Amosi 5 - ÎVUKU RÎA ÛVORO MWARO

Macakaya ma Amosi

¹ Tathikîrîria ngîgûcakaîra we Isiraeli.

² We nthingi Isiraeli nîûgwîte na ndûngîûkîra rîngî, ûtigîtwe ûrî wenga vûrûrirî waku, gûtirî wanarî mûndû wa gûkûrûngamia.

³ Ngai-Mûnene arauga atîrî, “Andû ngiri îmwe nîmakauma îtûûrarî mathiî makarûe, nwatî arîa magaatigara nî andû îgana rîmwe. Andû îgana rîmwe nîmakauma îtûûrarî rîngî nwatî andû îkûmi tu nîo magatigara.”

⁴ Ngai-Mûnene arera andû a Isiraeli atîrî, “Njariani namue nî mûgûtûûra mwoyo!

⁵ Mûtikaathiî Beeri-shiba kûgooca. Mûtikanjarie kûu Betheli nîûndû Betheli nîgaacûkangua kana mûthiî Giligali nîûndû nwanginya mathiî îthamîriorî.”

⁶ Cariani Ngai-Mûnene, namue nîmûgûtûûra mwoyo. Ethîrwa tîmûmûcaria nîakaamûthiria mue njiarwa cia Josefu na Mwaki. Mwaki nîûkavîvia atûûri a Betheli na gûtirî mûndû ûkaavota kûûvoria.

⁷ Îîmenyerereni mue arîa mûreganaga na ûûma na mûgakinyangîra kîvooto nthî.

⁸ Ngai-Mûnene nîke waûmbire njata, nîke waûmbire Kîrîmîra na Orioni. Nîke wagarûrire nduma nene îgîtuîka ûtheri, na mûthenya ûgîtuîka ûtukû. Acokanagîrîria manjî ma îria vamwe na akametûrûra nthî. Etagwa Ngai-Mûnene.

⁹ Nîke ûthiragia arîa marî vinya na agacûkangia kûndû kwao gwa kwîgitîra.

¹⁰ Mue nîmûthwîre arîa marûngamagîrîra kîvooto na arîa maragia ûûma îgootirî.

¹¹ Mue nîmûvinyagîrîria ngîa na mûkametia gooti ya ngano nyîngî gûkîra ûrîa magîrîrwe nî kûruta. Mwîtumîrîte nyomba cia mathiga ma kumia, nwatî mûtigaitûûra. Nîmûrîmîte mîgûnda mîaro ya mîthavibu nwatî mûtikaanyua ndivei ya thavibu icio.

¹² Nîmbîcî ûrîa mavîtia menyu marî meengî na ngamenya ûrîa mwîkîte maûndû meengî macûku. Mûnyariraga andû arîa aro, mûkamûkîra mavaki na mûkagirîrîria ngîa ituîrwa na kîvooto îgootirî.

¹³ Kwoguo, nîgûkethîrwa na mavinda macûku na nginya mûndû ûrîa mûûgî nîagaakira kivi.

¹⁴ Geragiani gwîka maûndû marîa maro na mûtigekage marîa macûku nîguo mûtûûre mwoyo. Mweka ûguo, Ngai-Mûnene, Mwene vinya wonthe akethagîrwa arî vamwe na mue wata ûrîa mugaga.

¹⁵ Thûrani maûndû macûku na mwende maûndû maro, na mûrûmagîrîre kîvooto magootirî. Nwa kwîthîrwa Ngai-Mûnene, Mwene vinya wonthe nwa akinyîrie njiarwa cia Josefu irîa itigarîte wega wake.

¹⁶ Kwoguo Ngai-Mûnene, Mwene vinya wonthe arauga atîrî, “Nîgûkethîrwa na kîeva na kîrîro icagirî na matûûrarî monthe. Andû nîmagacakaya makiugaga, ‘Ûûi! Ûûi!’ Arîmi nîmagetwa wana arîa marîvagwa gûcakaya mathiî magacakaîre arîa akuû.

¹⁷ Nîgûkethîrwa na kîrîro mîgûndarî yonthe ya mîthavibu. Maûndû mama magekîka nîûndû nîngaûka kûmûverithia. Ûguo nîguo Ngai-Mûnene arauga.

¹⁸ Kaî andû arîa metagîrîra mûthenya wa Ngai-Mûnene marî na thîna-î. Mwetagîrîra mûthenya ûcio wa Ngai-Mûnene nîkî na ûkethîrwa ûrî mûthenya wa nduma na tî wa ûtheri.

¹⁹ Nîta mûndû akîûra nî mûnyambû agacoka agatûngwa nî ngatûnyi, kana atonyete nyomba na agetira rûthingorî na njara îkarûmwa nî njoka.

²⁰ Mûthenya wa Ngai-Mûnene ûkethîrwa ûrî wa nduma na tî wa ûtheri. Ûkethîrwa ûrî mûthenya wa kîeva ûtarî na gîkeno.”

²¹ Ngai-Mûnene arauga atîrî, “Nîmenete na nganyarara irugo cienyu, na ndikenagua nî ciûngano cienyu cia ndini.

²² Wana mwandutîra matega ma kûvîvua na matega ma irio cia mîgûnda ndikaametîkîra. Na ndigetîkîra matega menyu ma thayû ma nyamû irîa noru.

²³ Nthengutîriani înegene rîa nyîmbo cienyu; ndirenda kûthikîrîria mîgambo ya ngita cienyu.

²⁴ Vandû va ûguo, tiga kîvooto kînyûrûrûkage ta karûnjî, na ûthingu ûnyûrûkage ta rûnjî rûtavûcaga.

²⁵ “Mue andû a Isiraeli, rîrîa mwarî werûrî mîaka mîrongo îna nîmwandutagîra magongoona?

²⁶ Mue nîmûgaakuua mûvuanano wa Sakuthi mûthamaki wenyu, na mûvuanano wa ngai yenyu ya njata, indo irîa mue mwerûthîrîte.

²⁷ Kwoguo nîngaamûvira îthamîriorî vûrûri ûrî kûraca na Damesiki.” Ûguo nîguo Ngai-Mûnene, ûrîa wîtagwa Ngai mwene vinya wonthe arauga.