Alawi 21 - ÎVUKU RÎA ÛVORO MWARO

Ûtheru wa ûthînjîri-Ngai

¹ Ngai-Mûnene nîwerire Musa atîrî, “Îra avîcî a Aroni arîa matungataga marî athînjîri-Ngai, atî gûtirî mûndû wanarî ûmwe wa ciao ûkeegwatia gîko na njîra ya kûnyita kimba vîndî îrîa marî na magongoona ma mathiko,

² tiga nwa ethîrirwe arî kimba Kîam ûmwe wa mûciî wao: ng'ina, îthe, mwarî, mûvîcî, mûrwang'ina,

³ kana mwarwang'ina ûtarî mûviku.

⁴ Mûthînjîri-Ngai ndakegwatia gîko akîthiî îgongoonarî rîa mathiko ma athoni ake.

⁵ “Gûtirî mûthînjîri-Ngai ûkenja njuîrî wanarî mwena ûmwe wa kîongo gîake ithira kana enja nderu ciake kana etemange mwîrî.

⁶ Nwanginya methagîrwe marî atheru na nwanginya matîîage rîîtwa rîakwa, nîûndû nîo mandutagîra matega ma kûvîvua, kwoguo na nwanginya methagîrwe marî atheru.

⁷ Gûtirî mûthînjîri-Ngai ûkaavikia mûndûmûka mûmaraa kana mûndûmûka ûtarî nthingi kana mûndûmûka matiganîte na mûrûme, nîûndû mûthînjîri-Ngai nî mûndû mûtheru.

⁸ Tucagani mûthînjîri-Ngai mûndû mwamûre nîûndû nîarutagîra Ngai matega ma irio. Nie Ngai-Mûnene nîrî mûtheru na nînie nîmûtheragia.

⁹ Mwîrîtu wa mûthînjîri-Ngai angîtuîka îraa, nîaconorithagia îthe; kwoguo mwîrîtu ûcio nî akaavîvua na mwaki nginya akue.

¹⁰ “Mûthînjîri-Ngai Mûnene ûrîa mwîtîrîrie maguta ma kwamûrana kîongorî gîake nîguo ekagîre nguo cia ûthînjîri-Ngai ndagîrîrwe nî gwîkara atacanûrîte njuîrî ciake kana atembûrange nguo ciake.

¹¹ Ndagîrîrwe nî kwîgwatia gîko agîtonya nyombarî îrîa îrî na kimba Kîam mûndû, wana ethîrwa kîrî Kîam îthe kana Kîam ng'ina.

¹² Ndagîrîrwe nî kuuma vandû varîa vatheru, kana agwatie gîko varîa Ngai amûrîte, nîûndû nîwetîrîrue maguta ma kûmwamûra nî Ngai. Nie nînie Ngai-Mûnene.

¹³ Mûthînjîri-Ngai Mûnene nîakaavikia mûndûmûka nthingi.

¹⁴ Ndakaavikia mûndûmûka wa ndigwa kana mûndûmûka matiganîte na mûrûme kana mûndûmûka îraa. Akaavikia mwîrîtu nthingi kuuma kûrî andû a mbarî yao,

¹⁵ nîguo ndakagwatie ciana ciake gîko gatagatîrî ka andû ao. Nie nînie Ngai-Mûnene na nînie nîmwamûrîte arî Mûthînjîri-Ngai Mûnene.”

¹⁶ Ngai-Mûnene nîwerire Musa atîrî,

¹⁷ “Îra Aroni atî, gûtirî mûndû wanarî ûmwe wa njiarwa ciake ûrî na wonje ûkaandutîra matega ma irio. Watho ûyû nîûtûûra ûrûmagîrîrwa nginya tene.

¹⁸ Gûtirî mûndû kîonje ûkaandutîra îtega: ndumumu, kîthua, mûndû ûtemangîtwe ûthiû kana kîonje,

¹⁹ kana mûndû ûrî na njara îno monju kana kûgûrû gûkû kwonju,

²⁰ kana mûndû ûrî na îguku mûrukuthu kana mûndû mûkuvî mûno, mûndû mûrwaru metho kana ûrî na mûrimû wa ngothi, kana mûndû mûkarambe.

²¹ Gûtirî mûthînjîri-Ngai wa mbarî ya Aroni arî kîonje ûkaandutîra îtega rîa kûvîvua, nîûndû nî kîrema.

²² Mûndû ta ûcio nwa arîe irio irîa ndutîrîtwe, îtega rîa irio irîa ntheru kana rîa irio irîa ntheru mûno.

²³ Nwatî nîûndû mûthînjîri-Ngai ûcio arî na wonje, ndagîrîrwe nî gûkuvîvîria gîtambaa kîrîa kîtheru kana akuvîvîria metha ya kîgongoona. Ndagîrîrwe nî kûgwatia indo icio ntheru gîko, nîûndû Nie nînie Ngai-Mûnene na nînie nîitheragia.”

²⁴ Kwoguo mau nîmo maûndû marîa Musa eerire Aroni na njiarwa ciake na andû onthe a Isiraeli.