Alawi 4 - ÎVUKU RÎA ÛVORO MWARO

Matega ma kûtheria mevia mekîtwe nî mûndû atakûmenya

¹ Ngai-Mûnene nîwerire Musa atîrî,

² “Îra andû a Isiraeli atî, mûndû wa wonthe angîvia na atakûmenya aune rîathani wanarî rîmwe rîa mama Ngai-Mûnene athanîte, nwanginya arûmîrîre mawatho mama marûmîrîrîte.

³ Ethîrwa nî Mûthînjîri-Ngai wîvîtie, na atûme andû arîa engî manyitwe nî wîvia ûcio, nîakaarutîra Ngai-Mûnene ndegwa îtarî ngûrû na îtarî na wonje îrî îtega rîa kûtheria wîvia wake.

⁴ Akaarete ndegwa îo mûromorî wa îgema rîa Ngai-Mûnene, aigîrîre njara yake kîongorî Kîamyo na amîûrage Ngai-Mûnene akîonaga.

⁵ Nake Mûthînjîri-Ngai Mûnene nîagooca nthakame îmwe ya ndegwa îo na amîtonyie îgemarî rîa Ngai-Mûnene.

⁶ Nî agaacoka atovokie Kîamra gîake nthakamerî na amîminjaminje maita mûgwanja vau mbere ya gîtambaa kîrîa kîvakanîtie vandû varîa vatheru.

⁷ Mûthînjîri-Ngai nîagooca nthakame îmwe na amîvake mîenarî ya metha ya kîgongoona îrîa yumîrîte ta mvîa, ya kûvîvîria ûbani îrîa îrî îgemarî rîa Ngai-Mûnene. Nî agaacoka etûrûre nthakame îo îngî ya ndegwa vau nthî ya metha ya kîgongoona îrîa îvîvagîrua matega îrîa îrî vau mûromorî wa îgema rîa Ngai-Mûnene.

⁸ Nî agooca mathunya monthe marîa marî nyamarî cia nda ma ndegwa îo,

⁹ mbigo cioîrî vamwe na mathunya marîa mairigicîrîtie, na gacunjî karîa karo mûno ga îtema.

¹⁰ Mûthînjîri-Ngai Mûnene nîagooca indo icio na aivîvîrie îgûrû rîa metha ya kîgongoona ya matega ma kûvîvua, wata ûrîa eekire na indo cia ndegwa îrîa yaûragirwe îrî ya îtega rîa thayû.

¹¹ Nwatî nîagooca rûûo rwayo, nyama ciayo cionthe, kîongo Kîamyo, magûrû mayo, nyama cia nda vamwe na tatha,

¹² na aikuue cionthe aivire na kûu nja ya kûrîa matûûraga vandû varîa vatheru varîa mûu wîtûrûragwa na auge ivîvîrue vo.

¹³ “Ethîrwa nî andû onthe a Isiraeli mevîtie na njîra ya kuna rîathani rîmwe rîa maathani ma Ngai-Mûnene matakûmenya,

¹⁴ rîrîa wîvia ûcio ûkaamenyekana, andû onthe nîmakaaruta ndegwa îtarî ngûrû îrî îtega rîa kûtheria mevia. Makaamîvira îgemarî rîa Ngai-Mûnene.

¹⁵ Atongoria a andû nî makaaigîrîra njara ciao kîongorî Kîam ndegwa îo, na nîkaaûragwa Ngai-Mûnene akîonaga.

¹⁶ Mûthînjîri-Ngai Mûnene nîagooca nthakame îmwe ya ndegwa na amîvire îgemarî rîa Ngai-Mûnene,

¹⁷ atovokie Kîamra gîake nthakamerî îo na amîminjaminje maita mûgwanja vau mbere ya gîtambaa kîrîa kîvakanîtie vandû varîa vatheru Mûno Ngai-Mûnene akîonaga.

¹⁸ Nî ageekîra nthakame îmwe mîenarî ya metha ya kîgongoona îrîa yumîrîte ta mvîa, îrîa îrî ndaarî ya îgema rîa Ngai-Mûnene. Nayo nthakame îo îngî amîtûrûre nthî ya metha ya kîgongoona îrîa îvîvagîrua matega, îrîa îrî vau mûromorî wa îgema rîa Ngai-Mûnene.

¹⁹ Nî agaacoka oce mathunya mayo monthe na amavîvîrie îgûrû rîa metha ya kîgongoona.

