Alawi 27 - ÎVUKU RÎA ÛVORO MWARO

Mawatho megiî iveo cia kûrutîra Ngai-Mûnene

¹ Ngai-Mûnene nîwerire Musa atîrî,

² “Îra andû a Isiraeli, atî rîrîa mûndû eranîrîte atî nîekûrutîra Ngai-Mûnene mûndû arî îtega nîûndû wa kûvingia mwîvîtwa wa mwanya, mûndû ûcio nwa akûûrwe na njîra ya kûrîva mbeca iringanîte na kîthimi kîrîa gîtîkanîrie.

³ Mûndûmûrûme arî na ûkûrû wa kuuma mîaka mîrongo îîrî kûthiî mîaka mîrongo îtandatû: tûcunjî mîrongo îtano (50) twa sîlûva.

⁴ Mûndûmûka tûcunjî mîrongo îthatû (30) twa sîlûva.

⁵ Mûndû arî na ûkûrû wa kuuma mîaka îtano kûthiî mîaka mîrongo îîrî: arî mwanake, tûcunjî mîrongo îîrî (20) twa sîlûva, na arî mwîrîtu, tûcunjî îkûmi (10) twa sîlûva.

⁶ Kaana karî na ûkûrû wa nthî ya mîaka îtano: karî kamwanake, tûcunjî tûtano (5) twa sîlûva, karî kerîtu, tûcunjî tûthatû (3) twa sîlûva.

⁷ Mûndû arî na ûkûrû wa makîria ya mîaka mîrongo îtandatû: arî mûndûmûrûme, tûcunjî îkûmi na tûtano (15) twa sîlûva, na arî mûndûmûka, tûcunjî îkûmi (10) twa sîlûva.

⁸ “Ethîrwa mûndû ûrîa wîvîtîte arî mûthîni mûno na ndangîvota kûrîva kîthimi kîrîa gîtîkanîrie, nîakaavirîra mûthînjîri-Ngai mûndû ûcio amûrîrîte Ngai, nake mûthînjîri-Ngai nîagaatua kîthimi kûringana na ûrîa mûndû ûrîa wîvîtîte angîvota kûrîva.

⁹ “Ethîrwa mwîvîtwa nî wa nyamû îrî îtega kûrî Ngai-Mûnene, matega monthe ma nyamû ta îo nî matheru.

¹⁰ Mûndû ûrîa wîvîtîte kûruta nyamû kuuma ndîthiarî yake ndagîrîrwe nî gûkûrarania nyamû îo na îngî. Angîka ûguo, nyamû icio wa cioîrî ikethîrwa irî cia Ngai-Mûnene.

¹¹ Ethîrwa mwîvîtwa nî wa nyamû îtarî ntheru, îrîa îtangîtîkîrwa nî Ngai-Mûnene îrî îtega, mûndû ûcio nîakaavira nyamû îo kûrî mûthînjîri-Ngai.

¹² Mûthînjîri-Ngai nî agaatua îrîvi rîa nyamû îo kûringana na wagîrîru wayo, na mbeca irîa mûthînjîri-Ngai agaatua nîcio nyamû îo îkaagûrwa.

¹³ Nwatî mûndû ûcio angîenda kûgûra nyamû îo rîngî, nwanginya akaamîrîva na ongerere tûcunjî mîrongo îîrî îgûrû rîa îgana.

¹⁴ “Vîndî îrîa mûndû akwamûrîra Ngai-Mûnene nyomba, mûthînjîri-Ngai nîagaatua îrîvi rîa nyomba îo kûringana na wagîrîru wayo, na mbeca irîa mûthînjîri-Ngai agaatua nîcio nyomba îo îkaagûrwa.

¹⁵ Ethîrwa mwene nyomba îo nwa ende kûmîgûra rîngî, nwanginya akaamîrîva na ongerere tûcunjî mîrongo îîrî îgûrû rîa îgana.

¹⁶ “Mûndû angîamûrîra Ngai-Mûnene gacunjî ka mûgûnda wake, îrîvi rîa gacunjî kau ka mûgûnda rîgaatuwa kûringana na maketha marîa maumaga kuo. Wa kilo mîrongo îîrî cia cairi ikaarîvagwa tûcunjî îkûmi twa sîlûva.

¹⁷ Ethîrwa akaamûra gacunjî kau ka mûgûnda mwaka wa mîrongo îtano wathira, gakaarîvwa îrîvi rîrîa rîkagîrîrîte.

