Alawi 5 - ÎVUKU RÎA ÛVORO MWARO

Andû arîa magîrîrwe nî kûruta matega ma kûtheria mevia

¹ Ethîrwa mûndû wa wonthe nîetîtwe akavecane ûira îgootirî na arege kûvecana ûvoro wîgiî ûndû ûrîa onete kana eguîte, nwanginya akaaverithua nîûndû wa mavîtia make.

² Ethîrwa mûndû wa wonthe nwa avutie kîndû wa kîonthe kîrî mûgiro, ta kimba Kîam nyamû ya kîthaka kana ya kûrîthua kana kîgunyû atakûmenya, akeethîrwa arî na mûgiro na arî na mavîtia.

³ Ethîrwa mûndû nwa anyite kîndû wa kîonthe kîrî mûgiro kiumanîte na mûndû atakûmenya, wana ethîrwa kîrî ndûî, akeethîrwa arî na mavîtia vîndî îrîa akaamenya ûrîa ekîte.

⁴ Ethîrwa mûndû wa wonthe nîevîtîte atî nîagwîka ûndû mwaro kana ûndû mûcûku ta ûrîa andû mekaga matambîte gwîciiria, rîrîa akaamenya ûndû ûcio akeethîrwa arî na mavîtia.

⁵ Rîrîa mûndû arî mûvîtiu na njîra ya gwîka ûmwe wa mau, nwanginya akaaumbûra wîvia ûrîa ekîte.

⁶ Nîakaarutîra Ngai-Mûnene îtega rîa kûtheria wîvia ûrîa ekîte, narîo îtega rîu rîkeethîrwa rîrî rîa mwatî kana nthenge. Nake mûthînjîri-Ngai nîakaaruta îgongoona nîûndû wa kûtheria wîvia wa mûndû ûcio na nîakooverwa.

⁷ Nwatî ethîrwa mûndû ndangîona ng'ondu kana mbûri, nîakaarutîra Ngai-Mûnene ndutuura igîrî kana macîa maîrî, îmwe îrî îtega rîa kûtheria wîvia, nayo îo îngî îrî îtega rîa kûvîvua.

⁸ Nîakaavirîra mûthînjîri-Ngai iconi icio, nake mûthînjîri-Ngai ambe arute gîconi Kîam mbere nîûndû wa kûtheria wîvia. Nîagaagîtinia ngingo atagûtigithania kîongo na mwîrî ûcio wîngî

⁹ na aminjaminje nthakame îmwe yakîo mîenarî ya metha ya kîgongoona. Nayo nthakame îo îngî îtûrûrwe nî mûthînjîri-Ngai vau nthî ya metha ya kîgongoona. Rîu nîrîo îtega rîa kûtheria wîvia ûtarî wa kwîyendera.

¹⁰ Nîagaacoka arute gîconi kîu kîngî rîrî îtega rîa kûvîvua kûringana na ûrîa watho ugîte. Ûguo nîguo mûthînjîri-Ngai akaaruta îtega rîa kûtheria wîvia wa mûndû ûcio na nîakooverwa.

¹¹ Ethîrwa mûndû ndarî na ndutuura igîrî kana macîa maîrî, nîakaaruta kilo îmwe ya mûtu rîrî îtega rîa kûtheria wîvia wake. Ndakaavira vamwe na maguta kana ûbani nîûndû nî îtega rîa kûtheria wîvia nwatî, tî îtega rîa irio cia mûgûnda.

¹² Nîakaavirîra mûthînjîri-Ngai mûtu ûcio nake mûthînjîri-Ngai nîagaatava mûtu ûcio ngundi îmwe kîrî kîririkania atî mûtu wonthe nîûrutîrîtwe Ngai-Mûnene na aûvîvîrie îgûrû rîa metha ya kîgongoona. Rîu nîrîo îtega rîa kûtheria wîvia.

¹³ Ûguo nîguo mûthînjîri-Ngai akaaruta îgongoona rîa kûtheria wîvia wa mûndû ûcio na mûndû ûcio nî akoverwa. Mûtu ûcio wîngî nî wa mûthînjîri-Ngai, wata ûrîa gwîkagwa na matega ma irio cia mûgûnda.

Matega ma kûthiria wîvia

¹⁴ Ngai-Mûnene nîwerire Musa atîrî,

¹⁵ “Mûndû wa wonthe angîvia atakûmenya na njîra ya kûrega kûruta indo nyamûre irîa irutagîrwa Ngai-Mûnene, nî akaarutîra Ngai-Mûnene mwatî ûtarî na wonje kuuma ndîthiarî yake. Naguo wîthîrwe ûrî na thogora ûrîa ûgaatua wa sîlûva kûringana na kîthimi kîrîa gîtîkîrîku Kîam vandû varîa vatheru.

¹⁶ Nwanginya akaarîva kîrîa ataarîvîte na nwanginya ongerere tûcunjî mîrongo îîrî îgûrû rîa îgana. Nîakaavirîra mûthînjîri-Ngai, nake mûthînjîri-Ngai arute nyamû îo îrî îgongoona rîa kûtheria wîvia wa mûndû ûcio, na mûndû ûcio nîakooverwa.

¹⁷ “Ethîrwa mûndû wa wonthe nwa evie atakwenda na njîra ya kuna rîmwe rîa maathani ma Ngai-Mûnene, mûndû ûcio arî na mavîtia na nwanginya akaaverithua.

¹⁸ Nwanginya akaavirîra mûthînjîri-Ngai ndûrûme îtarî na wonje kuuma ndîthiarî yake îrî îtega rîa kûthiria wîvia. Naguo thogora wayo wîthîrwe ûrî mwîgana wa kîthimi kîrîa gîtîkîrîku. Mûthînjîri-Ngai nîakaaruta îgongoona rîa kûthiria wîvia ûrîa mûndû ûcio ekîte atakûmenya, na mûndû ûcio nîakooverwa.

¹⁹ Rîu nîrîo îtega rîa kûthiria wîvia ûrîa mûndû ûcio evîrîtie Ngai-Mûnene naguo.”