Alawi 23 - ÎVUKU RÎA ÛVORO MWARO

Mawatho megiî irugo cia Ndini

¹ Ngai-Mûnene nîwerire Musa atîrî,

² “Îra andû a Isiraeli, atî ino nîcio irugo cia Ngai-Mûnene irîa ciamûrîtwe ikûngûagîrwe rîrîa magomanîte vamwe nîûndû wa kûgooca.

³ Mûrî na mîthenya îtandatû îrîa mûkaarutaga wîra, nwatî mûthenya wa mûgwanja, mûthenya wa thavatû, nî mûthenya wa kûvurûka. Mûtiagîrîrwe nî kûruta wîra mûthenya ûcio, nwatî mûgomanage vamwe nîûndû wa kûgooca. Thavatû nî yakwa, na mûkaamîmenyagîrîra mûrî wa kûrîa mûkethagîrwa mûrî.

⁴ Kûngûagîrani irugo ino irûmîrîrîte cia Ngai-Mûnene vîndî yacio yakinya.

Kîrugo kîa pasaka na mîgate îtarî mîkîre ndawa ya kwimbia

⁵ “Pasaka ya Ngai-Mûnene yambagîrîria gûkûngûîrwa kîvwaî Kîam mûthenya wa îkûmi na îna mweri wa mbere.

⁶ Mûthenya wa îkûmi na îtano nîguo mûthenya wa pasaka ya Ngai-Mûnene. Mûtiagîrîrwe nî kûrîa mîgate îrî na ndawa ya kwimbia îvinda rîa mîthenya mûgwanja.

⁷ Mûthenya wa mbere wa gûkûngûîra pasaka, nîmûkaagomana vamwe nîûndû wa kûgooca na mûtikarutage wîra ûrîa mûrutaga wa mûthenya.

⁸ Mûkaandutagîra matega ma kûvîvua îvinda rîa mîthenya mûgwanja. Mûthenya wa mûgwanja nîguo mûkaagomanaga vamwe nîûndû wa kûgooca, nwatî mûtikarutage wîra mûthenya ûcio.”

⁹ Ngai-Mûnene nîwerire Musa atîrî,

¹⁰ “Vîndî îrîa mûgaakinya vûrûrirî ûrîa Nie Ngai-Mûnene ngûmûva na mûkethe maketha ma kuo, mûkaavirîra mûthînjîri-Ngai gîkûmbwa kîmwe kuuma kûrî maketha menyu ma mbere.

¹¹ Mûthînjîri-Ngai nîakaarutîra Ngai-Mûnene gîkûmbwa kîu rîrî îtega rîa mwanya, mûthenya ûrîa ûrûmîrîrîte thavatû nîguo mwîtîkîrîke nî Ngai-Mûnene.

¹² Mûthenya wa ûcio mûkaaruta gîkûmbwa Kîam irio, nîmûkaaruta gatûrûme ga ûkûrû wa mwaka ûmwe gatarî na wonje.

¹³ Mûgaakarutanîria vamwe na kilo igîrî cia mûtu ûtukanîtue na maguta ma ndamaiyû rîrî îtega rîa kûvîvua. Mûtararûko wa îtega rîu nîûkenagia Ngai-Mûnene. Mûkaaruta îtega rîu vamwe na îtega rîa lita îmwe ya ndivei.

¹⁴ Mûtiagîrîrwe nî kûrîa ngano irî mbîthî kana irî mvîvie, wana kana irugîtwe mîgate, nginya rîrîa mûkaaruta îtega rîu kûrî Ngai-Mûnene. Watho ûyû nîûtûûra ûrûmagîrîrwa tene na tene nî njiarwa cienyu cionthe kûrîa mûtûûraga.

Kîrugo kîa Maketha

¹⁵ “Mûgaatara ciumia mûgwanja vuva wa thavatû rîrîa mûkaavira gîkûmbwa Kîam irio kûrî Ngai-Mûnene rîrî îtega rîa mwanya.

