Alawi 13 - ÎVUKU RÎA ÛVORO MWARO

Mawatho megiî mîrimû ya ngothi

¹ Ngai-Mûnene nîwerire Musa na Aroni atîrî,

² “Ethîrwa mûndû wa wonthe nîakaagîa na îtoo kana nyimba kana ûvere ngothirî yake na wonekane ta ûngîtuîka mûrimû mûcûku wa ngothi, mûndû ûcio nîakaavirwa kûrî mûthînjîri-Ngai Aroni kana kûrî ûmwe wa athînjîri-Ngai.

³ Mûthînjîri-Ngai nîakaaroria îtoo rîu, na ethîrwa njuîrî irîa irî îtoorî rîu nî ngarûrûku igatuîka cia rangi njerû na îtoo rîu rîthîrwe rîrî rîrikîru ndaarî ya ngothi, ûcio nî mûrimû mûcûku wa ngothi na mûthînjîri-Ngai nîakaauga atî mûndû ûcio tî mûtheru.

⁴ Nwatî ethîrwa îtoo nî rîîrî rîcerû na rîtakwoneka rîrî rîrikîru ndaarî ya ngothi nacio njuîrî ciîthîrwe itarî ngarûrûku ituîka cia rangi mûcerû, mûthînjîri-Ngai nîakaaiga mûndû ûcio vandû arî wenga îvinda rîa mîthenya mûgwanja.

⁵ Mûthînjîri-Ngai nîakaaroria mûndû ûcio riita rîa kaîrî mûthenyarî wa mûgwanja na angîona îtoo rîtarî rîrendu, nîakaaiga mûndû ûcio vandû rîngî arî wenga îvinda rîa mîthenya mûgwanja.

⁶ Mûthînjîri-Ngai nîakaaroria mûndû ûcio rîngî mûthenyarî wa mûgwanja na ona, atî îtoo rîu nîrîravona na mûrimû wîthîrwe ûtarî mûrendu nîakaauga atî mûndû ûcio nî mûtheru; na atî nî îtoo tu rîtigaru. Mûndû ûcio nîakaathambia nguo ciake na nîagaatuîka mûtheru.

⁷ Nwatî ethîrwa îtoo nwa rîrende vuva wa mûthînjîri-Ngai kûmûroria na kuga atî nî mûtheru, nwanginya akeeyonania rîngî kûrî mûthînjîri-Ngai.

⁸ Mûthînjîri-Ngai nîakaamûroria rîngî, na ethîrwa mûrimû ûrî mûrendu, mûthînjîri-Ngai nîakaauga atî mûndû ûcio tî mûtheru; ûcio nî mûrimû mûcûku wa ngothi.

⁹ “Mûndû wa wonthe angîkaanyitwa nî mûrimû mûcûku wa ngothi, nîakaavirwa kûrî mûthînjîri-Ngai

¹⁰ Mûthînjîri-Ngai nîakaamûroria. Ethîrwa mûndû ûcio arî na îtoo rîîrî rîcerû ngothirî yake na rîgatûma njuîrî icerûve na rîrî na mavira,

¹¹ ûcio nî mûrimû ûtangîvora wa ngothi. Mûthînjîri-Ngai nîakaauga atî mûndû ûcio tî mûtheru. Gûtirî vata wa kwiga mûndû ûcio arî wenga nîûndû tî mûtheru.

¹² Nwatî ethîrwa mûrimû ûcio wa ngothi ûtambîte mwîrî wonthe kuuma kîongo nginya magûrû,

¹³ mûthînjîri-Ngai nîakaaroria mûndû ûcio rîngî, na ethîrwa nîakaamenya nama atî mûrimû ûcio nîûtambîte mwîrî wonthe, nîakaauga atî mûndû ûcio nî mûtheru. Ethîrwa ngothi ya mûndû ûcio îrî ngarûrûku îgatuîka îno njerû, mûndû ûcio nî mûtheru.

¹⁴ Nwatî ethîrwa arî na îtoo rîtûrîkîte ngothirî, mûndû ûcio tî mûtheru.

¹⁵ Mûthînjîri-Ngai nîakaaroria îtoo rîu, na nîakaauga atî mûndû ûcio tî mûtheru. Îtoo rîonanagia mûrimû mûcûku wa ngothi.

¹⁶ Nwatî rîrîa îtoo rîkaavora na rîcerûve rîngî, mûndû ûcio nîakaathiî kûrî mûthînjîri-Ngai,

¹⁷ nake mûthînjîri-Ngai nîakaamûroria rîngî. Na ethîrwa îtoo rîrî rîgarûrûku rîgacerûva mûndû ûcio nî mûtheru, nake mûthînjîri-Ngai nîakaauga atî mûndû ûcio nî mûtheru.

¹⁸ “Mûndû angîthîrwa arî na îvûva rîrî îvoru

¹⁹ na vuvarî vandû vau vagîe na îtoo rîîrî rîcerû kana rîthîrwe rîtukanîtie rangi ndune na njerû, mûndû ûcio nîakaathiî kûrî mûthînjîri-Ngai na amwonie vandû vau.

