Alawi 16 - ÎVUKU RÎA ÛVORO MWARO

Mûthenya wa kûtherua mevia

¹ Ngai-Mûnene nîwarîrie Musa vuva wa avîcî aîrî a Aroni gûkua makuvîvîria Ngai-Mûnene.

² Nîwamwîrire atîrî, “Îra mûrwanyûkwe Aroni ndagaûkage vandû varîa vatheru Mûno vuva wa gîtambaa wa rîrîa akwenda, nwatî aûkage vîndî îrîa mbagîrîru, nîûndû vau nîvo mbîthagîrwa nîrî îgûrû rîa gîkunîko Kîam îthandûkû rîa kîrîkanîro. Arega kûmbathîkîra nîagaakua.

³ Agîtonya vandû varîa vatheru Mûno, nwanginya ambage kûruta ndegwa îtarî ngûrû îrî îtega rîa kûtheria mevia na ndûrûme îrî îtega rîa kûvîvua.

⁴ “Ngai-Mûnene nîwacokire akîvecana mawatho mama marûmîrîrîte. Mbere ya Aroni atonya vandû varîa vatheru Mûno, nwanginya ambage kwîthambia na agekîra nguo cia ûthînjîri-Ngai. Nacio nî: nguo ndaca, thuruvarî, mûcivi, na kîremba.

⁵ “Nao andû a Isiraeli nîmakaanengera Aroni nthenge igîrî cia îtega rîa kûtheria mevia na ndûrûme ya îtega rîa kûvîvua.

⁶ Nake Aroni nîakaaruta ndegwa îrî îtega rîa kûtheria mevia make ke mwene na ma andû a mûciî wake.

⁷ Nîagaacoka oce nthenge irîa igîrî na aivirîre Ngai-Mûnene vau mûromorî wa îgema rîa Ngai-Mûnene.

⁸ Arî vau, nîagaaikia mîtî agîtûmagîra tûthiga twîrî, kathiga kamwe kandîkîtwe ‘Ngai-Mûnene’ nako kau kengî kandîkîtwe ‘Azazeli’.

⁹ Aroni nîagooca mbûri îrîa îkaagwîrwa nî mûtî îrî ya Ngai-Mûnene na amîrute îrî îtega rîa kûtheria mevia.

¹⁰ Nayo mbûri îrîa îkaagwîrwa nî mûtî îrî ya Azazeli, nîkaavirîrwa Ngai-Mûnene îrî mwoyo nîguo îtherie mevia ma andû, îcoke îrekererue îthiî na kûu werûrî kûrî Azazeli.

¹¹ “Aroni akîruta ndegwa îrî îtega rîa kûtheria mevia make ke mwene na ma andû a mûciî wake,

¹² nîagooca kanyûngû ga kûvîvîrua ûbani gecûrîte makara marî na mwaki na ngundi igîrî ciîcûrîte ûbani mûnungi waro na aivire vandû varîa vatheru Mûno.

¹³ Aroni arî vau mbere ya Ngai-Mûnene nîagekîra ûbani mwakirî, nîguo ndogo ya ûbani îkaamika gîkunîko Kîam îthandûkû rîa kîrîkanîro nîguo ndagakîone akua.

¹⁴ Nîagooca nthakame îmwe ya ndegwa na amîminjaminje na Kîamra gîake vau mbere ya gîkunîko, acoke aminjaminje îmwe maita mûgwanja vau mbere ya îthandûkû rîa kîrîkanîro.

¹⁵ “Vuva wa ûguo, nîakaaûraga mbûri ya îtega rîa kûtheria mevia ma andû, avire nthakame yayo vandû varîa vatheru Mûno na amîminjaminje îgûrû rîa gîkunîko wana vau mbere ya îthandûkû rîa kîrîkanîro, wata ûrîa eekire na nthakame ya ndegwa.

¹⁶ Ûguo nîguo Aroni akaarûtha mambura ma kûtheria vandû varîa vatheru Mûno kuumana na gîko Kîam andû a Isiraeli vamwe na mevia mao monthe. Nwanginya ekage îgema rîa Ngai-Mûnene ûguo, nîûndû rîtûûraga gatagatîrî ka andû arîa matarî atheru.

¹⁷ Kuuma vîndî îrîa Aroni agaatonya vandû varîa vatheru Mûno kûrûtha mambura ma kûtheria nginya rîrîa akaauma, gûtirî mûndû wagîrîrwe nî kwîthîrwa arî îgemarî rîa Ngai-Mûnene vîndî îo. Athiria kûrûtha mambura make ke mwene, ma andû a mûciî wake na ma andû onthe a Isiraeli,

¹⁸ nwanginya akaauma na athiî metharî ya kîgongoona ya matega ma kûvîvua na amîtherie. Nwanginya agooca nthakame îmwe ya mbûri na amîvake mîenarî yonthe ya metha ya kîgongoona îrîa yumîrîte ta mvîa.