¹⁶ Mûthenya wa mîrongo îtano, vuva wa thavatû ya mûgwanja, nîrîo mûkaarutîra Ngai-Mûnene îtega rîa irio ciîngî.

¹⁷ Wa andû a nyomba îmwe nîmakaavira mîgate îîrî kuuma kûrîa matûûraga nîguo mûthînjîri-Ngai amîrutîre Ngai-Mûnene îrî kîveo Kîam mwanya. Wa mûgate ûkethîrwa ûrugîtwe na mûtu mûvinyu wa ûrito wa kilo igîrî ûrugîtwe na ûrî na ndawa ya kwimbia. Mûkaaûrutagîra Ngai-Mûnene rîrî îtega rîa maketha ma mbere.

¹⁸ Mûkaarutanîria mûgate ûcio na tûtûrûme mûgwanja tûrî na ûkûrû wa mwaka ûmwe, ndegwa îtarî ngûrû, na ndûrûme igîrî. Gûtirî wanarî îmwe ya nyamû icio yagîrîrwe nî kwîthîrwa îrî na wonje. Indo icio vamwe na îtega rîa irio na îtega rîa ndivei ikaarutîrwa Ngai-Mûnene irî îtega rîa kûvîvua. Mûtararûko wa îtega rîu nîûkenagia Ngai-Mûnene.

¹⁹ Mûgaacoka mûrute nthenge îmwe îrî îtega rîa kûtheria mevia na tûtûrûme twîrî twa ûkûrû wa mwaka ûmwe rîrî îtega rîa thayû.

²⁰ Mûthînjîri-Ngai nîakaarutîra Ngai-Mûnene indo icio vamwe na mûgate wa maketha ma mbere ma mwaka na tûtûrûme tûu twîrî irî kîveo Kîam mwanya Kîam athînjîri-Ngai. Matega mau nî matheru.

²¹ Mûthenya ûcio nî gûkaaugîrîrua andû maûngane vamwe nîguo magooce. Mûtikaarute wîra mûrito mûthenya ûcio. Watho ûyû nîûtûûra ûrûmagîrîrwa nî njiarwa cienyu tene na tene kûrîa kuonthe mûtûûraga.

²² “Vîndî îrîa mûgûketha maketha ma mîgûnda yenyu, mûtigakethage irio irîa irî rûtere rwa mîgûnda na mûtigacokage kûngania irio irîa itigaraga mîgûndarî. Mûgaaitigaga nîguo andû arîa matarî na irio cia kwîgana vamwe na ageni arîa mûtûûranagia nao maûnganagie. Nie nînie Ngai-Mûnene, Ngai wenyu.”

Kîrugo kîa mwaka mûcerû

²³ Ngai-Mûnene nîwerire Musa atîrî,

²⁴ “Îra andû a Isiraeli atî, mûthenya wa mbere mwerirî wa mûgwanja rîrîa tûrumbeta tûkaavuvwa, nî mûkaavurûka na mûgomane vamwe nîguo mûgooce.

²⁵ Mûkaarutîra Ngai-Mûnene îtega rîa kûvîvua na mûtikarute wîra ûrîa mûrutaga wa mûthenya.”

Mûthenya wa kûtherua mevia

²⁶ Ngai-Mûnene nîwerire Musa atîrî,

²⁷ “Mûthenya wa îkûmi mwerirî wa mûgwanja wa mwaka wa mwaka nîrîo mambura ma kûtheria mevia ma andû a Isiraeli makaarûthagwa. Mûkenyerekagia mûthenya ûcio, na mûkagomana vamwe mûgooce na mûndutîre Nie, Ngai-Mûnene îtega rîa kûvîvua.

²⁸ Mûtikarute wîra mûthenya ûcio, nîûndû nî mûthenya wa mambura ma kûtheria mevia menyu Ngai-Mûnene, Ngai wenyu akîonaga.

²⁹ Mûndû wa wonthe ûtakeenyerekia mûthenya ûcio nîakaamûranua na andû a Ngai.