²⁰ Mûthînjîri-Ngai nîakaaroria vandû vau, na ona varî varikîru ndaarî ya ngothi na njuîrî ciavo igatuîka ino njerû, mûthînjîri-Ngai nîakaauga atî mûndû ûcio tî mûtheru. Ûcio nî mûrimû mûcûku wa ngothi umîrîte îvûvarî.

²¹ Nwatî mûthînjîri-Ngai angîroria îvûva rîu na one atî njuîrî ciarîo tî njerû na vethîrwe vatarî varikîru ngothirî na vatarî varendu, mûthînjîri-Ngai nîakaamûrania mûndû ûcio na andû acio engî îvinda rîa mîthenya mûgwanja.

²² Vuvarî îvûva rîu rîngîtamba, mûthînjîri-Ngai nîakaauga atî mûndû ûcio tî mûtheru; vandû vau nî vanyite nî mûrimû.

²³ Nwatî rîngîrega gûtamba, kau nî karema ka îvûva na mûthînjîri-Ngai nîakaauga atî mûndû ûcio nî mûtheru.

²⁴ “Ûvororî wîgiî mûndû avîte nî mwaki, narîo îvîîra rîu rîcerûve kana rîthîrwe rîtukanîtie rangi ndune na njerû,

²⁵ mûthînjîri-Ngai nîakaarîroria. Ethîrwa njuîrî irîa irî îvîrarî rîu igarûrûkîte igatuîka njerû na rîrî rîrikîru rûûorî, ûcio nî mûrimû mûcûku wa ngothi wambîrîrîtie kuuma îvîraarî, nake mûthînjîri-Ngai nîakaauga atî mûndû ûcio tî mûtheru.

²⁶ Nwatî mûthînjîri-Ngai angîroria îvîraa rîu na one atî njuîrî ciarîo tî njerû na rîthîrwe rîtarî rîrikîru rûûorî na rîtarî rîrendu, mûthînjîri-Ngai nîakaamûrania mûndû ûcio na andû acio engî îvinda rîa mîthenya mûgwanja.

²⁷ Mûthînjîri-Ngai nîakaamûroria mûthenya wa mûgwanja, na angîkoona atî nîûratamba ngothirî, mûthînjîri-Ngai nîakaauga atî mûndû ûcio tî mûtheru. Ûcio nî mûrimû mûcûku wa ngothi.

²⁸ Nwatî îvîîra rîu rîngîrega kûgarûrûka na rîrege kûrenda, kîu nî kîrema Kîam îvîîra; nake mûthînjîri-Ngai nîakaauga atî mûndû ûcio nî mûtheru.

²⁹ “Mûndûmûrûme kana mûndûmûka angîthîrwa arî na îtoo kîongorî kana kîrerurî gîake,

³⁰ mûthînjîri-Ngai nîakaaroria îtoo rîu. Ethîrwa rîkîoneka rîrî rîrikîru rûûorî, na njuîrî ciarîo ciîthîrwe irî cia erûû na irî njeke, ûcio nî mûrimû mûcûku wa ngothi. Mûthînjîri-Ngai nîakaauga atî mûndû ûcio tî mûtheru.

³¹ Nwatî mûthînjîri-Ngai angîkaaroria îtoo rîu na one rîtarî rîrikîru rûûorî, na rîthîrwe rîtarî na njuîrî ino mbirû, mûthînjîri-Ngai nîakaamûrania mûndû ûcio na andû acio engî îvinda rîa mîthenya mûgwanja.

³² Mûthînjîri-Ngai nîakaaroria îtoo rîu rîngî mûthenya wa mûgwanja na ethîrwa rîtarî rîtambu na rîtarî na njuîrî cia erûû na rîthîrwe rîtarî rîrikîru ngothirî,

³³ mûndû ûcio nîakeenja njuîrî ciake tiga cia vandû varîa varigicîrîtie îtoo. Mûthînjîri-Ngai nîakaamûrania mûndû ûcio na andû acio engî îvinda rîngî rîa mîthenya mûgwanja.

³⁴ Mûthenya wa mûgwanja mûthînjîri-Ngai nîakaaroria rîngî îtoo rîu na ethîrwa rîtarî rîrendu na rîoneke rîtarî rîrikîru rûûorî, mûthînjîri-Ngai nîakaauga atî mûndû ûcio nî mûtheru. Nake mûndû ûcio nîakaathambia nguo ciake, na nîagaatuîka mûtheru.

³⁵ Nwatî îtoo rîngîgaatamba vuva wa mûthînjîri-Ngai kuga atî mûndû ûcio nî mûtheru,

³⁶ mûthînjîri-Ngai nîakaaroria mûndû ûcio rîngî. Îtoo rîngîthîrwa rîrî rîtambu, gûtirî vata wa mûthînjîri-Ngai gûcaria njuîrî cia erûû, nîûndû mûndû ûcio nama tî mûtheru.

³⁷ Nwatî mûthînjîri-Ngai angîtua atî îtoo tî rîtambu na njuîrî ino mbirû nîirauma, îtoo rîu nî rîvoru na mûthînjîri-Ngai nîakaauga atî mûndû ûcio nî mûtheru.

