Ahib 9 - ÎVUKU RÎA ÛVORO MWARO

Ûrîa Ngai agoocagwa gûkû nthî na îgûrû

¹ Kîrîkanîro Kîam mbere Kîamrî na mawatho megiî kûgooca Ngai na vandû vatumîtwe nî andû va kûgoocagîra gûkû nthî.

² Kwarî na îgema rîatumîtwe na rîkagaûkanua maita maîrî. Vandû va mbere vetagwa vandû varîa vatheru. Ndaarî ya vo vaarî na vandû va kwigîrîrwa taa na metha îrî na mûgate wa kûrutîra Ngai îgongoona.

³ Vuva wa gîtambaa gîa kaîrî kûu îgemarî ndaarî kwarî na îgema rîrîa rîetagwa “Vandû varîa vatheru Mûno.”

⁴ Kûu ndaarî kwarî na metha ya kîgongoona ya thaavu ya kûvîvîrua ûbani, na nwakuo kwarî na îthandûkû rîa kîrîkanîro. Îthandûkû rîu rîavakîtwe thaavu mîena yonthe, na ndaarî yarîo kwethagîrwa kûrî na nyûngû ya thaavu îrî na maana ndaarî, mûragi wa Aroni ûrîa wathundûkîte mathangû na ivengere igîrî cia mathiga irîa ciandîkîtwe maathani.

⁵ Îgûrû rîa îthandûkû rîa kîrîkanîro kwarî na Akerubi maarî na riiri, na mo mathagu mao maakunîkîrîte varîa mevia movanagîrwa. Nwatî gaka tîko kavinda ga kwaria maûndû mama na njîra ndikîru.

⁶ Maûndû mau mavangîtwe ta ûû: Athînjîri-Ngai mathiîcaga îgemarî rîa nja wa mûthenya kûruta wîra wao wa ûtungati.

⁷ Nwatî Mûthînjîri-Ngai ûrîa mûnene nîke tu ûthiîcaga îgemarî rîa ndaarî, na ekaga ûguo riita rîmwe wa mwaka. Ke ocaga nthakame akathiî nayo îgemarî na akamîrutîra Ngai nî ûndû wake ke mwene na nîûndû wa mevia marîa andû mekîte matakûmenya.

⁸ Na njîra îno, Roho Mûtheru nîonanagia atî rîrîa rîonthe îgema rîa nja rîrî vo, njîra ya kûthiî vandû varîa vatheru Mûno tî mvingûre.

⁹ Gîkî nî kîonereria Kîam îvinda rîîrî tûrî. Maûndû mama monthe monanagia atî iveo na magongoona ma nyamû marîa tûrutagîra Ngai matingîvota gûtûma thamiri ya mûndû ûrîa ûragooca Ngai îtuîke nginyanîru.

¹⁰ Nîûndû iveo na mambura mau monanagia ûvoro wa kûrîa, kûnyua, na mambura mwanya mwanya ma kwîtheria. Mawatho mau monthe megiî ûvoro wa mwîrî, na mathiraga vinya rîrîa Ngai akathondeka ûndû mûcerû.

¹¹ Nwatî Kristû nîarîkîtie gûka ta Mûthînjîri-Ngai ûrîa mûnene wa maûndû maro marîa marî vo. Narîo îgema rîrîa atungataga nî rînene na nî rîkinyanîru mûno. Îgema rîu rîtitumîtwe na njara cia andû na tî gîcunjî kîmwe Kîam nthî îno ya kûmbwa.

¹² Rîrîa Kristû aavîtûkîre îgemarî nîwatonyire vandû varîa vatheru Mûno rita rîmwe rîa kwîgana. Ndaakuua nthakame ya mbûri na ndegwa nîguo akarute îgongoona. Vandû va ûguo, ke aavecanire mwoyo wake na agîtûma tûgîe na ûvonokio wa tene na tene.

