Alawi 19 - ÎVUKU RÎA ÛVORO MWARO

Mawatho megiî ûthingu na waragania

¹ Ngai-Mûnene nîwerire Musa atîrî,

² “Îra andû onthe a Isiraeli atî methîrwe marî atheru nîûndû Nie Ngai-Mûnene, Ngai wenyu nîrî mûtheru.

³ Mue muonthe, nwanginya wa mûndû atîîage îthe na ng'ina na nwanginya mûririkanageni mîthenya yakwa ya thavatû, wata ûrîa mbathanîte. Nie nînie Ngai-Mûnene, Ngai wenyu.

⁴ “Mûtikandiganîrie na mûgooce mîvuanano, kana mwîrûthîre ngai cia gûtwekua na mwaki. Nie nînie Ngai-Mûnene, Ngai wenyu.

⁵ “Rîrîa mûkûndutîra îtega rîa thayû, rûmagîrîrani mawatho marîa nîmûvete, na îtega rîenyu rîgetîkîrîkaga.

⁶ Nyama cia nyamû ya îtega rîa thayû nwanginya irîcagwe mûthenya wa ûcio kana mûthenya ûcio wîngî. Nwatî nyama irîa ingîtigara na ikinyie mûthenya wa kathatû, nwanginya ikaavîvua.

⁷ Nyama icio ingîkaarîwa mûthenya wa kathatû, ikeethîrwa itarî ntheru na îtega rîu rîtigeetîkîrîka.

⁸ Mûndû ûrîa ûkaairîa akethîrwa arî na wîvia nîûndû wa kûgwatia kîndû kîrîa nyamûrîrîtwe mûgiro, na mûndû ûcio nîakaamûranua na andû akwa.

⁹ “Rîrîa mûgûketha maketha ma mîgûnda yenyu, mûtigakethage irio irîa irî mîthiiarî ya mîgûnda, na mûtigacokage kûngania irio irîa îgaatigara mîgûndarî.

¹⁰ Mûtigacokage mîgûndarî yenyu ya mîthavibu kûngania thavibu irîa ikethîrwa itigarîte, na mûtikaûnganagie thavibu irîa igûcaga, mûgaaitigaga nîguo andû arîa matarî na irio cia kwîgana vamwe na ageni arîa mûtûûranagia nao maûnganagie. Nie nînie Ngai-Mûnene, Ngai wenyu.

¹¹ “Mûtikanaîe kana mûveenia mûndû ûrîa wîngî.

¹² Mûtikanevîte na rîîtwa rîakwa rîrîa mûkûvenania, nîûndû kûu nî kûnyararithia rîîtwa rîakwa. Nie nînie Ngai-Mûnene, Ngai wenyu.

¹³ “Mûtikanavinyîrîrie mûndû ûrîa wîngî kana mwîe kîndû gîake. Ethîrwa mûndû arîkanîrîte na mûndû ûrîa wîngî amûrutîre wîra nîguo amûrîve, mûndû ûcio ndagîrîrwe nî gûkinyia mûthenya ûcio wîngî atarî mûrîvu mûndû wake wa wîra.

¹⁴ Mûtikanarume gîtegua kana mwiga kîndû mbere ya ndumumu atî nîguo îvîngwe nîkîo. Mbathîkagîrani. Nie, nînie Ngai-Mûnene, Ngai wenyu.

¹⁵ “Tuithanagiani maciira na kîvooto; mûtikonanie kîmenyano kûrî athîni kana mwîtigagîre itonga, nwatî tucagîrani andû arîa engî ciira na kîvooto.

¹⁶ Mûtikathiî mûkîguutanaga kûrî andû enyu, na mûtikarute ûira ûngîtûma mûndû ûrîa wîngî atuîrîrwe kûûragwa. Nie nînie Ngai-Mûnene.

¹⁷ “Mûtikamenane na andû arîa engî, nwatî îgucanagani nîguo mûtikevie.

¹⁸ Mûtikerîvîrîrie kûrî mûndû ûrîa wîngî kana mûmûmena, nwatî endagani andû arîa engî wata ûrîa mwîyendete. Nie nînie Ngai-Mûnene.

