Alawi 9 - ÎVUKU RÎA ÛVORO MWARO

Athînjîri-Ngai nîmaambîrîrie wîra wao

¹ Mûthenya wa kanana Musa nîwetire Aroni na avîcî ake vamwe na athuuri a Isiraeli,

² na akîra Aroni atîrî, “Oca ndegwa îtarî ngûrû ya îtega rîa kûtheria mevia na ndûrûme ya îtega rîa kûvîvua; cioîrî ciîthîrwe itarî na wonje na ûirutîre Ngai-Mûnene.

³ Ûcoke wîre andû a Isiraeli moce nthenge ya îtega rîa kûtheria mevia, njaû na ng'ondu itarî na wonje cia îtega rîa kûvîvua; wa îmwe îthîrwe îrî na ûkûrû wa mwaka ûmwe,

⁴ ndegwa na ndûrûme cia îtega rîa thayû. Marutîre Ngai-Mûnene indo icio vamwe na matega ma irio cia mûgûnda itukanîtue na maguta nîûndû Ngai-Mûnene nîakûmaumîrîra ûmûnthî.”

⁵ Andû nîmaavirire mûromorî wa îgema rîa Ngai-Mûnene nyamû irîa Musa aathanîte, nao andû onthe a Isiraeli nîmaaûnganire vo nîguo magooce Ngai-Mûnene.

⁶ Musa nîwerire andû atîrî, “Ngai-Mûnene amwathîte mûvingie maûndû mau monthe nîguo riiri wake ûmumîrîre.”

⁷ Nîwacokire akîra Aroni atîrî, “Thiî metharî ya kîgongoona na ûrute îtega rîa kûvîvua na rîa kûtheria mevia maku na ma andû a nyomba yaku. Ûcoke ûrute îtega rîa kûtheria mevia ma andû onthe wata ûrîa Ngai-Mûnene athanîte.”

⁸ Kwoguo Aroni nîwathiîre metharî ya kîgongoona na akîûraga ndegwa îtaarî ngûrû ya kûtheria mevia make ke mwene.

⁹ Avîcî ake nîmaamûvirîre nthakame na agîtovokia Kîamra gîake nthakamerî îo. Nîwekîrire nthakame îmwe mîenarî ya metha ya kîgongoona îrîa yaumîrîte ta mvîa, agîcoka agîtûrûra îo îngî vau nthî ya metha ya kîgongoona.

¹⁰ Nwatî mathunya ma îtega rîa kûtheria mevia, mbigo cioîrî na gacunjî karîa karo mûno ga îtema nîwaivîvîrie îgûrû rîa metha ya kîgongoona wata ûrîa Ngai-Mûnene aathîte Musa.

¹¹ Nacio nyama na rûûo rwayo nîwaivîvîrie na kûu nja ya kûrîa maatûûraga.

¹² Aroni nîwaûragire nyamû yake ya îtega rîa kûvîvua, nao avîcî ake nîmaamûnengerire nthakame nake akîmîminjaminja mîenarî yonthe ya metha ya kîgongoona.

¹³ Nîmaamûnengerire kîongo vamwe na tûcunjî tûu twîngî na akîivîvîria îgûrû rîa metha ya kîgongoona.

¹⁴ Nîwacokire akîthambia nyama cia nda na magûrû ma vuva na akîivîvîria îgûrû rîa metha ya kîgongoona vamwe na matega mau mengî ma kûvîvua.

¹⁵ Vuva wa ûguo Aroni nîwarutire îtega rîa andû. Nîwocire mbûri îrîa yarî ya îtega rîa kûtheria mevia ma andû, akîmîûraga na akîmîruta wata ûrîa eekîte na îtega rîa mbere rîa kûtheria mevia make ke mwene.

¹⁶ Nîwacokire akîvira ndegwa na ndûrûme ya îtega rîa kûvîvua na akîiruta wata ûrîa watho ugîte.

¹⁷ Nîwacokire akîvira îtega rîa irio cia mûgûnda, agîkumbata ngundi îmwe îcûrîte na akîivîvîria îgûrû rîa metha ya kîgongoona vamwe na matega marîa maarutagwa iraûko cionthe.

¹⁸ Aroni nîwaûragire ndegwa na ndûrûme cia îtega rîa thayû rîa andû. Avîcî ake nîmaamûvirîre nthakame yacio na akîmîminjaminja mîenarî yonthe ya metha ya kîgongoona.

¹⁹ Aroni nîwocire mathunya ma ndegwa na ma ndûrûme: kînyanya, mathunya marîa marigicîrîtie nyama cia nda, mbigo cioîrî, na gacunjî karîa karo mûno ga îtema,

²⁰ agîcigîrîra ithûrirî cia nyamû icio na akîivîvîria îgûrû rîa metha ya kîgongoona.

²¹ Nwatî Aroni nîwarutîre Ngai-Mûnene ithûri vamwe na magûrû ma ûrîo ma vuva kîrî kîveo Kîam mwanya kûrî athînjîri-Ngai, wata ûrîa Musa aathanîte.

²² Rîrîa Aroni aarîkirie kûruta magongoona monthe, nîwaûkîrîrie njara ciake erekerete andû na akîmarathima. Nîwacokire akiuma varîa metha ya kîgongoona yarî.

²³ Musa na Aroni nîmaatonyire îgemarî rîa Ngai-Mûnene, na rîrîa maaumire kuo, nîmaarathimire andû naguo riiri wa Ngai-Mûnene nîwaumîrîre andû onthe.

²⁴ Wa rîmwe mwaki nîwaumire kûrî Ngai-Mûnene na ûkîvîvia îtega rîa kûvîvua vamwe na mathunya marîa maarî îgûrû rîa metha ya kîgongoona. Rîrîa andû onthe a Isiraeli moonire ûguo, nîmaaugîrîrie marî na gîkeno na makînamîrîria mothiû mao nthî.