Amosi 2 - ÎVUKU RÎA ÛVORO MWARO

Moabu

¹ Ngai-Mûnene arauga atîrî, “Andû a Moabu matûûraga mevagia, kwoguo ndigaatiga kûmaverithia, nîûndû nîmaregete kûva mûthamaki wa Edomu ûrîa wakuire gîtîîo, na njîra ya kûvîvia mavîndî make magatuîka mûu.

² Kwoguo nîngaatûma mwaki îtûûrarî rîa Moabu, ûcûkangie kûndû kûrîa kûgitîre îtûûrarî rîa Keriothi. Rîrîa athigari a mbaara makaugîrîria na mavuve tûrumbeta, andû a Moabu nîmagaakua.

³ Nîngaûraga mûthamaki wa Moabu, na atongoria onthe a vûrûri wao.”

Juda

⁴ Ngai mûnene arauga atîrî, “Andû a Juda matûûraga mevagia, kwoguo ndigaatiga kûmaverithia. Nîmareganîte na watho wa Ngai-Mûnene, na marega kwathîkîra mawatho make. Nîmavîtithîtue nî ngai irîa methe mao maagoocaga.

⁵ Kwoguo nîngaatûma mwaki vûrûrirî wa Juda, na ûcûkangie kûndû kûrîa kûgitîre îtûûrarî rîa Jerusalemu.”

Îtuîro rîa Ngai kûrî andû a Isiraeli

⁶ Ngai-Mûnene arauga atîrî, “Andû a Isiraeli matûûraga mevagia, kwoguo ndigaatiga kûmaverithia, nîûndû mendetie andû arîa athingu sîlûva, na makendia athîni mavewe iratû.

⁷ Nîmaanyamaririe arîa matarî vinya, na makaregana na kîvooto Kîam athîni. Mûndû na îthe mamenyanaga kîîmwîrî na mwîrîtu ûmwe ngombo, kwoguo nîmatûmaga rîîtwa rîakwa rîtheru rîgîe na mûgiro.

⁸ Mamamaga vakuvî na metha ya kîgongoona, na makamamîra nguo irîa macunîte athîni nîguo irûngamîrîre thirî wao. Manyunyagîra ndivei hekarûrî ya Ngai wao, îrîa matavîte andû maremwa nî kûrîva mathiirî.

⁹ “Kûnarî ûguo, mue andû akwa, nînathiririe Aamori viû nîûndû wenyu, arîa maaracavîte ta mîtarakwe, na maarî na vinya ta mîtî ya mîvuru, na nînacûkangirie mvûa vamwe na mîri.

¹⁰ Nînacokire ngîmûruta vûrûri wa Misiri, ngîmûtongoria werûrî mîaka mîrongo îna, nîguo mûkegwatîre vûrûri wa Amori.

¹¹ Nînathuurire andû amwe a njiarwa cienyu matuîke arathi, na anake amwe enyu matuîke Anazari. Kinthî ûcio tî ûvoro wa ma mue andû a Isiraeli? Ûguo nîguo Ngai-Mûnene arauga.

¹² Nwatî nîmwatûmire Anazari manyue ndivei, na makîatha arathi matikarathe.

¹³ Taroria, nîngamûkinyangîra nthî, ta ûrîa ngari îkuîte maketha yomomoraga nthî.

¹⁴ Andû arîa marî îvenya mûno matikoona gwa kûûrîra, andû arîa marî vinya mwîngî nîmakaathirwa nî vinya, na athigari matikaavota kûvonokia mîoyo yao.

¹⁵ Andû arîa makuuaga moota matigetirîria, nao arîa marî îvenya mûno matikevonokia, wana arîa mathiîcaga mekarîrîte mbarathi matikavonokia mîoyo yao.

¹⁶ Mûthenya ûcio mûndû ûrîa mûmîrîru mûno akaûra arî njaga.” Ûguo nîguo nie Ngai-Mûnene mbugîte.