¹⁹ “Athîkagîrani mawatho makwa. Mûtigatûme nyamû irîa mûrîthagia iciarane itarî cia kîruka kîmwe. Mûtikavande mîthemba îîrî ya mbeû mûgûndarî ûmwe. Mûtigekîre nguo îtumîtwe na itambaa cia mîthemba îîrî.

²⁰ “Mûndûmûka ngombo angîthîrwa arî mwige nî mûndûmûrûme, nake mûndûmûrûme wîngî amenyane nake kîîmwîrî atarî mûmûkûûru nîguo atuîke mûka, arûme acio oîrî nîmakaaverithua, nwatî matikaaûragwa nîûndû mûndûmûka ûcio nî ngombo.

²¹ Mûndûmûrûme ûrîa ûmenyanîte kîîmwîrî na ngombo îo ya mûndûmûka nîakaarete ndûrûme vau mûromorî wa îgema rîa Ngai-Mûnene îrî îtega rîake rîa kûtheria mevia.

²² Nake mûthînjîri-Ngai nîakaarûtha mambura ma kûtheria mevia ma mûndûmûrûme ûcio na ndûrûme îo, na Ngai-Mûnene nîakaamwovera.

²³ “Rîrîa mûgaakinya vûrûrirî wa Kanaani na mûvande mîtî îrîa îciaraga matunda ma kûrîwa, matunda mau nî makananie kûrîwa kwa îvinda rîa mîaka îthatû kuuma mambîrîria gûciara. Kwoguo mûtiagîrîrwe nî kûrîa matunda mau nîûndû nî makananie.

²⁴ Mwakarî wa kana mûkaanyamûrîra matunda monthe ma mîtî îo rîrî îtega rîa kûnjokeria ngatho.

²⁵ Nwatî mwakarî wa gatano, nwa mûrîe matunda marîa magaaciarwa. Mweka maûndû mau monthe, mîtî yenyu nîgaaciara matunda meengî makîria. Nie nînie Ngai-Mûnene, Ngai wenyu.

²⁶ “Mûtikarîe nyama irî na nthakame na mûtikaragûrie kana mûragûrîrwe.

²⁷ Mûtikenje njuîrî cia mîthiia ya ciongo cienyu kana mûtinatinia nderu cienyu,

²⁸ kana mwîtemange mîîrî yenyu mûgîcakaîra mûndû arî mûkuû. Nie nînie Ngai-Mûnene.

²⁹ “Mûtigaconorithie erîtu enyu na njîra ya kûmatua maraa ma hekarû. Mûngîka ûguo, nî mûkaambîrîria kûgooca ngai ciîngî na vûrûri wîcûrwe nî mîtugo mîcûku.

³⁰ Menyagîrîrani mîthenya yakwa ya thavatû, na mûtîîage vandû varîa ngoocagîrwa. Nie nînie Ngai-Mûnene.

³¹ “Mûtikathiî kûria ûtethio kûrî ago kana oni maûndû. Mweka ûguo, nî mûkaagwatua mîgiro nî o. Nie nînie Ngai-Mûnene, Ngai wenyu.

³² “Vecagani andû arîa akûrû gîtîîo, na mûmbathîkagîre; Nie nînie Ngai-Mûnene.

³³ “Mûtikavinyagîrîrie ageni arîa mûtûûranagia nao vûrûrirî wenyu.

³⁴ Îkagani ageni arîa mûtûûranagia nao wata ûrîa mwîkaga Aisiraeli arîa engî na mûmendage wata ûrîa mwîyendete. Ririkanani vîndî îmwe mwarî ageni vûrûrirî wa Misiri. Nie nînie Ngai-Mûnene, Ngai wenyu.

³⁵ “Mûtikaveenanie na njîra ya gûtûmîra ithimi irîa itagîrîrîte rîrîa mûkûthima ûraca, ûrito, kana wîngî.

³⁶ Tûmagîrani ithimi cia ma. Nie nînie Ngai-Mûnene Ngai wenyu, ûrîa wamûrutire vûrûrirî wa Misiri.

³⁷ Menyagîrîrani mawatho makwa monthe na irîra ciakwa cionthe. Nie nînie Ngai-Mûnene.”