Amosi 4 - ÎVUKU RÎA ÛVORO MWARO

¹ Tathikîrîriani kiugo gîkî, mue aka a Samaria mue mûnorete ta ng'ombe cia Bashani irîa ndîthie waro mûno. Mûnyamaragia athîni na mûkavinyîrîria arîa matarî kîndû na mûkera arûme enyu mamûretere ndivei mûnyue!

² Nie Ngai-Mûnene ûrîa mûtheru nînîreranîra na mwîvîtwa atî, “Mîthenya nîgûkinya rîrîa andû makaamûkururia muonthe na mbogoro; mûgeekara ta nthamaki inyitîtwe na ndûano.

³ Mûgakururua nginya kûrîa kûrî na mîanya rûthingorî mwikue na nja. Ûguo nîguo Ngai-Mûnene arauga.”

Isiraeli nîmaaregire kwîrûnga

⁴ Ngai-Mûnene arauga atîrî, “Andû a Isiraeli thiîni Betheli mûkevie na mûthiî Giligali mwîvie mûno. Viragani magongoona menyu wa kîraûko na mûvirage gîcunjî gîa îkûmi vuva wa mîthenya îthatû.

⁵ Rutagani îgongoona rîa gûcokia ngatho kûrî Ngai rîa mûgate ûtarî na ndawa ya kwimbia, na mwîtîîage nîûndû wa matega ma kwîyendera marîa mûrutaga. Ûguo nîguo Ngai-Mûnene arauga.

⁶ Nînie natûmire kûgîe na yûra matûûrarî menyu monthe nwatî mûtianjokerera.

⁷ Nînagiririe mbura yure rîrîa mwamîvatarîte mûno. Nînatûmire mbura yure îtûûrarî rîmwe nwatî ngîgiria yure îtûûrarî rîu rîngî. Mbura yauraga mûgûndarî ûmwe nwatî mûgûnda ûcio wîngî ûkaûmagara.

⁸ Nîûndû wa nyonda andû kuuma matûûrarî meengî nîmaathiîcaga îtûûrarî rîrîa meeciragia atî nîmakwona manjî, nwatî gûtiarî na manjî ma kwîgana. Kûnarî ûguo mûtianjokerera.

⁹ “Nînamûverithirie na kûmûvîvîria mîmera na ndavaîki. Mîgûnda yenyu yonthe ya irio wana ya mûthavibu wana mîtî yenyu îrîa îkethagwa ngûyû na ndamaiyû nîyarîrwe nî ngige. Kûnarî ûguo nîmwaregire kûnjokerera.

¹⁰ Nînamûretithîrie mûthiro ta ûrîa naretere andû a Misiri, nînaûragire anake enyu a mbaara na ngîoca mbarathi cienyu. Nînatûmire kûrîa mwambîte magema kûgîe na mûnungo wa ciimba, nwatî kûnarî ûguo mûtianjokerera.

¹¹ Nînacûkangirie amwe enyu wata ûrîa nacûkangirie Sodomu na Gomora. Arîa mwatigarire mwekariî ta gîcinga Kîam mwaki kîtharîtwe kuuma mwakirî. Kûnarî ûguo mûtianjokerera.

¹² Kwoguo mue andû a Isiraeli nîngûmûverithia. Na nîûndû nîngûmûverithia, îîvarîrieni îtuîro rîakwa.”

¹³ Ngai nîke waûmbire irîma na akîûmba mvuvo. Nîke ûmenyithagia mûndû meciria make, na nîke ûtûmaga mûthenya ûtuîke ûtukû. Athiîcagîrîra nthî kûrîa gûtûgîru. Rîîtwa rîake nî Ngai-Mûnene, Mwene vinya wonthe.