²⁰ Ageeka na ndegwa îo wata ûrîa eekire na ndegwa ya îtega rîa kûtheria mevia. Nî akaaruta îgongoona nîûndû wa kûtheria wîvia wa andû wata ûguo, na nî makooverwa.

²¹ Vuva wa ûguo, mûthînjîri-Ngai Mûnene nî agooca ndegwa îo na amîvire na kûu nja ya kûrîa matûûraga na amîvîvîrie kuo, wata ûrîa aavîvirie ndegwa îrîa yarutîtwe nîûndû wa kûtheria wîvia wake ke mwene. Rîrî nî îtega rîa kûtheria wîvia wa andû onthe.

²² “Ethîrwa nî mûtongoria wîvîtie atakûmenya na njîra ya kuna rîmwe rîa maathani ma Ngai-Mûnene,

²³ na acoke amenyithue wîvia ûcio, nîakaaruta nthenge îtarî na wonje rîrî îtega rîake.

²⁴ Nî akaaigîrîra njara yake kîongorî Kîamyo na amîûragîre varîa nyamû ya matega ma kûvîvua yûragagîrwa Ngai-Mûnene akîonaga. Rîîrî nî îtega rîa kûtheria wîvia.

²⁵ Mûthînjîri-Ngai nî agaacoka atovokie Kîamra gîake nthakamerî ya nyamû îo na amîkîre mîenarî ya metha ya kîgongoona îrîa yumîrîte ta mvîa, îrîa îvîvagîrua matega, acoke etûrûre îo îngî nthî ya metha ya kîgongoona.

²⁶ Nî agaacoka avîvîrie mathunya mayo monthe îgûrû rîa metha ya kîgongoona wata ûrîa avîvagia mathunya ma nyamû irîa ciûragagwa nîûndû wa matega ma ngwatanîro. Ûguo nîguo mûthînjîri-Ngai akaaruta îgongoona nîûndû wa kûtheria wîvia wa mûtongoria na mûtongoria ûcio nî akooverwa.

²⁷ “Ethîrwa nî mûndû ûtarî mûthînjîri-Ngai na ûtarî mûtongoria wîvîtie na njîra ya kuna rîmwe rîa maathani ma Ngai-Mûnene atakûmenya,

²⁸ na acoke amenyithue wîvia ûcio, nî akaaruta mvarika îtarî na wonje îrî îtega rîa kûtheria wîvia ûcio ekîte.

²⁹ Mûndû ûcio nî akaaigîrîra njara yake kîongorî Kîamyo na amîûragîre varîa matega ma kûvîvua marutagîrwa.

³⁰ Mûthînjîri-Ngai nî agaatovokia Kîamra gîake nthakamerî ya nyamû îo na amîkîre mîenarî ya metha ya kîgongoona îrîa yumîrîte ta mvîa, acoke etûrûre îo îngî nthî ya metha ya kîgongoona.

³¹ Mûndû ûcio wîvîtie nî akaaruta mathunya ma nyamû îo monthe wata ûrîa mathunya ma nyamû irîa ciûragagwa nîûndû wa matega ma ngwatanîro marutagwa. Mûthînjîri-Ngai nîakaavîvîria mathunya mau îgûrû rîa metha ya kîgongoona naguo mûtararûko wamo nîûgaakenia Ngai-Mûnene. Mûthînjîri-Ngai nî agaacoka arute îgongoona rîa kûtheria wîvia wa mûndû ûcio na nî akooverwa.

³² “Ethîrwa mûndû nî akaaruta ng'ondu îrî îtega rîa kûtheria wîvia, nwanginya îkethîrwa îrî ya nga îtarî na wonje.

³³ Akaaigîrîra njara yake kîongorî Kîamyo na amîûragîre varîa matega ma kûvîvua marutagîrwa rîrî îtega rîa kûtheria mevia.

³⁴ Mûthînjîri-Ngai nî agaatovokia Kîamra gîake nthakamerî ya nyamû îo, amîkîre mîenarî ya metha ya kîgongoona îrîa yumîrîte ta mvîa, acoke etûrûre îo îngî nthî ya metha ya kîgongoona.

³⁵ Nî agaacoka arute mathunya monthe mayo, wata ûrîa mathunya ma ng'ondu îrîa îrutagwa nîûndû wa matega ma ngwatanîro marutagwa. Nî akaavîvîria mathunya mau vamwe na irio irîa irutîrîtwe Ngai-Mûnene îgûrû rîa metha ya kîgongoona. Ûguo nîguo mûthînjîri-Ngai akaaruta îgongoona rîa kûtheria wîvia wa mûndû ûcio na nî akooverwa.”