³⁰ Nake mûndû wa wonthe ûkaaruta wîra mûthenya ûcio, Nie, Ngai-Mûnene nîngaatûma akue.

³¹ Gûtirî wîra mwîtîkîrie kûrutwa mûthenya ûcio. Watho ûyû nîûtûûra ûrûmagîrîrwa tene na tene nî njiarwa cienyu cionthe kûrîa kuonthe mûtûûraga.

³² Mûkaamenyerera thavatû na mwînyerekagie kuuma kîvwaî Kîam mûthenya wa kenda nginya kîvwaî Kîam mûthenya wa îkûmi wa mweri wa mweri.”

Kîrugo gîa tûnyomba

³³ Ngai-Mûnene nîwerire Musa atîrî,

³⁴ “Kîrugo gîa tûnyomba gîkambagîrîria mûthenya wa îkûmi na îtano wa mweri wa mûgwanja na gîkathiî na mbere îvinda rîa mîthenya mûgwanja.

³⁵ Mûthenya wa mbere wa mîthenya îo mûgwanja, nîrîo mûkaagomanaga vamwe nîguo mûngooce na mûtikarutage wîra ûrîa mûrutaga wa mûthenya.

³⁶ Mûkaarutaga matega ma kûvîvua wa mûthenya îvinda rîa mîthenya mûgwanja. Mûthenya wa kanana mûcoke mûgomane rîngî vamwe nîguo mûgooce na mûndutîre matega ma kûvîvua. Mûthenya ûcio mûtikarutage wîra ûrîa mûrutaga wa mûthenya.”

³⁷ (Ino nî irugo cia Ngai-Mûnene irîa mûkaarûmagîrîra na njîra ya kûgomana vamwe nîguo mûmûgooce na mûmûrutîre matega ma irio, matega ma kûvîvua, magongoona, na matega ma ndivei, wa mûthenya wa mûthenya ta ûrîa Ngai-Mûnene augîte.

³⁸ Ino nî irugo ciîngî kwongerera kîrîa Kîam thavatû, namo mama nî matega mengî kwongerera iveo irîa mûrutagîra Ngai-Mûnene, matega marîa mûrutaga nîûndû wa kûvingia mîvîtwa, na matega marîa mûrutaga na njîra ya kwîyendera.)

³⁹ Mûkaambîrîria gûkûngûîra kîrugo gîkî mûthenya wa îkûmi na îtano mweri wa mûgwanja mwarîkia gûketha irio. Mûgaakûngûîra kîrugo gîkî îvinda rîa mîthenya mûgwanja, nwatî mûthenya wa mbere na wa kanana nî mîthenya ya kûvurûka.

⁴⁰ Mûthenya wa mbere, nîmûgooca matunda marîa maro mûno kuuma mîtîrî yenyu ya matunda, mvûa cia mîtî ya mîkîndû, mvûa cia mîtî îrîa îrî mathangû meengî, na cia tûmîtî tûrîa tûrî maûa tûmeraga tûrûnjîrî na mûgaakumia Ngai-Mûnene, Ngai wenyu îvinda rîa mîthenya mûgwanja.

⁴¹ Mûgaakûngûagîra kîrugo gîkî îvinda rîa mîthenya mûgwanja, mwerirî wa mûgwanja wa mwaka. Watho ûyû nîûtûûra ûrûmagîrîrwa nî njiarwa cienyu.

⁴² Mue andû onthe a Isiraeli mûgaatûûra tûnyombarî îvinda rîa mîthenya mûgwanja,

⁴³ nîguo njiarwa cienyu imenye atî Nie Ngai-Mûnene nînie naatûmire andû a Isiraeli matûûre tûnyombarî rîrîa naamarutire vûrûri wa Misiri. Nie nînie Ngai-Mûnene, Ngai wenyu.

⁴⁴ Ûguo nîguo Musa aaveere andû a Isiraeli mawatho ma kûrûmîrîrwa vîndî îrîa makûrûtha irugo magîkumia Ngai-Mûnene.