¹³ Ethîrwa andû arîa methagîrwa marî na mûgiro nîmaminjaminjagîrua nthakame ya mbûri na ndegwa, na mûu wa mori ya ng'ombe na makathera,

¹⁴ na kinthî nthakame ya Kristû ndîngîmatheria mûno! Ke nîwerutire na njîra ya Roho wa Ngai ûrîa ûtûûraga tene na tene, nîguo atuîke îgongoona rîkinyanîru kûrî Ngai. Kwoguo nthakame yake îkaatheragia thamiri cienyu, nîguo mûtigane na ciîko irîa iretaga gîkuû, nîguo mûtungatagîre Ngai ûrîa ûtûûraga mwoyo.

¹⁵ Kwoguo Kristû nîke ûthondekaga kîrîkanîro gîcerû, nîguo arîa onthe metîtwe nî Ngai mamûkîre irathimo cia tene na tene irîa Ngai aameerîre. Ûndû ûyû wîkîkaga nîûndû nîkwîthîrîtwe kûrî na gîkuû gîa gûkûûra andû kuuma meviarî marîa meekire vîndî îrîa maathagwa nî kîrîkanîro Kîam mbere.

¹⁶ Ûvoro wîgiî kwîgaa na njîra ya kwaria kana kwandîka, nîkûvatarîte kwonanue waro atî mûndû ûcio wîgaîte nî mûkuû.

¹⁷ Nîûndû kwîgaa gûtirî vata vîndî îrîa yonthe ûrîa ûkwîgaa arî mwoyo, nwatî kûgîcaga vata arîkia gûkua.

¹⁸ Kîu nîkîo gîatûmire wana kîrîkanîro Kîam mbere kîruta wîra na njîra ya nthakame.

¹⁹ Ûndû wa mbere ûrîa Musa eekire, nî kûmenyithia andû onthe maathani monthe wata ûrîa mandîkîtwe Wathorî. Nîwacokire agîoca nthakame ya ndegwa na ya mbûri akîmîtukania na manjî, na akîmîminjaminjîria îvuku rîa Watho na kûrî andû onthe akîvûthagarî karûthanju ka Hisovu kovereretwe guoya ndune.

²⁰ Ke nîwaugire atîrî, “Nthakame îno nî mûvûri wa kîrîkanîro kîrîa Ngai aamwathire mwathîkagîre.”

²¹ Na njîra wa îo Musa nîwaminjaminjire nthakame îgemarî rîa Kîrîkanîro na indorî cionthe irîa ciatûmagîrwa kûgooca Ngai.

²² Kûringana na Watho, vakuvî indo cionthe itheragua na nthakame. Nthakame îngîrega gwîtûrûrwa mevia matingîovanîrwa.

Îgongoona rîa Kristû nîrîthengutagia mevia

²³ Kwoguo kwarî na vata indo irîa ivuana irîa irî îgûrû itherue na njîra ya magongoona mau. Nwatî indo cio mene irîa irî îgûrû nî ivatarîte mûno kûtherua na magongoona maro gûkîra mau.

²⁴ Nîûndû Kristû ndaatonyire Vandû Vatheru vatumîtwe na njara cia andû, na nîvo mûvuano wa vandû varîa va ma. Kristû aatonyire îgûrû kuo kwene. Kûu nîkuo arûngamîte mbere ya Ngai vandûrî vetû.

²⁵ Kristû ndaatonya vandû varîa vatheru Mûno nîguo erute maita meengî ta ûrîa Mûthînjîri-Ngai mûnene wa Kîyahudi aatonyaga kuo mwaka wa mwaka akuuîte nthakame ya nyamû.

²⁶ Nîûndû Kristû angîekire ûguo, nîangîatuîkire wa kûthînua maita meengî mûno kuuma rîrîa nthî yaûmbirwe. Nwatî rîu kûringana na ûrîa kûvana, aaûkire rita rîmwe rîa kwîgana mavinda monthe nîguo na njîra ya îgongoona rîake ke mwene, andû maume meviarî.

²⁷ Ûrîa kûrî nî atî mûndû wa wonthe nwanginya akue rita rîmwe, na vuva wa gûkua atuîrwe nî Ngai.

²⁸ Na njîra wata îo Kristû nîwerutire rita rîmwe arî kîgongoona, nîguo athengutie mevia ma andû eengî. Ke nîagaaûka rita rîa kaîrî na vîndî îo ndagaaûka gûtûma andû moverwe mevia, nwatî agaaûka kûvonokia andû arîa matûûraga mamwetererete.