Alawi 6 - ÎVUKU RÎA ÛVORO MWARO

¹ Ngai-Mûnene nîwerire Musa atîrî,

² “Mûndû wa wonthe angîvîtîria Ngai-Mûnene na njîra ya kûveenia mûndû ûrîa wîngî na arege kûmûcokeria kîndû kîrîa amwigîrîte, kana kîndû kîrîa amûnengerete nîguo kîrûngamîrîre ûndû, kana aîe kîndû na vinya, kana avinyîrîrie mûndû ûrîa wîngî,

³ kana oce kîndû kîrîa kîraûrîte na evîte atî ke tî mûkîonu, na arute ûira wa maveeni îgûrû rîgiî ûndû wa wonthe wa maûndû marîa andû mekaga makevia,

⁴ mûndû angîka wîvia ûmwe wa mau na amenye atî nîevîtie, nîagaacokia kîrîa aaîîte na njîra ya kûvinyanîrîria, kana kîrîa acunanîte, kana kîndû kîrîa aigîrîte mûndû kana kîndû kîrîa kîûru na agîkîona

⁵ kana kîndû wa kîonthe evîtîrîte na njîra ya maveeni, nwanginya akaagîcokia kîonthe na akîongerere tûcunjî mîrongo îîrî îgûrû rîa îgana.

⁶ Nîakaavirîra mûthînjîri-Ngai ndûrûme îtarî na wonje îrî îtega rîa kûthiria mavîtia make kûrî Ngai-Mûnene. Naguo mwîgana wa thogora wayo wîthîrwe ûrî wa kîthimi kîrîa gîtîkîrîku.

⁷ Mûthînjîri-Ngai nîakaaruta îgongoona rîa kûtheria wîvia wa mûndû ûcio, na mûndû ûcio nîakooverwa.”

Matega ma kûvîvua

⁸ Ngai-Mûnene nîwathire Musa atîrî,

⁹ “Îra Aroni na avîcî ake mawatho megiî matega ma kûvîvua. Namo nî atî: îtega rîa kûvîvua rîgaatigagwa îgûrû rîa metha ya kîgongoona rîkîvîvagua nî mwaki ûtukû wonthe.

¹⁰ Mûthînjîri-Ngai nîagekîra nguo yake ndaca na thuruvarî acoke oce mûu ûrîa ûgaatigara îgûrû rîa metha ya kîgongoona matega ma kûvîvua marîkia kûvîa na awige mwenarî wa metha ya kîgongoona.

¹¹ Nî agaacoka arute nguo icio ekîre ciîngî na akuue mûu ûcio na aûvire vandû varîa vatherie na kûu nja ya kûrîa matûûraga.

¹² Mwaki ûcio wa kûvîvia matega îgûrû rîa metha ya kîgongoona nwanginya wîkarage ûgîakanaga na ndûkarekwe ûvora. Mûthînjîri-Ngai nwanginya ongagîrîre ngû mwakirî ûcio iraûko cionthe, akavanga waro matega ma kûvîvua îgûrû rîacio na akavîvîria mathunya ma îtega rîa thayû vo.

¹³ Mwaki ûcio nwanginya wîkarage ûgîakanaga vîndî cionthe îgûrû rîa metha ya kîgongoona na ndûkarekwe ûvora.

Matega ma irio cia mûgûnda

¹⁴ “Mama nîmo mawatho megiî matega ma irio cia mûgûnda. Ûmwe wa athînjîri-Ngai a mbarî ya Aroni nîakaarutîra Ngai-Mûnene matega ma irio cia mûgûnda vau mbere ya metha ya kîgongoona.

¹⁵ Mûthînjîri-Ngai ûcio nî agaakumbata ngundi ya mûtu ûrîa mwaro mûno, oce maguta na ûbani na aivîvîrie îgûrû rîa metha ya kîgongoona kîrî kîririkania, atî matega mau monthe marutîrîtwe Ngai-Mûnene. Mûtararûko wa îtega rîu nîûkenagia Ngai-Mûnene.

