Alawi 17 - ÎVUKU RÎA ÛVORO MWARO

Mawatho megiî nthakame ya magongoona

¹ Ngai-Mûnene nîwerire Musa atîrî,

² “Îra athînjîri-Ngai na andû onthe a Isiraeli mawatho mama marûmîrîrîte.

³ Mûisiraeli ûrîa ûkaaûragîra ndegwa, ng'ondu kana mbûri vandû vengî,

⁴ tiga mûromorî wa îgema rîa Ngai-Mûnene irî îtega kûrî Ngai-Mûnene, nî aunîte watho. Mûndû ûcio nî wîtûrûrîte nthakame, na nî akaamûranua na andû acio engî.

⁵ Watho ûyû ûrî vo nîguo andû a Isiraeli maretagîre Ngai-Mûnene nyamû irîa matwîre maûragagîra na kûu nja ya mûromo wa îgema rîa Ngai-Mûnene. Makaairetagîra mûthînjîri-Ngai vau mûromorî wa îgema rîa Ngai-Mûnene na magaciûragîra vo irî matega ma thayû.

⁶ Mûthînjîri-Ngai nî akaaminjaminja nthakame mîenarî ya metha ya kîgongoona vau mûromorî wa îgema rîa Ngai-Mûnene na avîvie mathunya nîguo maume mûtararûko wa gûkenia Ngai-Mûnene.

⁷ Andû a Isiraeli matikethîrwa matarî evokeku kûrî Ngai-Mûnene rîngî na njîra ya kûragîra nyamû na kûu nja ya mûromo wa îgema marî magongoona ma ngoma ciîkariî ta mbûri. Andû a Isiraeli na njiarwa ciao nîmatûûra marûmagîrîra watho ûyû.

⁸ “Mûisiraeli wa wonthe kana mûgeni wa wonthe ûtûûranagia nao, ûrîa ûkaarutîra Ngai-Mûnene îtega rîa kûvîvua kana îgongoona

⁹ vandûrî vengî tiga mûromorî wa îgema rîa Ngai-Mûnene nîakaamûranua na andû a Ngai.

¹⁰ “Mûisiraeli wa wonthe kana mûgeni wa wonthe ûtûûranagia nao angîrîa nyamû îrî na nthakame, Ngai-Mûnene nîakaamûverithia na amwamûranie na andû ake.

¹¹ Mwoyo wa indo cionthe irîa ivevaga ûrî nthakamerî, kwoguo mbathanîte atî nthakame yonthe îtûrûragwe îgûrû rîa metha ya kîgongoona nîguo îtheragie mevia ma andû onthe. Nthakame îthagîrwa îrî mwoyo, na kîu nîkîo gîtûmaga Ngai amîvûthîre gûtûtheria mevia.

¹² Kwoguo Ngai-Mûnene nîwathîte andû a Isiraeli atî gûtirî wanarî mûndû ûmwe wa ciao kana mûgeni ûtûûranagia nao ûkaarîa nyama irî na nthakame.

¹³ “Mûisiraeli wa wonthe kana mûgeni wa wonthe ûtûûranagia nao angîkaavîta na anyite nyamû kana gîconi gîtarî na gîko, nwanginya ageetûrûra nthakame yakîo nthî na amîmike na mûthetu.

¹⁴ Mwoyo wa indo cionthe irîa ivevaga ûrî nthakamerî, kwoguo mbathîte andû a Isiraeli matikarîe nyama wa yonthe îrî na nthakame, na mûndû wa wonthe ûgeka ûguo nîakaamûranua na andû acio engî.

¹⁵ “Mûndû wa wonthe, wana ethîrwa arî Mûisiraeli kana mûgeni, ûrîa ûkaarîa nyama ya nyamû îkuîte mûvûvû kana yûragîtwe nî nyamû cia kîthaka, nwanginya akaathambia nguo ciake, ethambie, na ekare atarî mûtheru nginya kîvwaî. Vuva wa ûguo, nîakaathera.

¹⁶ Angîkaarega kûthambia nguo ciake, kana arege kwîthambia, nîakaaverithua.”