Alawi 11 - ÎVUKU RÎA ÛVORO MWARO

Nyamû irîa ciagîrîrwe nî kûrîwa

¹ Ngai-Mûnene nîwerire Musa na Aroni atîrî,

² “Îra andû a Isiraeli atî: Gatagatîrî ka nyamû irîa itûûraga nthî, nwa mûrîe

³ nyamû irîa irî mavûngû matûkanu irîa icokagîra.

⁴ Nwatî mûtikarîe ngamîîra, nîûndû nîîcokagîra, nwatî itirî mavûngû matûkanu. Nyamû îo îrî mûgiro kûrî mue.

⁵ Mûtikarîe îthiiî, nîûndû nîrîcokagîra, nwatî îvûngû rîarîo tî rîatûkanu; Rîrî mûgiro kûrî mue.

⁶ Mûtikarîe mbûkû, nîûndû nîcokagîra, nwatî mavûngû mayo tî matûkanu; îrî mûgiro kûrî mue.

⁷ Mûtikarîe ngûrwe, nîûndû mavûngû mayo nîmatûkanu, nwatî ndîcokagîra îrî mûgiro.

⁸ Mûtikarîe nyamû icio kana mûvûrûria ciimba ciacio, nîûndû irî mûgiro kûrî mue.

⁹ “Nwa mûrîe nyamû cionthe irîa itûûraga manjîrî na irî tûnyamû tûrîa tûtûmaga ithiî twîkariî ta mathagu na irî tûkoro;

¹⁰ nwatî mûtikarîe nyamû wa cionthe itûûraga manjîrî itarî na tûnyamû tûrîa tûtûmaga ithiî twîkariî ta mathagu na itirî tûkoro nî mûgiro kûrî mue.

¹¹ Ciûmbe ta icio irî mûgiro, na mûtikaarîa kana mûvûrûria ciimba ciacio.

¹² Kîndû kîonthe gîtûûraga manjîrî na gîtirî na tûnyamû tûrîa tûtûmaga kîthiî twîkariî ta mathagu na gîtirî tûkoro, kîrî mûgiro kûrî mue.

¹³ “Iconi ino irûmîrîrîte irî mûgiro; kwoguo mûtikairîe: mvûngû, nderi, ndiiû,

¹⁴ kîgî, ngoru;

¹⁵ ikûngûrû cia mîthemba yonthe,

¹⁶ nyaga, kîvangariûki, ithumambûri,

¹⁷ ndundu, cûcû wa njoka, mwang'au,

¹⁸ ngune, njûmbaine,

¹⁹ mûndûndûkwa, nthiûriû, kîroro kana mvuvu.

²⁰ “Tûgunyû tuonthe tûrî mathagu na tûthiîcaga na magûrû mana nî mûgiro kûrî mue.

²¹ Nwatî nwa mûrîe tûnyamû tûrîa tûrî mathagu na tûrî magûrû na tûthiîcaga tûkîrûgarûgaga.

²² Nwa mûrîe ngige cia mîthemba yonthe, ngiria kana mvaranyû.

²³ Nwatî tûnyamû tûu twîngî tuonthe tûrîa tûrî mathagu na tûrî magûrû mana nî mûgiro kûrî mue.

²⁴ “Mûndû wa wonthe ûkaavûrûria ciimba cia nyamû ino akethîrwa arî na mûgiro nginya kîvwaî.

²⁵ Mûndû wa wonthe ûgaakuua gîcunjî gîa ciimba cia nyamû icio akeethîrwa arî na mûgiro nginya kîvwaî, na nguo ciake nwanginya ithambue.

²⁶ Nyamû wa yonthe îrî mavûngû matarî matûkanu na îtacokagîra, mûndû wa wonthe ûkaamîvutia nîakaanyitwa nî mûgiro.

²⁷ Nyamû cionthe irî ithu na ithiîcaga na magûrû mana irî mûgiro kûrî mue. Mûndû wa wonthe ûkaavutia ciimba cia cio nîakaagwatwa nî mûgiro nginya kîvwaî.

²⁸ Mûndû wa wonthe ûgaakuua ciimba ciacio nwanginya akaathambia nguo ciake nîûndû akethîrwa arî na mûgiro nginya kîvwaî.

