Alawi 1 - ÎVUKU RÎA ÛVORO MWARO

Magongoona ma kûvîvua

¹ Ngai-Mûnene arî îgemarî nîwetire Musa na akîmwîra atîrî,

² “Aria na andû a Isiraeli ûmere atî; “Rîrîa mûndû wa wonthe akûrutîra Ngai-Mûnene matega, akaarutaga ng'ombe, ng'ondu, kana mbûri kuuma ndîthiarî yake.

³ Ethîrwa akîruta ng'ombe kuuma ndîthiarî yake îrî îtega rîa kûvîvua, akaaruta ndegwa îtarî na wonje wanarî ûrîkû. Akaamîruta arî mûromorî wa îgema rîa Ngai-Mûnene nîguo Ngai-Mûnene amwîtîkîre.

⁴ Mûndû ûcio nî akaaigîrîra njara yake kîongorî Kîam nyamû îo îkûrutwa îrî îtega rîa kûvîvua, nayo nîgetîkîrîka nîûndû wake nîguo rîmûtherie mevia.

⁵ Nî akaaûragîra ndegwa îo vau mbere ya Ngai-Mûnene nao athînjîri-Ngai a nyomba ya Aroni, nîmagaategera Ngai-Mûnene nthakame, macoke mamîminjaminje mîenarî yonthe ya metha ya kîgongoona îo îrî vau mûromorî wa îgema rîa Ngai-Mûnene.

⁶ Mûndû ûcio nîagaacoka athînje nyamû îo ya îtega rîa kûvîvua na amîtinangie icunjî.

⁷ Athînjîri-Ngai acio nîmakaavanga ngû îgûrû rîa metha ya kîgongoona na makie mwaki.

⁸ Athînjîri-Ngai acio a nyomba ya Aroni nî makaavanga kîongo na mathunya vamwe na icunjî icio ciîngî cia nyamû îo mwakirî îgûrû rîa metha ya kîgongoona.

⁹ Nwatî nîakaathambia mara ma ndegwa îo vamwe na mathagiro, nake mûthînjîri-Ngai aivîvîrie îgûrû rîa metha ya kîgongoona rîrî îtega rîa kûvîvua. Mûtararûko wa îtega rîu nîûkenagia Ngai-Mûnene.

¹⁰ “Ethîrwa mûndû nîaruta ng'ondu kana mbûri kuuma ndîthiarî yake îrî îtega rîa kûvîvua, nwanginya îkethîrwa îrî ndûrûme kana nthenge îtarî na wonje.

¹¹ Nî akaamîûragîra mwena wa rûgûrû wa metha ya kîgongoona mbere ya Ngai-Mûnene, nao athînjîri-Ngai a nyomba ya Aroni nîmakaaminjaminja nthakame yayo mîenarî yonthe ya metha ya kîgongoona.

¹² Mûndû ûcio nîagaacoka atinangie nyamû îo icunjî, nake mûthînjîri-Ngai avange icunjî icio vamwe na kîongo na mathunya mwakirî îgûrû rîa metha ya kîgongoona.

¹³ Mûndû ûcio nîakaathambia mara vamwe na mathagiro, nake mûthînjîri-Ngai aivîvîrie îgûrû rîa metha ya kîgongoona rîrî îtega rîa kûvîvua. Mûtararûko wa îtega rîu nîûkenagia Ngai-Mûnene.

¹⁴ “Ethîrwa mûndû nîaruta iconi rîrî îtega rîa kûvîvua kûrî Ngai-Mûnene, nîakaaruta ndutuura îtarî ngûrû kana îcîa rîtarî rîkûrû.

¹⁵ Mûthînjîri-Ngai nîakaathiî nayo metharî ya kîgongoona amîthiore ngingo îtuîkane, acoke avîvîrie kîongo Kîamyo îgûrû rîa metha ya kîgongoona; nayo nthakame yayo îtûrûrwe mwenarî wa metha ya kîgongoona.

¹⁶ Nî akaaruta ndûndî ya gîconi kîu vamwe na tatha yayo na acikie varîa mûu wikagua mwena wa îrathîro varaca na metha ya kîgongoona.

¹⁷ Nîagaacoka amînyite mathagu na amîtarûranie, nwatî ndakaamîtucanie, na amîvîvîrie îgûrû rîa metha ya kîgongoona rîrî îtega rîa kûvîvua. Mûtararûko wa îtega rîu nîûkenagia Ngai-Mûnene.”