¹⁶ Mûtu ûcio wîngî ûkaarîwa nî Aroni na avîcî ake. Ûkaarîrwa vandûrî varîa vatheru, na nîvo nja ya îgema rîa Ngai-Mûnene, ûtekîrîtwe ndawa ya kwimbia.

¹⁷ Ndûkaarugwa wîkîrîtwe ndawa ya kwimbia. Nîmavete guo ûrî gacunjî gakwa ka matega makwa ma kûvîvua. Nî katheru mûno ta îtega rîa kûtheria wîvia na ta îtega rîa kûthiria mavîtia.

¹⁸ Mûndûmûrûme wa wonthe wa rûciaro rwa Aroni nwa arîe mûtu ûcio ûrî gîcunjî kîrîa magîrîrwe nî kûvecagwa kuuma kûrî irio irîa itegeretwe Ngai-Mûnene. Mûndû wîngî wa wonthe ûrîa ûkaavutia matega mau nîagaatuîka mûtheru.”

¹⁹ Ngai-Mûnene nîwerire Musa atîrî,

²⁰ “Îtega rîrîa Aroni na avîcî ake makaandutagîra vîndî îrîa makwamûrwa nî: kilo îmwe ya mûtu (mwîgana wa matega ma irio cia mûgûnda ma wa mûthenya). Akaaruta nuthu kilo ya mûtu ûcio kîraûko, nayo nuthu kilo îo îngî amîrute kîvwaî.

²¹ Mûtu ûcio nî ûgaatukanua na maguta, ûrugwe na karaî, wenyûrangwe ûcoke ûrutîrwe Ngai-Mûnene rîrî îtega rîa irio cia mûgûnda. Mûtararûko wa îtega rîu nîûkenagia Ngai-Mûnene.

²² Vîndî cionthe mwanake wa wonthe ûrîa ûgaatungata arî Mûthînjîri-Ngai Mûnene kuuma rûciarorî rwa Aroni nî akaaruta îtega rîu na nî rîkaavîvua rîonthe. Rîu nî rîathani rîa tene na tene.

²³ Îtega rîonthe rîa irio cia mûgûnda rîrîa mûthînjîri-Ngai akaarutaga rîkaavîvagua rîonthe; rîtikaarîwa.”

Matega mengî ma kûtheria mevia matarî ma kwîyendera

²⁴ Ngai-Mûnene nîwerire Musa atîrî,

²⁵ “Îra Aroni na avîcî ake mawatho megiî matega ma kûtheria mevia. Namo nî atî: nyamû ya îtega rîa kûtheria mevia îkaaûragagîrwa îgemarî rîa Ngai-Mûnene varîa nyamû cia matega ma kûvîvua ciûragagîrwa. Rîu nî îtega rîtheru mûno.

²⁶ Mûthînjîri-Ngai ûrîa ûkaaruta nyamû îo akaamîrîra vandûrî varîa vatheru, na vau nja ya îgema rîa Ngai-Mûnene.

²⁷ Mûndû wa wonthe kana kîndû wa kîonthe kîngîvutia nyama cia nyamû îo nîgîgaatuîka kîtheru. Nguo ciao ingîminjûkîrwa nî nthakame ya nyamû îo, nwanginya ikaathambîrua vandûrî varîa vatheru.

²⁸ Nyûngû ya yûmba îrîa îkaaruga nyama icio nwanginya îkaaûragwa, na ethîrwa nî nyûngû ya cuuma ya gîcango îkaaruga, nwanginya îkaathûwa na îkamûrûe na manjî.

²⁹ Mûndûmûrûme wa wonthe wa mbarî ya athînjîri-Ngai nwa arîe nyama icio. Nî ntheru mûno.

³⁰ Nwatî ethîrwa kûrî nthakame wa yonthe îkaavirwa îgemarî rîa Ngai-Mûnene îrî ya gûtûmîrwa kûtheria mevia, nyamû îrîa yumîte nthakame îo ndîagîrîrwe nî kûrîwa, nwanginya îkaavîvua.”