Ahib 7 - ÎVUKU RÎA ÛVORO MWARO

Mûthînjîri-Ngai Melikizedeki

¹ Melikizedeki aarî mûthamaki wa Salemu, na aarî mûthînjîri-Ngai wa Ngai Ûrîa ûrî îgûrû mûno. Rîrîa Iburahimu aaumaga mbaararî arîkia kûvoota athamaki arîa ana, Melikizedeki nîwamûtûngire na akîmûrathima.

² Nake Iburahimu nîwamûgaîre gîcunjî gîa îkûmi Kîam indo ciake cionthe cia indo irîa aatavîte. (Mbere rîîtwa Melikizedeki, nî kuga, “Mûthamaki wa Ûthingu.” Na nîûndû aarî mûthamaki wa Salemu, Melikizedeki nî kuga, “Mûthamaki wa thayû.”)

³ Melikizedeki ndaarî îthe, ng'ina, ndaarî rûciaro rwake, gûtirî mûndû wîcî rîrîa Melikizedeki aaciarirwe kana rîrîa aakwire. Ekariî ta Mûriû wa Ngai na nîatûûra arî mûthînjîri-Ngai nginya tene na tene.

⁴ Mue nîmûrona ûrîa aarî Mûnene. Iburahimu îthe wetû wa tene aamûgaîre gîcunjî gîa îkûmi Kîam indo ciake irîa aatavîte arî mbaararî.

⁵ Nao andû a rûciaro rwa Lawi na nîo maatuîkaga athînjîri-Ngai, nîmaathîtwe nî Watho metagie gîcunjî gîa îkûmi Kîam indo irîa andû ao a Isiraeli marî nacio, wana ethîrwa andû acio wanao nî a rûciaro rwa Iburahimu.

⁶ Melikizedeki ndaarî wa rûciaro rwa Lawi. Nwatî nîwamûkîre gîcunjî gîa îkûmi kuuma kûrî Iburahimu na akîmûrathima. Iburahimu aarî mwamûkîru ciîranîro kuuma kûrî Ngai.

⁷ Gûtirî na nganja atî mûndû ûrîa ûrathimanaga nî mûnene gûkîra ûrîa ûrathimagwa.

⁸ Athînjîri-Ngai nîo metagia gîcunjî gîa îkûmi wana ethîrwa o nî andû arîa matûûraga mwoyo na magacoka magakua. Nwatî Melikizedeki ûrîa wamûkîre gîcunjî gîa îkûmi kuuma kûrî Iburahimu, atûûraga mwoyo wata ûrîa mandîko matheru maugîte.

⁹ Kwoguo nwa tuge atî Alawi (arîa mamûkagîra gîcunjî gîa îkûmi) nîmaarîvire gîcunjî kîu rîrîa Iburahimu aarîvire.

¹⁰ Rîrîa Iburahimu aatûngire Melikizedeki, Lawi ndaarî mûciare. Ke aarî mîthumorî ya îthe Iburahimu.

¹¹ Andû a Isiraeli maaverwe watho na njîra ya ûthînjîri-Ngai ûrîa waumanîte na andû a mûvîrîga wa Lawi. Nwatî na njîra îo andû matiatuîka akinyanîru. Kwoguo kwarî na vata mûthînjîri-Ngai wîngî aûke ta Melikizedeki, nwatî tî kuuma mûvîrîgarî wa Aroni.

¹² Kwoguo ûthînjîri-Ngai ûngîcenjua nwanginya watho wa naguo ûcenjie.

¹³ Maûndû mama marîtue îgûrû rîa Mwathani wetû. Ke aarî wa mûvîrîga ngûrani na gûtirî mûndû wa mûvîrîga wake wanatungata kîgongoonarî arî mûthînjîri-Ngai.

¹⁴ Nîgwîcîkene waro atî ke aaumîte mûvîrîgarî wa Juda. Rîrîa Musa aaragia îgûrû rîa athînjîri-Ngai ndaagweta wanarî ûndû wîgiî mûvîrîga ûcio.

Mûthînjîri-Ngai ûyû ekariî ta Melikizedeki

¹⁵ Ûvoro ûyû nîmûmenyekanu waro makîria, nîûndû mûthînjîri-Ngai ûyû wîngî mwonekanu ekariî ta Melikizedeki.

¹⁶ Ke aatuirwe mûthînjîri-Ngai nîûndû wa vinya wa mwoyo wake ûrîa ûtathiraga, nwatî tî na njîra ya mawatho marîa mathondeketwe nî andû.

¹⁷ Nîûndû mandîkorî matheru ûira wake ûvecanîtwe atîrî, “We ûrî mûthînjîri-Ngai nginya tene na tene wata Melikizedeki.”

¹⁸ Kwoguo watho ûrîa wa tene nîmûthengutie, nîûndû ndwarî na vinya na warî wa mana.

¹⁹ Nîûndû Watho wa Musa ndûngîatuire ûndû wana ûrîkû mûkinyanîru. Nwatî rîu nîtûvetwe kîîrîgîrîro kîngî Kîamro makîria ya kîrîa gîtûmaga tûthiî vakuvî na Ngai.

²⁰ Kûnarî ûguo kîîrîgîrîro gîkî varî na mwîvîtwa wa Ngai. Ngai ndevîta andû acio engî magîtuwa athînjîri-Ngai.

²¹ Nwatî Jesû aatuîkire mûthînjîri-Ngai na njîra ya mwîvîto. Ngai aamwîrire atîrî, “Mwathani nîeranîrîte na mwîvîto na ndakaagarûrûka atî: ‘We ûkethagîrwa ûrî mûthînjîri-Ngai tene na tene.’ ”

²² Ûndû ûyû nîguo ûtûmaga Jesû atuîke mûrûngamîrîri wa kîrîkanîro Kîamro makîria kuuma kûrî Ngai.

²³ Athînjîri-Ngai a kîrîkanîro kîrîa gîkûrû meethagîrwa marî eengî, nwatî nîmaakucaga na kwoguo matiavotaga kûthiî na mbere gûtungata marî athînjîri-Ngai.

²⁴ Nwatî Jesû atûûraga tene na tene, na kwoguo ke nî Mûthînjîri-Ngai wa mavinda monthe.

²⁵ Kwoguo, mavinda monthe nîavotaga kûvonokia arîa mathiîcaga kûrî Ngai na njîra yake. Nîûndû atûûraga vingo cionthe nîguo amathaithanagîrîre kûrî Ngai.

²⁶ Jesû nî Mûthînjîri-Ngai mûnene ûrîa ûtûvingagîria mavataro metû. Ke nî mûtheru, ndarî ûcuke na ndevagia. Ke nîwamûrîtwe kuuma kûrî evia na Ngai nîamûvirîte îgûrû mûno.

²⁷ Ndekariî ta Athînjîri-Ngai arîa anene. Ke ndavatiî kûrutaga îgongoona wa mûthenya mbere nîûndû wa mevia make, na acoke arute îgongoona nîûndû wa mevia ma andû. Nîwarutire îgongoona riita rîmwe rîa kwîgana. Eekire ûguo rîrîa eerutire ke mwene.

²⁸ Watho wa Musa nîûthuuraga andû arîa matarî agîrîru matuîke Athînjîri-Ngai arîa anene. Nwatî kîîranîro Kîam Ngai kîrîa Kîamthondekirwe na mwîvîtwa ûrîa waûkire vuva wa watho, ûthuuraga Mûriû ûrîa ûtuîtwe mwagîrîru tene na tene.