¹⁸ Nwatî angîamûra gacunjî kau ka mûgûnda vuva wa mîaka mîrongo îtano, mûthînjîri-Ngai nîagaatua îrîvi rîa mûgûnda rîringanîte na mîaka îrîa îkethîrwa îtigarîte nginya mwaka ûcio wîngî wa gûkûngûîra mîaka mîrongo îtano, na îrîvi rîu rînyivanyivue.

¹⁹ Ethîrwa mwene mûgûnda ûcio nwa ende kûûgûra rîngî ûtuîke wake, nwanginya akaaûrîva na ongerere tûcunjî mîrongo îîrî îgûrû rîa îgana.

²⁰ Nwatî mûndû ûcio wamûrîrîte Ngai-Mûnene mûgûnda angîwendia kûrî mûndû wa kaîrî atambîte kûûgûra, ndangîvota gûûkûûra rîngî.

²¹ Nwatî mwaka ûcio wîngî wa gûkûngûîra mîaka mîrongo îtano, mûgûnda ûcio nîûkaanenganîrwa kûrî Ngai-Mûnene ûtuîke wake viû, na ûkethîrwa ûrî wa athînjîri-Ngai.

²² “Mûndû angîgûra mûgûnda acoke awamûrîre Ngai-Mûnene,

²³ Mûthînjîri-Ngai nîagaatua îrîvi rîa mûgûnda ûcio rîringanîte na mîaka îrîa îkethîrwa îtigarîte nginya mwaka wîngî wa gûkûngûîra mîaka mîrongo îtano, na mûndû ûcio nwanginya akaarîva mbeca icio mûthenya ûcio. Mbeca icio nî cia Ngai-Mûnene.

²⁴ Mwakarî wa gûkûngûîra mîaka mîrongo îtano, mûgûnda ûcio nîûgaacokerua mwene ûrîa wawendetie kana ûcokerue njiarwa ciake.

²⁵ “Marîvi monthe magaatuwa kûringana na kîthimi kîrîa gîtîkanîrie.

²⁶ “Marikithathi ma ndîthia cienyu marî ma ng'ombe kana ma ng'ondu nî ma Ngai-Mûnene. Kwoguo gûtirî mûndû ûngîmwamûrîra mo.

²⁷ Nwatî îrikithathi rîa nyamû îtarî ntheru, mwene yo nîakaamîgûra rîngî na mbeca irîa mbîtîkanîrie na irî nyongerere tûcunjî mîrongo îîrî îgûrû rîa îgana twa sîlûva. Yarega gûkûûrwa, nwa yenderue mûndû wîngî na mbeca irîa mbîtîkanîrie.

²⁸ “Gûtirî mûndû ûngîendia kana akûre kîndû kîrîa kînenganîrîtwe kûrî Ngai-Mûnene gîtuîke gîake, wana ethîrwa nî mûndû, nyamû kana mûgûnda. Kîndû kîrîa kînenganîrîtwe kûrî Ngai-Mûnene gîtuîke gîake, nî gîake viû.

²⁹ Gûtirî mûndû ûngîgûrwa rîngî ararî mûnenganîre kûrî Ngai-Mûnene agatuîka wake viû. Mûndû ûcio nwanginya akaaûragwa.

³⁰ “Gîcunjî kîmwe îgûrû rîa îkûmi Kîam maciaro monthe ma mûgûnda nî ma Ngai-Mûnene, wana ethîrwa marî ma irio kana matunda.

³¹ Ethîrwa mûndû nwa ende kûgûra rîngî irio kana matunda irîa arutîrîtwe Ngai-Mûnene, nwanginya akaarîva mbeca irîa mbîtîkanîrie na ongerere tûcunjî mîrongo îîrî îgûrû rîa îgana.

³² Nyamû îmwe gatagatîrî ka nyamû îkûmi nî ya Ngai-Mûnene. Rîrîa nyamû igûtarwa, nyamû yonthe ya îkûmi nî ya Ngai-Mûnene.

³³ Mwene nyamû ndagîrîrwe nî kûvanga nyamû icio atî nîguo nyamû irîa itarî mbaro ithuurwe, na ndagîrîrwe nî gûkûranania nyamû îrîa amûrîrîte Ngai-Mûnene na îngî. Angîkûûrarania nyamû na îngî, nyamû icio wa cioîrî igaatuîka cia Ngai-Mûnene na mwene cio ndangîikûûra rîngî.”

³⁴ Mama nîmo maathani marîa Ngai-Mûnene aaveere andû a Isiraeli kûvîtûkîrîra kûrî Musa kîrîmarî gîa Sinai.