: Ngige

¹ Mama nîmo maûndû marîa Ngai-Mûnene aamonirie: Nînonire akîûmba gîtutu Kîam ngige vîndî îrîa nyaki yambagîrîria kûtheûka yarîkia gûtemerwa mûthamaki.

² Rîrîa ngige ciarîîre mîmera yonthe vûrûrirî nînaugire atîrî, “Ûûi Ngai-Mûnene, Ngai nakûthaitha movere. Njiarwa cia Jakovu îgatûûra mwoyo atîa? Nî anini mûno!”

³ Ngai-Mûnene, Ngai nîwericûkirwe gwîka ûndû ûcio na akiuga atîrî, “Ûndû ûcio tîwîkîka.”

Kîoneki gîa kaîrî: Mwaki

⁴ Ngai-Mûnene, Ngai nîwamonirie Kîoneki gîkî gîa kaîrî. Nînonire Ngai-Mûnene Ngai agîta mwaki nîguo averithie andû naguo. Mwaki ûcio nîwavîvirie manjî ma îria nginya kûrîa kûrikîru mûno na ûgîtamba nginya nthî nyûmû.

⁵ Nînacokire ngiuga atîrî, “Ûûi Ngai-Mûnene, Ngai nakûthaitha ûtige kûmaverithia. Njiarwa cia Jakovu ingîtirîria maûndû mama atîa? Nî anini mûno!”

⁶ Ngai-Mûnene Ngai nîwericûkirwe gwîka ûndû ûcio na akiuga atîrî, “Ûndû ûcio wanaguo tîwîkîka.”

Kîoneki gîa kathatû: Kabirû

⁷ Ngai-Mûnene nîwacokire akîmonia kîoneki gîa kathatû. Nînonire Ngai-Mûnene arûngamîte vakuvî na rûthingo anyitîte kabirû.

⁸ Nake Ngai-Mûnene nîwambîrire atîrî, “Amosi, ûrona ndûî?” Nanie nînamûcokerie atîrî, “Nîrona kabirû.” Ngai-Mûnene nîwacokire akîmbîra atîrî, “Taroria! Nînaiga kabirû gatagatî ka andû akwa a Isiraeli. Ndingîricûkwa rîngî îgûrû rîgiî kûmaverithia.

⁹ Kûrîa gûtûgîru njiarwa cia Isaka igoocagîra nîngaagûcûkangia viû, nacio nyomba irîa nyamûre cia andû a Isiraeli igatuîka maganjo na nîngaatharîkîra nyomba ya Jeroboamu na rûviû rwa njûra.”

Amosi na Amazia

¹⁰ Amazia mûthînjîri-Ngai wa îtûûra rîa Betheli nîwavirîre mûthamaki Jeroboamu wa Isiraeli ndûmîrîri îno: “Amosi nîavangîte ûndû mûcûku gatagatî gaku na andû a Isiraeli. Maûndû marîa ethîrîtwe akîaria nwa macûkangie vûrûri ûyû.

¹¹ Ethîrîtwe akiuga atî Jeroboamu nîakaaûragwa na rûviû, nao andû a Isiraeli nîmagaatavwa kuuma vûrûrirî wao mavirwe îthamîriorî.”

¹² Amazia nîwacokire akîîra Amosi atîrî, “We Mûrathi, uma gûkû ûthiî vûrûri wa Juda, ûrîcage irio kuo na ûrathage maûndû ûrî kuo.

¹³ Nwatî ndûkarathîre îtûûra rîa Betheli rîngî. Nîûndû nîkuo mûthamaki agoocagîra na nî hekarû ya vûrûri ûyû.”

¹⁴ Nake Amosi nîwacokerie Amazia atîrî, “Nie ndirî mûrathi wa kûrîvwa, kana ûmwe wa gîkundi Kîam arathi. Nîrî mûrîthi na mûmenyereri wa mûkûyû.

¹⁵ Ngai-Mûnene nîwandutire wîrarî wakwa wa kûrîthia akîmbîra mbûke ndathîre andû ake a Isiraeli.

¹⁶ Kwoguo rîu Amazia thikîrîria ndûmîrîri ya Ngai-Mûnene. Ûmbîraga ndikarathîre andû a Isiraeli na ndikavunjîrie andû a nyomba ya Isaka.

¹⁷ Kwoguo Ngai-Mûnene arauga atîrî, ‘Mûka waku akethîrwa arî îraa îtûûrarî, nacio ciana ciaku nîikaûragîrwa mbaararî na mûgûnda waku nîûgatûrangîrwa andû engî. We mwene, ûgaakuîra vûrûrirî ûtarî mûtheru, nao andû onthe a Isiraeli nîmagaatavwa mavirwe îthamîriorî kûraca na vûrûri wao.’ ”