Akol 2 - ÎVUKU RÎA ÛVORO MWARO

¹ Nie nîrenda mûmenye ûrîa ndutîte wîra mûmû nîûndû wenyu na nîûndû wa andû a îtûûra rîa Laodikia na nîûndû wa andû arîa engî onthe mataanamona.

² Mbîkaga ûguo nîguo andû acio magîe na ûmîrîru na magwatanue vamwe nî wendani na magîe na ûtonga wa gûtaûkîrwa nî ûmenyo wa nthitho ya Ngai viû, îrîa arî yo Kristû ke mwene.

³ Naguo Mûthithû wa ûûgî na ûmenyo nîûthithîtwe varî Kristû.

⁴ Nîramwîra ûguo nîguo mûtikanetîkîrie mûndû wana ûrîkû amûveenererie na mîario ya maveeni, wana ethîrwa îkîoneka îrî mîaro atîa.

⁵ Nîûndû wana ethîrwa tûtirî vamwe kîîmwîrî, tûrî vamwe kîîroho na nîreciria ûrîa mûngîtetheka. Nîngenete nî kwona mûvango wenyu mwaro na ûrîa mûtwîre mwîtîkîtie Kristû mwîkindîrîtie.

Ûtûûro mwîcûru ndaarî ya Kristû

⁶ Nîûndû nîmwamûkîre Jesû Kristû, tûûrani mûrî kîndû kîmwe nake mûrî na ûrûmwe na Jesû Kristû, nîûndû mwîetîkîru atî ke nîke Mwathani wenyu.

⁷ Tûûragani mwîvandîte ndaarî yake na ûtûûro wenyu ûtumîtwe îgûrû rîake. Îthagîrwani mûrî na vinya wîtîkiorî wenyu wata ûrîa mwathomithirue mwîcûrîtwe nî ngatho.

⁸ Geragiani kwona atî mûtiratuwa ngombo nî mûndû wana ûrîkû na njîra ya ûûgî ûrîa andû maveenanagîrîria naguo, ûrîa ûtiganagîrwa nî andû na umîte kûrî maaroho marîa mathanaga gûkû nthî, nwatî ndumîte kûrî Kristû.

⁹ Nîûndû Kristû ethagîrwa arî na ûngai mwîcûru ûmûndûrî wake.

¹⁰ Kristû ûcio ûtûmîte mûgîe na mwoyo mwîcûru mûrî ûrûmwe nake, nîke mûnene wa maaroho marîa mengî monthe mathamakaga na mathanaga.

¹¹ Nîûndû wa kwîthîrwa mûrî ndaarî ya Kristû, nîmwarwithirue. Mûtiarwithua na njara cia andû, nwatî nî îrua rîrîa rîathondekirwe nî Kristû rîrîa rîatûtethûrire kuuma kûrî maavinya ma mîîrî yetû îrîa îvagia.

¹² Nîûndû rîrîa mwavatithirue, nîmwathikirwe vamwe na Kristû, na vîndî wa îo mûkîriûkua vamwe nake nîûndû wa gwîtîkia vinya wa Ngai ûrîa ûrutaga wîra na wariûkirie Kristû.

¹³ Vîndî îmwe mwarî akuû kîîroho nîûndû mwarî evia na mwarî andû a Ndûrîrî arîa matarî watho. Nwatî rîu Ngai nîarîkîtie kûmûva mwoyo vamwe na Kristû, na agatwovera mevia metû monthe.

¹⁴ Nîwavutire mûtaratara wa thirî îrîa yonanîtue nî watho atî twarî tûrîve. Thirî îo nîwamîthengutirie viû vîndî îrîa aamîvûrîre mîcumarî mûtharavarî.

¹⁵ Na mûtharavarî ûcio nîvo Kristû eetethûrire kuuma kûrî maavinya ma maaroho marîa maathamakaga na maathanaga. Ke nîwamanyûrûririe na njîra ya kûmatongoria mbere ya andû na wa vo akîonania atî aarî na ûvootani îgûrû rîa maroho na maavinya mau.

¹⁶ Kwoguo mûtikaanetîkîrie mûndû wana ûrîkû amûtuîre kîrîa mûkûrîa, kana kîrîa mûkûnyua wana kana ûrîa mûkûrûmîrîra mîthenya mîthuure, kana irugo cia mweri mûcerû, wana kana thavatû.

¹⁷ Maûndû mama monthe nî iruru cia maûndû marîa mageekîka vuvarî, nwatî Kristû nîke ûma.

¹⁸ Mûtigetîkîre gûtuîrwa nî mûndû wa wonthe ûrîa wendaga kwînenevia akiugaga atî ke nîwonaga cioneki, na wendaga kwîyonania ûrîa arî mwînyivia na ûrîa agoocaga araika. Mûndû ta ûcio etîîaga atarî na gîtûmi nîûndû wa meciria make ma ûmûndû,

¹⁹ na ndevokete Kristû ûrîa arîke kîongo. Kristû nîke ûvecaga mwîrî wonthe vinya na akaûnyitithania vamwe ta ûrîa mavîndî ma mwîrî wonthe manyitithanagua vamwe nî mîkiva. Kwoguo mwîrî nîûkûraga na njîra îrîa Ngai endaga ûkûre.

Gûkua na gûtûûra vamwe na Kristû

²⁰ Ethîrwa nîmwakwire vamwe na Kristû na mûgîtethûrwa kuuma kûrî maaroho marîa mathamakaga gûkû nthî na îgûrû, nîndûî vi gîtûmaga mûtûûre takwa mûrî a gûkû nthî? Nîndûî gîtûmaga mûrûmîrîre mawatho ta mama:

²¹ “Ndûgoce irio ino,” “Ndûgacame irio icio,” “Ndûkavutie irio icio ciîngî”?

²² Mawatho mama monthe maugaga ûvoro wîgiî kîrîa kîthiraga gîatûmîrwa. Mawatho mau na irîra icio itungîtwe nî andû.

²³ Mawatho mau monanagia ta marî na ûûgî nîûndû wa mîvoere îrîa maringagîrîria andû kûvoya nayo, wînyivia wa maveeni na kûverithia mwîrî. Nwatî matitethagia kûgirîrîria merirîria macûku ma mwîrî.