Alawi 18 - ÎVUKU RÎA ÛVORO MWARO

Gîtîîo kîa ûviki

¹ Ngai-Mûnene nîwerire Musa

² ere andû a Isiraeli atîrî, “Nie nînie Ngai-Mûnene, Ngai wenyu.

³ Mûtigekage ta ûrîa andû a Misiri, kûrîa mwatûûraga meekaga, kana mwîka ta andû a vûrûri wa Kanaani, kûrîa ngûmûvira. Mûtikarûmîrîre mawatho mao.

⁴ Menyagîrîrani mawatho makwa na mwîkage ûrîa maugîte. Nie nînie Ngai-Mûnene, Ngai wenyu.

⁵ Rûmagîrîrani maûndû na mawatho marîa ngûmûva; mûndû ûrîa ûgeeka ûguo nîakaavonokia mwoyo wake. Nie nînie Ngai-Mûnene, Ngai wenyu.

⁶ “Gûtirî mûndû wa cienyu ûkaamenyana kîîmwîrî na mûndû wa wonthe ûrîa metanîtue nake. Nie nînie Ngai-Mûnene.

⁷ Mûtigaconorithie aguo na njîra ya kûmenyana kîîmwîrî na nyûkwe. Mûtigaconorithie nyûkwe.

⁸ Mûtigaconorithie aguo na njîra ya kûmenyana kîîmwîrî wanarî na ûmwe wa aka ake.

⁹ Mûtikamenyane kîîmwîrî na mwarwanyûkwe kana mwarwanyûkwe ûrîa mûtarî a ng'ina ûmwe nake, wana ethîrwa akûrîrîte mûciî kana akûrîrîte nja ya mûciî.

¹⁰ Mûtikamenyane kîîmwîrî na mwîrîtu wa mûvîcîguo kana mwîrîtu wa mwarîguo; kûu nî gwîconorithia.

¹¹ Mûtikamenyane kîîmwîrî na mwîrîtu wa mûka wa aguo; wanake nî mwarwanyûkwe.

¹² Mûtikamenyane kîîmwîrî na mwarwang'ina na aguo; ûcio nî tataguo.

¹³ Mûtikamenyane kîîmwîrî na mwarwang'ina na nyûkwe; ûcio nî tataguo.

¹⁴ Mûtikamenyane kîîmwîrî na mûka wa mûrwang'ina na aguo; wanake nî tataguo.

¹⁵ Mûtikamenyane kîîmwîrî na mwîrîtu wa kanyanyaguo; nî mûka wa mûvîcîguo.

¹⁶ Mûtikamenyane kîîmwîrî na mûka wa mûrwanyûkwe.

¹⁷ Ethîrwa mwanamenyana kîîmwîrî na mûndûmûka wa wonthe, mûtikamenyane kîîmwîrî na mwîrîtu wake kana mwana wa mwîrîtu wake; acio nî andû a mûciî wenyu, na ûcio nî mûtugo mûcûku.

¹⁸ Mûtikavikie aa mwarwang'ina na aka enyu îvinda rîrîa rîonthe aka enyu marî mwoyo.

¹⁹ “Mûtikamenyane kîîmwîrî na mûndûmûka vîndî îrîa arî îvindarî rîake rîa mweri, nîûndû vîndî îo ndethagîrwa arî mûtheru.

²⁰ Mûtikamenyane kîîmwîrî na mûka wa mûndû wîngî; ûndû ûcio nwa ûtûme we wîthîrwe ûtarî mûtheru.

²¹ Mûtikanenganîre ciana cienyu ciamûrîrwe ngai îrîa îtagwa Moleku, na mwaki, nîûndû kûu nî gûconorithia rîîtwa rîa Ngai-Mûnene, Ngai.

²² Gûtirî mûndûmûrûme ûkaamenyana kîîmwîrî na mûndûmûrûme ûrîa wîngî ta ûrîa amenyanaga kîîmwîrî na mûndûmûka, nîûndû ûcio nî ûndû mûcûku.

²³ Gûtirî mûndûmûrûme kana mûndûmûka ûkaamenya na nyamû kîîmwîrî. Ûcio nî ûndû ûtaringanîte na mûtûûrîre na nîûtûmaga mûndû ethîrwe atarî mûtheru.

²⁴ “Mûtigecûkangie na ûndû wanarî ûmwe wa mama, nîûndû andû a ndûrîrî, na nîo nîrengata nîguo mûthiî mûgatûûre kuo, meecûkangirie na maûndû mama.

²⁵ Ciîko ciao nîciatûmire vûrûri wao ûnyitwe nî gîko, kwoguo nîmverithia vûrûri ûcio na ndûme vûrûri ûcio ûtavîke andû arîa matûûraga kuo.

²⁶ Mue andû a Isiraeli muonthe vamwe na ageni arîa mûtûûranagia nao, nwanginya mûrûmagîrîre mawatho ma Ngai-Mûnene na mwîkage ûrîa maugîte.

²⁷ Andû arîa maatûûraga vûrûrirî ûcio mbere nîmeekire maûndû macûku na magîtûma vûrûri ûcio ûgîe gîko, nwatî mue mûtigeke maûndû mau.

²⁸ Mweka ûguo vûrûri ûcio nîûkaamûtavîka ta ûrîa watavîkire andû a ndûrîrî arîa maatûûraga kuo mbere yenyu.

²⁹ Mûndû wa wonthe ûgeeka ûndû ûmwe wa mama macûku nîakaamûranua na andû a Ngai.

³⁰ “Kwoguo rûmagîrîrani mawatho marîa nîmûvete na mûtikagîe na mîtugo mîcûku ta îrîa yarî na andû arîa maatûûraga vûrûrirî ûcio mbere yenyu, kana mwîvaka gîko mûkîmîka. Nie nînie Ngai-Mûnene, Ngai wenyu.”