Akol 4 - ÎVUKU RÎA ÛVORO MWARO

¹ Mue athani, îkagani ngombo cienyu maûndû marîa marî na kîvooto na waragania. Menyagani atî wa namue mûrî na Mwathani îgûrû.

Mataaro

² Kîragîrîriani kûvoya mwîîguîte na mûgîcokagîria Ngai ngatho.

³ Na rîrîa rîonthe mûkûvoya, tûvoyagîreni wa natue, nîguo Ngai atûvecage kanya karo ga kûvunjia ndûmîrîri îgiî nthitho ya Kristû. Kîu nîkîo gîtûmîte njovwe njeera.

⁴ Mvoyagîrani nîguo nîmîanagîrîre na njîra îgûtaûkîra andû waro wata ûrîa mbagîrîrwe nî gwîka.

⁵ Îthagîrwani mûrî na ûûgî rîrîa mûgwîka maûndû gatagatîrî ka andû arîa matetîkîtie Kristû. Vûthagîrani waro kanya wa konthe karîa mwagîa nako.

⁶ Vîndî cionthe mîario yenyu nî îthagîrwe îrî mîaro na ya kwendeka, na mûmenyage ûrîa mwagîrîrwe nî gûcokeria andû onthe ciûria na njîra mbaro.

Ngethi cia mûthiia

⁷ Tukiko nîke ûkaamûva ûvoro wonthe ûmbîgiî. Ke nî mûrû wa îthe wetû ûrîa twendete mûno. Ke nî mûtungatîri mwîvokeku na nîtûrutithanagia wîra wa Mwathani nake.

⁸ Kîu nîkîo gîatûma nîmûtûme kûrî mue, nîguo amwîre maûndû marîa tûrona na amûûmîrîrie.

⁹ Nîmaûka marî na mûrû wa îthe wetû Onesimo, ûrîa twendete na twîvokete na umîte kûu kwenyu. Nîmakûmwîra maûndû monthe marîa marekîka gûkû.

¹⁰ Nîmwakethua nî Arisitariko ûrîa twovetwe njeera nake, wana Maariko mûrwethe wa Baranaba. (Mue nîmûrîkîtie gûtaarwa atî Maariko angîûka, mûmûgwate ûgeni).

¹¹ Wana Joshua ûrîa wîtagwa Jusito nîwamûkethia. Aya athatû nîo Ayahudi arîa metîkîtie Kristû, na nîo tûrutithanagia wîra nao nîûndû wa Ûthamaki wa Ngai na nîmandethetie mûno.

¹² Epafara ûrîa umîte kûu kwenyu nîwamûkethia. Ke nî ndungata ya Jesû Kristû na nîamûvoyagîra mûno vîndî cionthe, atî mwîkarage mûrî agima na mûtarî na nganja wîtîkiorî wenyu na mûkîathîkagîra wendi wa Ngai.

¹³ Nie nwa nduîke mûira wake, atî ke nîmûrutu wîra mûmû nîûndû wenyu na nîûndû wa andû arîa marî Laodikia na Hierapoli.

¹⁴ Nîmwakethua nî Luka, ndagîtarî wetû ûrîa twendete mûno. Wana Dema nîwamûkethia.

¹⁵ Kethiani ariû na aarî a îthe wetû arîa marî Laodikia, na mûkethie Numifasi na kanitha îrîa îcemanagia gwake nyomba.

¹⁶ Mwarîkia kûthomerwa maarûa îno, mînenganîreni kûrî kanitha îrîa îrî Laodikia, nîguo wanao mathomerwe yo. Namue mûgaacoka mûthome maarûa îrîa ariû na aarî a îthe wetû a Laodikia makaamûtûmîra.

¹⁷ Îrani Arikipo atîrî, “Geria wa ûrîa ûngîvota nîguo ûrîkie wîra ûrîa waveerwe ûtungatarî wa Mwathani.”

¹⁸ Nie Paûlo nînie nandîka ngethi ino na njara ciakwa. Mûtikariganîrwe atî nîrî mwove njeera. Mûrogîa na wega wa Ngai.