Alawi 8 - ÎVUKU RÎA ÛVORO MWARO

Kwamûrwa kwa Aroni na avîcî ake

¹ Ngai-Mûnene nîwerire Musa atîrî,

² “Oca Aroni na avîcî ake mûthiî nao mûromorî wa îgema rîakwa na ûthiî na nguo cia ûthînjîri-Ngai, maguta ma kwamûrana, ndegwa ya îtega rîa kûtheria wîvia, ndûrûme ciîrî, na gîkavu kîrî na mîgate îtarî mîkîre ndawa ya kwimbia.

³ Ûcoke wîre andû onthe maûngane vamwe vau mûromorî wa îgema rîakwa.”

⁴ Musa nîwekire wata ûrîa Ngai-Mûnene aamwathîte, na andû onthe nîmaaûnganire vamwe vau mûromorî wa îgema rîa Ngai-Mûnene.

⁵ Musa nîwerire andû atîrî, “Maûndû mama nîrenda gwîka nî marîa Ngai-Mûnene athanîte mekwe.”

⁶ Nîwacokire akîra Aroni na avîcî ake mathiî vau mbere ya andû na akîmeera methambie.

⁷ Musa nîwekîrire Aroni nguo ndaca na akîmûova mûcivi kiunorî na akîmwîkîra kîthiri. Nîwamwîkîrire efodi na akîmûova kîûnûrî na mûcivi wa efodi îo.

⁸ Nîwamwîkîrire nguo ya kîthûri na agîkîra Urimu na Thumimu ndaarî yayo.

⁹ Nîwamwovire kîremba kîongorî na mwena wa mbere wakîo agîgîkîra kavengere ka thaavu katheru, rûrî rûûri rwa kwonania atî nîwamûrwa, wata ûrîa Ngai-Mûnene aamwathîte.

¹⁰ Musa nîwocire maguta ma kwamûrana na akîvaka îgema rîa Ngai-Mûnene vamwe na indo cionthe irîa ciarî ndaarî. Ûguo nîguo aamûrîîre Ngai-Mûnene indo icio cionthe.

¹¹ Nîwocire maguta mamwe na akîmaminjaminja maita mûgwanja îgûrû rîa metha ya kîgongoona vamwe na karaî na varîa kaaigagîrîrwa, nîguo aciamûrîre Ngai-Mûnene.

¹² Nîwetîrîrie Aroni maguta kîongorî gîake na akîmwamûra.

¹³ Musa nîwacokire akîra avîcî a Aroni maumîre vau mbere na akîmekîra nguo, akîmova mîcivi ciûnorî ciao, na akîmova itambaa ciongorî ciao, wata ûrîa Ngai-Mûnene aathanîte.

¹⁴ Nîwacokire akîvira ndegwa ya îtega rîa kûtheria wîvia, na Aroni vamwe na avîcî ake nîmaaigîrîre njara ciao kîongorî Kîamyo.

¹⁵ Musa nîwaûragire ndegwa îo agîcoka agîoca nthakame îmwe yayo agîtovokia Kîamra gîake kuo na akîmîvaka mîenarî ya metha ya kîgongoona îrîa yaumîrîte ta mvîa. Nîwacokire agîtûrûra nthakame îo îngî vau nthî ya metha ya kîgongoona. Ûguo nîguo aatheririe metha îo ya kîgongoona na akîmîamûra.

¹⁶ Vuva wa ûguo, Musa nîwocire mathunya monthe marîa maarî nyamarî cia nda, gacunjî karîa karo mûno ga îtema, mbigo cioîrî vamwe na mathunya marîa maairigicîrîtie na akîivîvîria îgûrû rîa metha ya kîgongoona cionthe.

¹⁷ Nîwocire nyama icio ciîngî cia ndegwa îo, rûûo rwayo vamwe na mara na akîivîvîria nja ya kûu maatûûraga, wata ûrîa Ngai-Mûnene aathanîte.

¹⁸ Musa nîwacokire akîvira ndûrûme ya îtega rîa kûvîvua, nake Aroni na avîcî ake makigîrîra njara ciao kîongorî Kîamyo.

¹⁹ Musa nîwamîûragire na akîminjaminja nthakame yayo mîenarî yonthe ya metha ya kîgongoona.

²⁰ Nîwatinangirie ndûrûme îo icunjî, na akîvîvia kîongo, icunjî icio na mathunya.

²¹ Nîwacokire akîthambia nyama cia nda vamwe na magûrû ma vuva, na akîvîvîria nyama cionthe îgûrû rîa metha ya kîgongoona rîrî îtega rîa kûvîvua, wata ûrîa Ngai-Mûnene aathanîte. Naguo mûtararûko wa rîo nîwakenirie Ngai-Mûnene.