²⁹ “Nyamû ino irûmîrîrîte nî mûgiro kûrî mue; Mbuko, mbîa, ngaara,

³⁰ mîthemba yonthe ya ndikathi, na mîriû.

³¹ Nyamû icio cionthe ikurumaga irî mûgiro kûrî mue. Mûndû wa wonthe ûkaavûrûria ciimba ciacio akethîrwa arî na mûgiro nginya kîvwaî.

³² Ciimba ciacio ingîkaagwîra kîndû wa kîonthe wana ethîrwa kîrî ta kanuku ka mûtî, gîtambaa, rûûo rwa nyamû, kana nguo ya vamba wana ciethîrwa itûmagîrwa atîa, ikethîrwa irî mûgiro nginya kîvwaî. Nwanginya ikaathambua nîguo ithere.

³³ Ciimba cia tûnyamû tûu ingîkaagwîra nyûngû ya yûmba, indo cionthe ikethîrwa ndaarî ya nyûngû îo ikethîrwa irî mûgiro na nwanginya mûkaaûraga nyûngû îo.

³⁴ Irio wa cionthe mbîtîkîrie kûrîwa, nwatî ciîthîrwe ciîtîkîrîtwe nî manjî maumîte nyûngûrî îo ikethîrwa irî mûgiro, na kîndû wa kîonthe kîngînyuwa kiumîte nyûngûrî îo gîkethîrwa kîrî mûgiro.

³⁵ Kîndû wa kîonthe kîngîgwîrwa nî ciimba gîkethîrwa kîrî mûgiro, wana ethîrwa nî riiko rîa kûrugîra irio nîrîgaacûkangua.

³⁶ Kûnarî ûguo, kîthima Kîam manjî kana kîriko kîrî na manjî na kimba gîcoke kîgwe kuo, manjî mau makethîrwa marî matheru. Nwatî mûndû wa wonthe ûkaaruta kimba kîu kuo akethîrwa arî mûgiro.

³⁷ Kimba kîngîkaagwîra mbegû cia kûvanda, mbegû icio ikethîrwa itarî mûgiro.

³⁸ Nwatî ethîrwa mbegû irî ninde manjîrî nakîo kimba kîigwîre, mbegû icio ikethîrwa irî mûgiro.

³⁹ “Ethîrwa nyamû wa yonthe mbîtîkîrie kûrîwa nwa îkue, mûndû ûrîa ûkaavûrûria kimba Kîamyo akethîrwa arî mûgiro nginya kîvwaî.

⁴⁰ Nake mûndû ûrîa ûkaarîa nyama cia kimba kîu, nwanginya akaathambia nguo ciake, nwatî akethîrwa arî mûgiro nginya kîvwaî; mûndû wa wonthe ûgaakuua kimba nwanginya akaathambia nguo ciake, nwatî akethîrwa arî mûgiro nginya kîvwaî.

⁴¹ “Nyamû cionthe irîa ikurumaga gûkû nthî irî mûgiro kûrî mue, mûtikairîe.

⁴² Kîndû wa kîonthe gîkurumaga na îvu, kîndû wa kîonthe kîthiîcaga na magûrû mana, kana kîrî magûrû meengî. Nyamû icio irî mûgiro.

⁴³ Mûtikegwatie mûgiro na njîra ya kûrîa wanarî kamwe ga tûnyamû tûu.

⁴⁴ Nie nînie Ngai-Mûnene, Ngai wenyu na nwanginya mwîkare mûrî atheru nîûndû nîrî mûtheru.

⁴⁵ Nînie Ngai-Mûnene ûrîa wamûrutire vûrûrirî wa Misiri nîguo nduîke Ngai wenyu. Kwoguo nwanginya mwîthîrwe mûrî atheru nîûndû Nie nîrî mûtheru.”

⁴⁶ Mau nîmo mawatho megiî nyamû cionthe na iconi, indo cionthe irîa itûûraga manjîrî na indo cionthe irîa ikurumaga gûkû nthî.

⁴⁷ Nwanginya mwîkîre ngûrani gatagatî ka indo irîa irî mûgiro na irîa itarî, gatagatî ka nyamû irîa ingîrîwa na irîa itangîrîwa.