Amosi 3 - ÎVUKU RÎA ÛVORO MWARO

¹ Mue andû a Isiraeli, tathikîrîriani ndûmîrîri îrîa Ngai-Mûnene arîtie îmwîgiî mue arîa onthe aarutire vûrûri wa Misiri.

² Gatagatî ka mavûrûri monthe ma nthî, mue nwa mue mbîcî. Kwoguo nîngûmûverithia nîûndû wa mavîtia menyu monthe:

³ Andû aîrî nwa mathiî rûgendo matarîkanîrîte?

⁴ Mûnyambû nwa ûrarame mûtitûrî ûtarî mûragu kîndû? Kaana ka mûnyambû nwa kararame karî kîmamorî gîa ko gatarî na kîndû kanyitîte?

⁵ Gaconi nwa kagwe mûtegorî ûtarî mûtege? Mûtego nwa ûviûke ûtagwatîtie kîndû?

⁶ Karumbeta ka mbaara nwa kavuvwe îtûûrarî na andû makarega gwîtigîra? Îtûûra nwa rînyitwe nî mûthiro tiga Ngai-Mûnene aûrekereretie?

⁷ Nama gûtirî ûndû Ngai-Mûnene Mwene Vinya wonthe ekaga, ataûguûrîrîtie arathi ndungata ciake.

⁸ Rîrîa mûnyambû wararama, nî ûrîkû ûtangîtigîra? Rîrîa Ngai-Mûnene aaria, nû ûngîrega kwanîrîra ndûmîrîri yake?

Kûthirua gwa Samaria

⁹ Anîrîrani mûrî nyombarî cia athamaki irîa irî Ashidodi wana mwanîrîre mûrî nyombarî cia anene îgûrû mûrî Misiri muge atîrî, “Gomanani irîmarî cia Samaria na mwone kîthigithigi kîrîa kîrî kuo, wana ûvinyanîrîria ûrîa ûrî kuo.”

¹⁰ Ngai-Mûnene arauga atîrî, “Maigaga indo irîa maîîte na macunanîte na vinya nyombarî ciao. Kwoguo matimenyaga gwîka maûndû marîa magîrîru.

¹¹ Nthû nîikaarigicîria vûrûri na kûrîa kûgitîre kûthirwe vinya na nthingo irîa cirigîrîte matûûra menyu ciomomorangwe.”

¹² Ngai-Mûnene arauga atîrî, “Wata ûrîa mûrîthi atethûraga magûrû maîrî, kana kînuku Kîam gûtû kwa ng'ondu kuuma kanyuarî ka mûnyambû, nwa guo andû a Isiraeli arîa matûûraga Samaria magatethûrwa, arîa rîu mamamagîra itanda mbaro na nguo cia goro.”

¹³ Ngai-Mûnene Mwene vinya wonthe arauga atîrî, “Thikîrîriani na mûgakaanie njiarwa cia Jakovu.

¹⁴ Mûthenya ûrîa ngaaverithia andû Isiraeli nîûndû wa mevia mao na njûkangie metha cia kîgongoona cia Betheli, nîngaatemanga mvîa cia metha cionthe cia magongoona nîigwîthie nthî.

¹⁵ Nîngaacûkangia nyomba irîa ciîkaragwa vîndî ya mvevo na vîndî ya riûa na nyomomore nyomba irîa ng'emie na mîguongo. Gûtirî nyomba wanarî îmwe ya icio nene îgaatigara.” Ûguo nîguo nie Ngai-Mûnene mbugîte.