Ahib 8 - ÎVUKU RÎA ÛVORO MWARO

Jesû nî Mûthînjîri-Ngai mûnene wetû

¹ Rîu ûndû ûrîa ûrî na vata mûno îgûrû rîa maûndû marîa tûraria nî atî, tûrî na Mûthînjîri-Ngai mûnene ûrîa wîkaraga mwena wa ûrîo wa gîtî Kîam ûthamaki wa Ngai kûu îgûrû.

² Ke atungataga ta Mûthînjîri-Ngai ûrîa mûnene varîa vatheru Mûno îgemarî rîa ma rîrîa rîathondekirwe nî Mwathani nwatî tî mûndû.

³ Mûthînjîri-Ngai mûnene wa wonthe athuuragwa nîguo avirage matega na magongoona ma nyamû kûrî Ngai. Kwoguo nwanginya Mûthînjîri-Ngai mûnene wetû ethîrwe arî na kîndû gîa gûtegera Ngai.

⁴ Kethîrwa ke atûûraga gûkû nthî, ndangîrî mûthînjîri-Ngai. Nîûndû gûkû nthî kûrî na athînjîri-Ngai arîa marutagîra Ngai iveo wata ûrîa watho wa Ayahudi ugîte.

⁵ Wîra ûrîa marutaga ta athînjîri-Ngai, nî mûvuano na kîruru Kîam maûndû marîa marî Îgûrû. Ûguo nwa ta guo gwekariî rîrîa Musa eendaga gûtuma îgema rîtheru. Ngai aamwîrire atîrî, “Menyerera ûthondeke maûndû monthe na njîra ta îrîa wonirue kîrîmarî.”

⁶ Nwatî rîu, wîra wa ûthînjîri-Ngai ûrîa ûvetwe Jesû nî wa vata mûno makîria ya wîra ûrîa waveetwe athînjîri-Ngai acio engî, wata ûrîa kîrîkanîro kîrîa athondekete gatagatî ka Ngai na andû kîrî kînene makîria ya kîrîa gîkûrû, nîûndû gîkî gîcerû kîrîkanîrîtwe na ciîranîro mbaro mûno.

⁷ Kethîrwa kîrîkanîro Kîam mbere gîtiarî na mavîtia, gûtingîagîre na vata wa kîrîkanîro gîa kaîrî.

⁸ Nwatî Ngai nîwonaga andû ake marî na mavîtia rîrîa akûmeera atîrî, “Mwathani arauga atî mîthenya nîgûkinya, rîrîa ngaathondeka kîrîkanîro gîcerû na andû a Isiraeli vamwe na andû a Juda.

⁹ Gîtikeethîrwa gîkariî ta kîrîkanîro kîrîa nathondekire na methe mao ma tene, mûthenya ûrîa namocire na njara, ngîmaruta vûrûri wa Misiri. Nîmaaregire gûtuîka evokeku kûrî kîrîkanîro kîrîa nathondekire nao, kwoguo nînamatiganîrie.”

¹⁰ Mwathani arauga atîrî, “Gîkî nîkîo kîrîkanîro kîrîa ngaathondeka na andû a Isiraeli mîthenya îrîa îgaaûka, vîndî îo nîngekîra mawatho makwa meciriarî mao, na nîmandîke ngororî ciao. Nîngaatuîka Ngai wao, nao nîmagaatuîka andû akwa.

¹¹ Gûtirî mûndû gatagatîrî kao ûkaathomithia mûndû ûrîa wîngî, kana merane atîrî, ‘Menya Mwathani.’ Nîûndû andû onthe nîmakaamenya, kuuma ûrîa mûnene nginya ûrîa mûnini.

¹² Nîngaamovera mevia mao, na ndigaacoka kûririkana mavîtia mao.”

¹³ Rîrîa Ngai aaririe ûvoro wa kîrîkanîro gîcerû ke nîwatuire kîrîkanîro kîrîa Kîam mbere gîkûrû. Nakîo kîndû wa kîonthe kîrakûra na gîgatuîkanga, nîkwa kîûraga.