Alawi 24 - ÎVUKU RÎA ÛVORO MWARO

Kûmenyerera Taa

¹ Ngai-Mûnene nîwerire Musa atîrî,

² “Îra andû a Isiraeli marete maguta ma ndamaiyû marîa maro mûno ma gwîkîra taarî nîguo ciakanage vîndî cionthe.

³ Aroni akaamundagia taa icio kîvwaî na aimenyagîrîre ciakanage nginya kîraûko irî îgemarî rîa Ngai-Mûnene vau nja ya gîtambaa mbere ya îthandûkû rîa kîrîkanîro. Watho ûyû nîûtûûra ûrûmagîrîrwa nî njiarwa cienyu cionthe.

⁴ Akaathiîcaga mbere kûmenyerera taa nîguo itikaavore irî mbere ya Ngai-Mûnene. Taa icio ikethagîrwa irî îgûrû rîa vandû va gûcigîrîra varûthîtwe na thaavu ntheri.”

Mûgate ûrîa mwamûrîre Ngai

⁵ Ngai-Mûnene nîwacokire akîra Musa rîngî atîrî, “Oca mûtu mûvinyu wa kilo îkûmi na igîrî na ûruge mîgate îkûmi na îîrî.

⁶ Vanga mîgate îo mîvari îîrî îgûrû rîa metha îtumîtwe na thaavu ntheri. Wa mûvari wîthîrwe ûrî wa mîgate îtandatû.

⁷ Wîkîre ûbani mûtheri wa mûvarirî kwongerera mîgaterî îo kîrî kîririkania, atî îtega rîu rîa kûvîvua rîamûrîrîtwe Ngai-Mûnene.

⁸ Nwanginya Aroni aigage mîgate îo waro mbere ya Ngai-Mûnene mîthenya yonthe ya thavatû. Ûguo nîguo andû a Isiraeli magîrîrwe nî gûtûûra mekaga.

⁹ Mîgate îo nî ya Aroni na njiarwa ciake, na makaamîrîcagîra vandû varîa vatheru vîndî cionthe, nîûndû kau nî gacunjî katheru mûno ka îtega rîa kûvîvua rîa athînjîri-Ngai rîrîa rîtegeretwe Ngai-Mûnene.”

Îvera rîa mûndû arumîte Ngai

¹⁰ Vîndî îmwe kwarî na mwanake ûmwe. Îthe aarî Mûmisiri nake ng'ina aarî Mûisiraeli wetagwa Shelomithi. Mûthenya ûmwe mwanake wa mûndûmûka ûcio Mûisiraeli nîmaanegenanirie marî kûu maambîte magema na mûndûmûrûme ûmwe Mûisiraeli.

¹¹ Shelomithi aarî mwarî wa Debiri wa mûvîrîgarî wa Dani. Mwanake ûcio nîwarumire Ngai. Andû arîa meegwire akîruma Ngai nî maamûnyitire na makîmûvira kûrî Musa.

¹² Nîmeekarire mamûrangîrîte na andû onthe magîeterera nîguo mamenye ûrîa Ngai-Mûnene eendaga mamwîke.

¹³ Ngai-Mûnene nîwacokire akîra Musa atîrî,

¹⁴ “Ruta mûndû ûcio ûrumanire na kûu nja ya kûu mwambîte magema na andû onthe arîa megwire akîrumana maigîrîre njara ciao îgûrû rîa kîongo gîake nao andû onthe mamûûrage na mathiga.

¹⁵ Ûcoke wîre andû a Isiraeli atî mûndû wa wonthe ûkaaruma Ngai nwanginya akaaverithua nîûndû wa mevia make

¹⁶ na aûragwe. Mûisiraeli wa wonthe kana mûgeni ûrîa ûtûûraga kûu Isiraeli angîkaaruma Ngai-Mûnene nwanginya akaaûragwa na mathiga nî andû onthe.

¹⁷ “Mûndû wa wonthe ûkaaûragana nwanginya akaaûragwa,

¹⁸ na mûndû wa wonthe ûkaaûraga nyamû ya mûndû ûrîa wîngî nwanginya akaamîrîva na îngî. Nyamû îrî mwoyo îkaarîvagwa na îngî.

¹⁹ “Mûndû angîtivia mûndû ûrîa wîngî, wanake nwanginya agaativua ta mûndû ûcio.

²⁰ Angîmuna îvîndî, îvîndî rîmwe rîake nwanginya riunwe. Angîmûkûûra ritho, ritho rîmwe rîake nwanginya rîkûûrwe, angîmûkûûra îgego, îgego rîmwe rîake nwanginya rîkûûrwe. Wa ûrîa mûndû ageka mûndû ûrîa wîngî, nwaguo wanake agekwa.

²¹ Mûndû ûrîa ûkaaûraga nyamû nwanginya akaamîrîva na îngî, nwatî mûndû ûrîa ûkaaûraga mûndû ûrîa wîngî nwanginya akaaûragwa.

²² Watho ûyû nî wenyu muonthe, Aisiraeli wana ageni arîa mûtûûranagia nao, nîûndû Nie nînie Ngai-Mûnene, Ngai wenyu.”

²³ Rîrîa Musa aarîkirie kwîra andû a Isiraeli ûguo, nîmaavirire mwanake ûcio warumîte Ngai na kûu nja ya kûrîa maambîte magema na makîmûûraga na mathiga. Ûguo nîguo andû a Isiraeli meekire wata ûrîa Ngai-Mûnene aathîte Musa.