³⁸ “Rîrîa mûndûmûrûme kana mûndûmûka agîa na kûndû kûthererûku ngothirî,

³⁹ mûthînjîri-Ngai nîakaaroria mûndû ûcio. Angîona kûndû kûu kûrî na rangi njerû îrî nthitu, ûcio tî mûrimû mûcûku wa ngothi, mûndû ûcio nî mûtheru.

⁴⁰ “Mûndûmûrûme angîthira njuîrî kîongo agîe na kîvara, ethagîrwa arî mûtheru.

⁴¹ Na ethîrwa kîvara kiumîte vuva nginya mwena wa mbere, kîu nî kîvara arî nakîo, nî mûtheru.

⁴² Nwatî mûndû angîgîa na îtoo kîvararî gîake rîrî na nthakame îtukanîte na mavira, ûcio nî mûrimû mûcûku wa ngothi.

⁴³ Mûthînjîri-Ngai nîakaamûroria, na ethîrwa kîvara kîrî na îtoo rîrî na mavira matukanîte na nthakame ta mûndû ûrî na mûrimû mûcûku wa ngothi,

⁴⁴ mûthînjîri-Ngai nîakaauga atî mûndû ûcio tî mûtheru nîûndû wa mûrimû mûcûku wa ngothi ûcio ûrî kîongorî gîake.

⁴⁵ “Mûndû ûrwarîte mûrimû mûcûku wa ngothi agekagîra nguo ino ndembûkangu, ndagaacanûra njuîrî na agekunîkaga mwena wa ngurumo wa ûthiû wake na njara na akanîrîra atî, ‘Ndirî mûtheru, Ndirî mûtheru!’

⁴⁶ Mûndû ûcio akethagîrwa atarî mûtheru rîrîa rîonthe akethagîrwa arûarîte mûrimû ûcio, kwoguo agaatûûraga nja ya kûrîa andû acio engî matûûraga.

Mawatho megiî nguo îrî na gîko kîa mûrimû mûcûku wa ngothi

⁴⁷ “Rîrîa nguo îrî na gîko kiumanîte na mûrimû mûcûku wa ngothi wana yethîrwa îrî ya guoya, nguo ndaca,

⁴⁸ nguo ya gîtambaa Kîam guoya, rûûo kana kîndû wa kîonthe gîtumîtwe na rûûo;

⁴⁹ ethîrwa gîko kîu gîkîonania rangi ya mathangû kana îno ndune, kîu nî gîko kiumanîte na mûrimû mûcûku wa ngothi na nwanginya îkoonanua kûrî mûthînjîri-Ngai.

⁵⁰ Mûthînjîri-Ngai nîakaaroria kîndû kîu kîgwatîtwe nî gîko kîu na akige kîrî kîonga îvinda rîa mîthenya mûgwanja.

⁵¹ Nîagaacoka arorie kîndû kîu mûthenya wa mûgwanja, na ethîrwa gîko kîu kîrî kîongerereku, kîu nî gîko kiumanîte na mûrimû mûcûku wa ngothi, na nguo îo tî ntheru.

⁵² Mûthînjîri-Ngai nîakaavîvia nguo îo nîûndû kîu nî gîko kiumanîte na mûrimû mûcûku wa ngothi na gîtingîthira nwa kîthirirue na mwaki.

⁵³ “Nwatî rîrîa mûthînjîri-Ngai akaaroria nguo îo na one atî gîko kîu tî gîtambu

⁵⁴ nîakaathana nguo îo îthambue na igwe rîngî îvinda rîa mîthenya mûgwanja.

⁵⁵ Nguo îo yarîkia kûthambua, mûthînjîri-Ngai nîakaamîroria, na ethîrwa varîa gîko kîrî vatagarûrûkîte rangi wana ethîrwa vatarî vatambu, nguo îo îrî na gîko. Mwene nguo îo nîakaamîvîvia wana ethîrwa gîko kîu kîrî mwena wa ndaarî kana wa nja wa nguo îo.

⁵⁶ Nwatî mûthînjîri-Ngai angîmîroria rîngî na one varîa gîko kîu kîrarî varî vathararu, nîagaatembûra gacunjî kau karî na gîko kuuma nguorî îo kana rûûorî rûu.

⁵⁷ Gîko kîu kîngîcoka kîoneke rîngî, ûguo nî kwonania atî nîkwa kîratamba, nake mwene nguo îo nîakaamîvîvia.

⁵⁸ Nwatî angîthambia nguo îo na gîko kîu kîrege kwoneka rîngî, nîakaamîthambia riita rîa kaîrî na nîkaathera.”

⁵⁹ Mau nîmo mawatho megiî gîko kiumanîte na mûrimû mûcûku wa ngothi ûrî nguorî, îthîrwe îrî ya vamba, nguo ndaca, gîtambaa Kîam guoya, kana kîndû wa kîonthe gîtumîtwe na rûûo. Mawatho mau nîmo makaamûvotithagia gûtua kana nguo îo nî kîtheru kana tî kîtheru.