¹⁹ Nwanginya akaaminjaminja nthakame îmwe îgûrû rîa metha ya kîgongoona maita mûgwanja na Kîamra gîake. Ûguo nîguo Aroni akaatheria metha ya kîgongoona kuumana na mevia ma andû a Isiraeli na amîamûre.

Mbûri îrîa îthengutagia mevia

²⁰ “Rîrîa Aroni akaathiria kûrûtha mambura ma kûtheria vandû varîa vatheru Mûno, îgema rîa Ngai-Mûnene na metha ya kîgongoona, nîakaavirîra Ngai-Mûnene mbûri îrî mwoyo îrîa îthuurîtwe îrî ya Azazeli.

²¹ Aroni nîakambararia njara ciake cioîrî îgûrû rîa kîongo Kîam mbûri na agwete maûndû monthe macûku ma andû a Isiraeli, mevia mao monthe, na ûremi wao, na amatonyie mbûrirî îo. Mbûri îo nîgaacoka îrekererue îthiî na kûu werûrî nî mûndû ûrîa ûvetwe wîra ûcio.

²² Mbûri îo nîkaathiî na mevia monthe ma andû a Isiraeli na kûu werûrî kûndû gûtatûûraga andû.

²³ “Aroni nîagaacoka atonye îgemarî rîa Ngai-Mûnene, arute nguo cia ûthînjîri-Ngai irîa arekîrîte mbere ya atonye vandû varîa vatheru Mûno, na aitige kuo.

²⁴ Nwanginya akeethambîria vandûrî varîa vatheru na ekîre nguo ciake. Vuva wa ûguo, nîakaauma na arute îtega rîa kûvîvua nîûndû wa kûtheria mevia make ke mwene na arute îtega rîa kûvîvua nîûndû wa kûtheria mevia ma andû.

²⁵ Nîakaavîvîria maguta ma nyamû cia îtega rîa kûtheria mevia îgûrû rîa metha ya kîgongoona.

²⁶ Mûndû ûrîa warekererie mbûri îkîthiî na kûu werûrî kûrî Azazeli nî akaathambia nguo ciake na ethambie mbere ya acoka kûrî andû acio engî.

²⁷ Ndegwa na mbûri irîa ciarutirwe irî îtega rîa kûtheria mevia, irîa nthakame yacio yavirirwe vandû varîa vatheru Mûno nîûndû wa kûtheria mevia, nîkaavirwa na kûu nja ya kûrîa andû matûûraga. Nacio njûo cia nyamû icio, nyama, na mara vamwe na tatha nî ikaavîvua.

²⁸ Nake mûndû ûrîa ûkaaivîvia nîagaacoka athambie nguo ciake na ethambie mbere ya acoka kûrî andû acio engî.

Kûririkana mûthenya wa kûtherua mevia

²⁹ “Mawatho mama marûmîrîrîte nîmatûûra marûmagîrîrwa nî mue: Mûthenya wa îkûmi mwerirî wa mûgwanja andû a Isiraeli vamwe na ageni arîa matûûranagia nao nwanginya menyerekagie na matikarutage wîra wanarî ûrîkû.

³⁰ Mûthenya ûcio nîguo wa mambura ma kûtheria mevia mao monthe, nîguo methîrwe marî atheru.

³¹ Ûcio nî mûthenya mwamûre, ûrîa andû magîrîrwe nî kwînyerekia na matikarute wîra wanarî ûrîkû. Mawatho mama nî matûûra marûmagîrîrwa.

³² Mûthînjîri-Ngai Mûnene ûrîa wamûrîtwe nîguo atuîke Mûthînjîri-Ngai Mûnene vuva wa îthe, nîke ûkaarûtha mambura ma kûtheria mevia ekîrîte nguo cia ûthînjîri-Ngai.

³³ Nîakaarûtha mambura ma kûtheria vandû varîa vatheru Mûno, îgema rîa Ngai-Mûnene, metha ya kîgongoona, athînjîri-Ngai, na andû onthe a Isiraeli.

³⁴ Mawatho mama nîmatûûra marûmagîrîrwa. Mambura mama nwanginya marûthagwe riita rîmwe wa mwaka nî mûthînjîri-Ngai nîûndû wa kûtheria mevia monthe ma andû a Isiraeli.” Kwoguo Musa nîwekire wata ûrîa Ngai-Mûnene aathanîte.