Amosi 6 - ÎVUKU RÎA ÛVORO MWARO

Gûcûkangua gwa Isiraeli

¹ Kaî arîa mekaraga Zayuni magangarîte marî na thîna-î, na arîa megucaga marî agitîre marî kîrîmarî gîa Samaria, mue atongoria a rûrîrî rûnene rwa Isiraeli, kûrîa andû mathiîcaga gûcaria ûtethio!

² Tathiîni îtûûra rîa Kaline mûkeyonere, na mûthiî îtûûrarî înene rîa Hamathi, na mûnyûrûrûke mûkinye îtûûrarî rîa Gathu vûrûrirî wa a Filisiti. Nîkwa maarî maro gûkîra mothamaki mama, kana nîkwa vûrûri wao ûrî mûnene gûkîra wenyu?

³ Mue mûgeragia kûrega mûthenya mûcûku, nwatî mûgetîkîra arîa maathanaga na vinya.

⁴ Mue arîa mûmamagîra itanda cia mîguongo kaî mûrî na thîna-î, na mûgatambararia itîîrî cia cûva, mûkîrîcaga nyama kuuma ndîthiarî cia ng'ondu, na nyama cia njaû kuuma ndîthiarî cia ng'ombe.

⁵ Mwendaga kwina nyîmbo mûkîvûraga ngita, mûgîtungaga nyîmbo njerû ta irîa mûthamaki Daudi aatungire.

⁶ Mûnyunyaga ndivei na mbakûri, na mûkevaka maguta manungi waro mûno, nwatî mûtiîgucaga kîeva nîûndû wa gûcûkangua gwa Isiraeli.

⁷ Kwoguo mûkethîrwa mûrî a mbere kûthiî îthamîriorî, na irugo cia arîa mekaraga magangarîte nîikaathira.

⁸ Ngai-Mûnene mwene vinya wonthe nîevîtîte akauga, “Nînthûrîte mwîtîîo wa andû a Isiraeli, na ngamena nyomba ciao cia goro, nîngaavecana îtûûra rîao rîrîa rînene na indo cionthe irîa irî kuo kûrî nthû ciao.”

⁹ Kûngîkethîrwa na andû îkûmi matigarîte mûciî ûmwe, nîmagaakua.

¹⁰ Mûndû ûrîa makonenie na ûcio mûkuû angîgaaûka kûruta kimba nyomba nîguo akîvîvie, nîakeera ûrîa ûkethîrwa atigîtwe nyomba atîrî, “Kûrî mûndû mûrî nake kûu nyomba?” Nake nîagaacokia auge atîrî, “Naarî!” Nake nîakaauga atîrî, “Kira, tûtiagîrîrwe nî kûgweta rîîtwa rîa Ngai-Mûnene.”

¹¹ Taroria! Ngai-Mûnene nîarathana, nyomba nene na nini nîikaavaraganua ithire.

¹² Mbarathi nîivinyûragîra mathigarî? Andû nîmarîmaga îriarî na ndegwa? Nwatî mûgarûrîte kîvooto gîgatuîka ûrogi, na ûthingu ûgatuîka ûrûrû.

¹³ Mwîtîîaga nîûndû wa kûnyita îtûûra rîa Lodebari, mugaga atî, “Na vinya wetû nîtwînyitîrîte îtûûra rîa Karinaimu.”

¹⁴ Ngai-Mûnene, Mwene vinya wonthe arauga atîrî, “Nîngûreta vûrûri mûgeni ûmûtharîkîre, ûkaamûvinyîrîria kuuma mwîrîgarî wa Hamathi nginya karûnjî ka Araba.”