²² Musa nîwacokire akîvira ndûrûme îo îngî ya îtega nîûndû wa kwamûrwa kwa athînjîri-Ngai. Nake Aroni na avîcî ake nîmaaigîrîre njara ciao kîongorî Kîamyo.

²³ Musa nîwamîûragire na agîoca nthakame îmwe yayo na akîmîvaka mûthiiarî wa gûtû kwa ûrîo kwa Aroni mwena wa nthî, na mûthiiarî wa Kîamra kîrîa kînene Kîam njara yake ya ûrîo na mûthiiarî wa Kîamra kîrîa kînene gîa kûgûrû gwake kwa ûrîo.

²⁴ Vuva wa ûguo, Musa nîwerire avîcî a Aroni maumîre vau mbere na nîwamavakire nthakame îmwe mîthiiarî ya matû mao ma ûrîo na mîthiiarî ya ciara irîa nene cia njara ciao cia ûrîo wana mîthiiarî ya ciara irîa nene cia magûrû mao ma ûrîo. Musa nîwacokire akîminjaminja nthakame îo îngî mîenarî yonthe ya metha ya kîgongoona.

²⁵ Nîwocire mathunya, kînyanya, maguta monthe marîa maarigicîrîtie mara, gacunjî karîa karo mûno ga îtema, mbigo cioîrî na mathunya marîa maairigicîrîtie, vamwe na Kîamû Kîam ûrîo gîa kûgûrû kwa vuva.

²⁶ Nîwacokire agîoca mûgate ûmwe kuuma gîkavurî kîrîa gîekîrîtwe mîgate îrîa yamûrîrîtwe Ngai-Mûnene îtarî mîkîre ndawa ya kwimbia, mûgate ûmwe ûrî na maguta, na kamûgate kamwe gaceke na agîcigîrîra îgûrû rîa mathunya mau na Kîamû kîu Kîam ûrîo gîa kûgûrû kwa vuva.

²⁷ Nîwanenganîre indo icio cionthe kûrî Aroni na avîcî ake, nao nîmaairutîre Ngai-Mûnene kîrî kîveo Kîam mwanya.

²⁸ Musa nîwacokire agîoca indo icio kuuma kûrî Aroni na avîcî ake na akîivîvîria îgûrû rîa metha ya kîgongoona vamwe na îtega rîa kûvîvua. Rîu nîrîo rîarî îtega rîa kwamûrana, na mûtararûko warîo nîûkenagia Ngai-Mûnene; nî îtega rîa kûvîvua na mwaki.

²⁹ Nîwacokire agîoca kîthûri na agîkîrutîra Ngai-Mûnene kîrî kîveo Kîam mwanya. Kau nîko kaarî gacunjî ka Musa ka ndûrûme îo ya îtega rîa kwamûrwa kwa andû. Musa eekire wa ûrîa Ngai-Mûnene aamwathîte eke.

³⁰ Vuva wa ûguo, Musa nîwocire maguta mamwe marîa matheru na nthakame îmwe îrîa yarî îgûrû rîa metha ya kîgongoona na akîminjaminjîria Aroni na avîcî ake wa vamwe na nguo ciao. Ûguo nîguo aamûrire andû acio vamwe na nguo ciao.

³¹ Musa nîwacokire akîra Aroni na avîcî ake atîrî, “Ocani nyama icio mûthiî nacio mûromorî wa îgema rîa Ngai-Mûnene, mûirugîre vo na mûirîre vo vamwe na mûgate ûrîa ûrî gîkavurî Kîam matega ma kwamûrana wata ûrîa Ngai-Mûnene athanîte.

³² Nacio nyama na mîgate îrîa îgaatigara mûkaavîvia.

³³ Nwanginya mûgeekara vau mûromorî wa îgema rîa Ngai-Mûnene îvinda rîa mîthenya mûgwanja, nginya rîrîa mambura ma kwamûrwa kwenyu makaathira, nîûndû kwamûrwa kwenyu gûkaathiria mîthenya mûgwanja.

³⁴ Ngai-Mûnene aambathire mbîke ûguo neka ûmûnthî nîguo mûtherue mevia.

³⁵ Nwanginya mwîkare mûromorî wa îgema rîa Ngai-Mûnene ûtukû na mûthenya îvinda rîa mîthenya mûgwanja mûgîkaga ûrîa Ngai-Mûnene amwathîte nîguo mûtigakue. Ûguo nîguo Ngai-Mûnene ambathîte.”

³⁶ Kwoguo Aroni na avîcî ake nîmeekire maûndû monthe marîa Ngai-Mûnene amaathîte kûvîtûkîrîra kûrî Musa.