Amosi 1 - ÎVUKU RÎA ÛVORO MWARO

Mûrathi Amosi

¹ Ino nîcio ciugo cia Amosi. Amosi aarî ûmwe wa arîthi a kuuma îtûûra rîa Tekoa. Mîaka îîrî mbere ya kîthingithia, rîrîa Uzia aarî mûthamaki wa Juda, na Jeroboamu mûvîcî wa Joashi arî mûthamaki wa Isiraeli, Ngai nîwaguûrîrie Amosi maûndû mama megiî Isiraeli.

² Amosi nîwaugire atîrî, Ngai-Mûnene nîararama arî kîrîmarî gîa Zayuni; na akaruruma arî Jerusalemu, wana nyaki ya arîthi nîraûma. Nyaki îrîa îrî kîrîmarî gîa Karimeli nîîravova.

Ngai nîwatuîrîre mavûrûri marîa maariganîtie na Isiraeli Damesiki

³ Ngai-Mûnene arauga atîrî, Andû a Damesiki nîmevîtie rîngî wana rîngî, kwoguo ndigatiga kûmaverithia. Nîmeekire andû a Gileadi ûndû mûcûku mûno, ta ngano ikîthîwa na gîkaari gîa cuuma.

⁴ Kwoguo nîngaatûma mwaki kûrî nyomba ya Hazaeli, na nîûgacûkangia kûndû kûrîa kûgitîre kwa mûthamaki Benihadadi.

⁵ Nîngaaunanga ivingo cia îtûûra rîa Damesiki, na njûkangie arîa matûûraga Kîamndarî Kîam Aveni, na ûrîa wathanaga Bethedeni; na andû a Sîria nîmakaathiî îthamîriorî. Ûguo nîguo Ngai-Mûnene arauga.

Filisiti

⁶ Ngai-Mûnene arauga atîrî, “Andû a Gaza matûûraga mevagia, kwoguo ndigaatiga kûmaverithia, nîmaavirire andû onthe Edomu, makîmendia kuo matûûre marî ngombo.

⁷ Kwoguo nîngaatûma mwaki nthingorî cia Gaza, naguo nîûgacûkangia matûûra monthe marîa mairigîre.

⁸ Nîngaathengutia andû arîa matûûraga Ashidodi, mverithie mûnene wa Ashikeroni. Nîngaaverithia îtûûra rîa Ekironi, na Afilisiti onthe arîa maatigarîte nîmagaakua.”

Turo

⁹ Ngai-Mûnene arauga atîrî, “Andû a îtûûra rîa Turo matûûraga mevagia, kwoguo ndigatiga kûmaverithia. Nîmoocire vûrûri wonthe na makîûvira îthamîriorî Edomu. Nîmaaunire kîrîkanîro Kîam thayû kîrîa maarûthîte.

¹⁰ Kwoguo nîngaatûma mwaki ûvîvie nthingo cia Turo, na ûcûkangie kûndû kûrîa kûgitîre.”

Edomu

¹¹ Ngai mûnene arauga atîrî, “Andû a îtûûra rîa Edomu matûûraga mevagia, kwoguo ndigaatiga kûmaverithia. Nîmaarûmîrîrie aa mûrwang'ina andû a Isiraeli na mviû, marî aa mûrwang'ina matiameguîra ntha, marakara mao kûrî o matiarî na kîthimi.

¹² Kwoguo nîngaatûma mwaki îtûûrarî rîa Temani, naguo nîûkaavîvia kûrîa kûgitîre îtûûrarî rîa Bozira.”

Amoni

¹³ Ngai-Mûnene arauga atîrî, “Andû a Amoni matûûraga mevagia, kwoguo ndigatiga kûmaverithia. Rîrîa maarûaga nîguo mararamie mîvaka yao, nîmaatarûrire aka a Gileadi marî mavu.

¹⁴ Kwoguo nîngaatûma mwaki wakane rûthingorî rwa Raba, na ûcûkangie kûrîa kûgitîre îtûûrarî rîu. Mûthenya wa mbaara nîgûkaagîa na înegene rînene, nayo mbaara nîîkaneneva ta kîvuvûkanio kînene.

¹⁵ Mûthamaki wao nîakaathiî îthamîriorî, vamwe na atongoria ake. Ûguo nîguo nie Ngai-Mûnene mbugîte.”