Ahib 5 - ÎVUKU RÎA ÛVORO MWARO

¹ Mûthînjîri-Ngai mûnene wa wonthe athuuragwa kuuma kûrî andû na akavewa wîra wa gûtungatîra Ngai vandûrî va andû. Ke nîarutaga iveo na magongoona ma mevia.

² Na nîûndû ke ethagîrwa atarî na vinya maûndûrî mengî, nîavotaga gûkirîrîria andû arîa matarî na ûmenyo na arîa mavîtagia.

³ Nîûndû ke mwene ethagîrwa atarî na vinya, nwanginya arute îgongoona nîûndû wa mevia make, wata ûrîa arutaga îgongoona nîûndû wa mevia ma andû.

⁴ Gûtirî mûndû wîvecaga gîtîîo na njîra ya kwîthuura atuîke mûthînjîri-Ngai ûrîa mûnene. Ngai nîke tu wîtaga mûndû na akamûtua mûthînjîri-Ngai ûrîa mûnene wata ûrîa Aroni eetirwe.

⁵ Na njîra wata îo, Kristû wa nake ndeetîkîra kwînenevia nîûndû atî aarî Mûthînjîri-Ngai ûrîa mûnene. Vandû va ûguo, Ngai aamwîrire atîrî, “We nîwe Mûriû wakwa, ûmûnthî nînatuîka Aguo.”

⁶ Ngai nîwacokire akiuga vandû vengî atîrî, “We wî mûthînjîri-Ngai tene na tene, wî mûthînjîri-Ngai wata Melikizedeki.”

⁷ Rîrîa Jesû aatûûraga gûkû nthî, nîwavoyaga na akathaitha Ngai na mûgambo mûnene akîrîraga. Aavoyaga Ngai nîûndû nîke ûngîavotire kûmûvonokia kuuma kûrî gîkuû. Ngai nîwamûthikîrîrie nîûndû wa kwînyivia na kwîrutîra gwake.

⁸ Nwatî wana ethîrwa Kristû aarî Mûriû wa Ngai, nîwerutire kwathîka nîûndû wa ûrîa aathînîkire.

⁹ Na rîrîa aatuirwe mwagîrîru, nîwatuîkire kiumo Kîam ûvonokio wa tene na tene kûrî arîa onthe mamwathîkagîra.

¹⁰ Nake Ngai nîwamûtuire Mûthînjîri-Ngai ûrîa mûnene wata Melikizedeki.

Îîmenyerereni mûtigate wîtîkio wenyu

¹¹ Tûrî na maûndû meengî mûno tûngîaria îgûrû rîgiî maûndû marîa narîkia kûmwîra, nwatî nî vinya kûmûtaarîria mo nîûndû mûtitaûkagîrwa na îvenya.

¹² Mwîthîrîtwe mûrî na kavinda keganu ga gûtuîka arimû, nwatî nginya rîu nîmûvatarîte mûndû wa kûmûthomithia maûndû marîa mwathomithirue mbere megiî ndûmîrîri ya Ngai. Vandû va mwîthîrwe mûkîrîa irio ino nyûmû, mue nwa mûnyuire îriia.

¹³ Mûndû wa wonthe ûtûûragua nî îriia nî kaana na ndangîtaûkîrwa nî maûndû maro kana macûku.

¹⁴ Nwatî irio ino nyûmû nî cia andû agima, arîa marutîtwe na njîra ya ciîko gûkûûrana maûndû maro na maûndû macûku.