Alawi 2 - ÎVUKU RÎA ÛVORO MWARO

Matega ma irio cia mûgûnda

¹ Rîrîa mûndû wa wonthe akûrutîra Ngai-Mûnene matega ma irio cia mûgûnda, nwanginya wîthîrwe ûrî mûtu mûvinyu na awîkîre maguta na ûbani,

² na aûvire kûrî athînjîri-Ngai a nyomba ya Aroni. Mûthînjîri-Ngai nîagaakumbata mûtu ûcio ûrî na maguta na ûbani ngundi îmwe, na aûvîvîrie îgûrû rîa metha ya kîgongoona kîrî kîririkania atî matega mau ma kûvîvua marutîrîtwe Ngai-Mûnene. Mûtararûko wa matega mau nîûkenagia Ngai-Mûnene.

³ Matega ma irio marîa magaatigara nî ma athînjîri-Ngai; nî matheru mûno nîûndû nî mamwe ma irio irîa irutîrîtwe Ngai-Mûnene.

⁴ Rîrîa ûkûruta îtega rîa mîgate îrugîtwe na ovena, nwanginya îthîrwe îtarî na ndawa ya kwimbia îtukanîtue na maguta kana tûmîgate tûnini tûvakîtwe maguta.

⁵ Ethîrwa îtega rîaku nî mûgate ûrugîtwe na karaî, nwanginya ûkandwe na mûtu mûvinyu mûno ûtukanîtue na maguta ûtarî na ndawa ya kwimbia.

⁶ Nîûkenyûranga mûgate ûcio na ûwîtîrîrie maguta. Rîu nî îtega rîa irio cia mûgûnda.

⁷ Ethîrwa îtega rîaku nî mûgate ûrugîtwe na rûgîo, nwanginya wîthîrwe ûrî wa mûtu mûvinyu ûtukanîtue na maguta.

⁸ Nîûkaavira îtega rîu kûrî Ngai-Mûnene na ûrînenganîre kûrî mûthînjîri-Ngai, nake arîvire metharî ya kîgongoona.

⁹ Mûthînjîri-Ngai nîagooca gacunjî kamwe ka îtega rîu karî kîririkania atî îtega rîu rîonthe rîa irio cia mûgûnda rîrutîrîtwe Ngai-Mûnene. Nîagaacoka avîvîrie gacunjî kau îgûrû rîa metha ya kîgongoona rîrî îtega rîa kûvîvua. Mûtararûko wa îtega rîu nîûkenagia Ngai-Mûnene.

¹⁰ Matega mau mengî magaatigara nî ma athînjîri-Ngai; nî matheru mûno nîûndû nî mamwe ma matega ma kûvîvua marîa marutîrîtwe Ngai-Mûnene.

¹¹ Gûtirî îtega rîa irio cia mûgûnda rîa kûrutîra Ngai-Mûnene rîkaarûthwa rîrî na ndawa ya kwimbia, nîûndû ndwagîrîrwe nî kûvîvia ndawa ya kwimbia kana ûûkî irî îtega rîa kûvîvua kûrî Ngai-Mûnene.

¹² Nwa ûrutîre Ngai-Mûnene indo icio irî îtega rîa maketha maku ma mbere, nwatî itîkaavîvîrua îgûrû rîa metha ya kîgongoona.

¹³ Wîkagîre cumbî iriorî cionthe cia mûgûnda irîa ûkûrutîra Ngai-Mûnene, nîûndû cumbî îgaakûririkanagia kîrîkanîro gîaku na Ngai.

¹⁴ Rîrîa ûkûrutîra Ngai-Mûnene îtega rîa maketha maku ma mbere, ûrutage irio cia mûgûnda irî mbokie, kana mûtu ûthîîtwe wa ngano.

¹⁵ Ûcoke wîkîre maguta na ûbani îtegarî rîu. Rîu nî îtega rîa irio cia mûgûnda.

¹⁶ Mûthînjîri-Ngai nîagaacoka avîvie gacunjî ka mûtu, gacunjî ka maguta vamwe na ûbani wonthe. Rîu nî îtega rîa kûvîvua kûrî Ngai-Mûnene.