Alawi 20 - ÎVUKU RÎA ÛVORO MWARO

Mavera nîûndû wa Mevia

¹ Ngai-Mûnene nîwerire Musa atîrî,

² “Îra andû a Isiraeli, atî mûndû wa wonthe wa Isiraeli kana mûgeni wa wonthe mûtûûranagia nake angîkaavecana wanarî ûmwe wa ciana ciake kûrî Moleku, ngai ya mûvuanano, nîakaaûragwa na mathiga nî andû onthe.

³ Mûndû ûrîa ûkaavaka îgema rîakwa rîtheru mûgiro na aconorithie rîîtwa rîakwa rîtheru na njîra ya kûvecana wanarî ûmwe wa ciana ciake kûrî Moleku, nîngaamûverithia na nîmwamûranie na andû akwa.

⁴ Nwatî andû mangîkaarega kûraga mûndû ûcio nîûndû wa kûvecana ûmwe wa ciana ciake kûrî Moleku, ngai ya mûvuanano,

⁵ nie mwene nîngaaverithia mûndû ûcio vamwe na andû a mûciî wake wana andû onthe arîa matarî evokeku kûrî nie na magoocaga Moleku, ngai ya mûvuanano. Nîngaamûrania andû acio na andû akwa.

⁶ “Mûndû angîkaathiî kûria ûtethio kûrî ago na oni maûndû na arege kwîthîrwa arî mwîvokeku kûrî nie, nî ngaamûverithia na nîmwamûranie na andû akwa.

⁷ Kwoguo îkaragani mûrî atheru, nîûndû Nie nînie Ngai-Mûnene, Ngai wenyu.

⁸ Vingagiani mawatho makwa, nîûndû Nie nînie Ngai-Mûnene ûrîa ûmûtheragia.”

⁹ Ngai-Mûnene nîwaugire atî, mûndû wa wonthe ûkaaruma îthe kana ng'ina nîakaaûragwa. Gîkuû Kîam mûndû ûcio gîkaaumana na gîîko gîake ke mwene.

¹⁰ Mûndûmûrûme angîkaamenyana kîîmwîrî na mûka wa mûndû ûrîa wîngî, mûndûmûrûme ûcio wana mûndûmûka ûcio nîmakaaûragwa.

¹¹ Mûndûmûrûme ûrîa ûkaamenyana kîîmwîrî na ûmwe wa aka a îthe, nîagaaconorithia îthe. Mûndûmûrûme ûcio na mûndûmûka ûcio nîmakaaûragwa. Ikuû cia andû acio oîrî ikaaumana na gîîko Kîamo o ene.

¹² Mûndûmûrûme angîkaamenyana kîîmwîrî na mûka wa mûvîcî, andû acio wa oîrî nîmakaaûragwa. Andû acio nîmamenyanîte kîîmwîrî marî a nthakame îmwe, na ikuû ciao ikaaumana na gîîko Kîamo o ene.

¹³ Mûndûmûrûme angîkaamenyana kîîmwîrî na mûndûmûrûme wîngî, andû acio oîrî makethîrwa mekîte ûndû mûcûku, nao oîrî nîmakaaûragwa. Ikuû ciao ikaaumana na gîîko Kîamo o ene.

¹⁴ Mûndûmûrûme angîkaavikia mwîrîtu na avikie ng'ina wa mwîrîtu ûcio, andû acio wa o athatû nîmakaavîvua makue, nîûndû wa ûndû ûcio mûcûku makethîrwa mekîte. Ûndû ta ûcio ndwagîrîrwe nî gwîkîka gatagatîrî kenyu.

¹⁵ Mûndûmûrûme angîkaamenya nyamû kîîmwîrî, mûndû ûcio nî akaaûragwa, wana nyamû îo nîkaaûragwa.

¹⁶ Mûndûmûka angîkaamenya nyamû kîîmwîrî, mûndûmûka ûcio nî akaaûragwa, wana nyamû îo nîkaaûragwa. Gîkuû Kîam mûndûmûka ûcio wana Kîam nyamû îo gîkaaumana na ciîko icio.

¹⁷ Mûndûmûrûme ûkaavikia mwarwang'ina, marî a ng'ina ûmwe kana matarî a ng'ina ûmwe, kîu nî gîîko Kîam ûûra nthoni na andû acio nî makaamûranua na andû acio engî. Mûndûmûrûme akethîrwa aconorithîtie mwarwang'ina na nî akaaverithua nîûndû wa wîvia wake ke mwene.

¹⁸ Mûndûmûrûme angîkaamenyana kîîmwîrî na mûndûmûka vîndî îrîa mûndûmûka ûcio arî îvindarî rîake rîa mweri, andû acio wa oîrî nîmakaamûranua na andû acio engî nîûndû nîmaunîte watho wa ûtheru.

¹⁹ Mûndûmûrûme angîkaamenyana kîîmwîrî na tatawe, kûu nî gûconorithia mûndû wa nthakame yake. Andû acio wa oîrî nîmakaaverithua nîûndû wa mevia mao o ene.

²⁰ Mûndûmûrûme angîkaamenyana kîîmwîrî na mûka wa mamawe, kûu nî gûconorithia mamawe. Andû acio wa oîrî nîmakaaverithua nîûndû wa mevia mao, na gûtirî wanarî ûmwe wa ciao ûkaagîa na njiarwa.

²¹ Mûndûmûrûme angîkaamenyana kîîmwîrî na mûndûmûka wa mûrwang'ina vîndî îrîa mûrwang'ina ûcio arî mwoyo, mûndûmûrûme ûcio nîaconorithîtie mûrwang'ina na andû acio wa oîrî matikaagîa na njiarwa.

²² “Kwoguo vingagiani mawatho makwa monthe na maathani makwa nîguo mûtigatavîkwe nî vûrûri ûrîa ngûmûvira mûgatûûre.

²³ Mûtikarûmîrîre mîtugo ya andû arîa matûûraga vûrûrirî ûcio. Nînîmengata nîguo mûthiî mûgatûûre kuo. Nîmandakarîtie nîûndû wa maûndû monthe macûku marîa mekaga.

²⁴ Nwatî nînîmwîrîrîte atî, nîngaamûva vûrûri wao mûûgae ûtuîke wenyu, vûrûri ûrî îriia na ûûkî. Nie nînie Ngai-Mûnene, Ngai wenyu na nîmûthuurîte kuuma gatagatî ka ndûrîrî irîa ciîngî.

²⁵ Kwoguo nwanginya mwîkagîre ngûrani gatagatî ka nyamû irîa itarî mûgiro na irîa irî mûgiro, na gatagatî ka iconi irîa itarî mûgiro na irîa irî mûgiro. Mûtikegwatie mûgiro na njîra ya kûrîa nyamû kana iconi irîa mbugîte atî irî mûgiro.

²⁶ Mue mûrî akwa na mûkethagîrwa mûrî atheru nîûndû Nie, Ngai-Mûnene nîrî mûtheru. Nîmûthuurîte kuuma gatagatî ka ndûrîrî irîa ciîngî nîguo mûtuîke akwa kîûmbe.

²⁷ “Mûndûmûrûme kana mûndûmûka wa wonthe mûndûmûgo kana mûrogi nîakaaûragwa na mathiga. Ikuû cia andû acio ikaaumana na ciîko ciao o ene.”