Ahib 4 - ÎVUKU RÎA ÛVORO MWARO

¹ Na rîu, nîûndû Ngai nîatûvete kîîranîro gîa gûgaatonya kîvurûkorî gîake, nîtwîmenyagîrîreni nîguo gûtikethîrwe kûrî mûndû wana ûmwe gatagatîrî kenyu ûkaaremwa nî gûtonya.

² Nîûndû nîtwavunjîrue Ûvoro Mwaro wata ûrîa andû arîa maarî werûrî maavunjîrue. Nwatî ndûmîrîri îo meeguire ndîamatethia, nîûndû maamîamûkîre matarî na wîtîkio.

³ Kwoguo, tue arîa twîtîkîtie nîtûtonyaga kîvurûkorî kîu wata ûrîa Ngai aaugire atîrî, “Nînaarakarire na ngîranîra na mwîvîtwa atî, ‘Matigaatonya varîa ngamava kîvurûko!’ ” Ngai nîwaririe ûguo wana ethîrwa nîwathirîtie wîra wake kuuma rîrîa aaûmbire nthî.

⁴ Nîûndû mandîkorî matheru kûrî vandû vandîkîtwe ûvoro wîgiî mûthenya wa mûgwanja atîrî, “Ngai aavurûkire mûthenya wa mûgwanja na agîtiga kûruta wîra wake wonthe.”

⁵ Wana rîngî Mandîko Matheru maugîte atîrî, “Gûtirî vîndî magaatonya varîa nîngîkaamava kîvurûko.”

⁶ Andû arîa meeguire ûvoro mwaro rîa mbere matiatonya vandû vau va kûvurûka nîûndû nîmaaregire gwîtîkia. Kwoguo kûrî andû amwe metîkîrîtue gûtonya kuo.

⁷ Ûndû ûyû nîwonanîtue nî Ngai na njîra ya kûvanga mûthenya wîngî ûrîa wîtagwa “Ûmûnthî.” Ngai aaririe ûvoro ûcio vuva wa mîaka mîîngî na njîra ya Daudi ta ûrîa Mandîko Matheru maugîte atîrî, “Ûmûnthî mûngîgua mûgambo wa Ngai, mûtikaûmie ngoro cienyu.”

⁸ Kethîrwa Joshua nîwavere andû kîvurûko kîrîa meerîrîtwe, Ngai ndangîacokire kwaria vuvarî ûvoro wîgiî mûthenya wîngî.

⁹ Na njîra wata îno, nîgûtigarîtie mûthenya wa kûvurûka wa andû a Ngai, wata ûrîa Ngai aavurûkire mûthenya wa mûgwanja.

¹⁰ Mûndû wa wonthe ûvotete gûtonya kîvurûkorî kîrîa Ngai eeranîre, nîakaavurûka kuuma wîrarî wake wata ûrîa Ngai aavurûkire kuuma kûrî wîra wake.

¹¹ Kwoguo nîtûgerie mûno tûtonye kîvurûkorî kîu, nîguo gûtikethîrwe kûrî mûndû wanarî ûmwe gatagatîrî getû ûkaaremwa nî gûtonya kîvurûkorî nîûndû wa ûremi ta ûcio wao.

¹² Kiugo Kîam Ngai kîrî mwoyo nîkîrutaga wîra na nî kîûgî gûkîra rûviû rûrîa rûnoore mîena îîrî. Nîgîtemaga nginya varîa ngoro na mwoyo inyitanîrîte, na gîgatema gatagatîrî ka marûngo wana gatagatî ka mavîndî. Na nîkîvotaga gûtuîria na kûmenya meciria na merirîria ma ngoro cietû.

¹³ Gûtirî ûndû wana ûmwe ûngîthithwa Ngai. Maûndû monthe methagîrwa marî ûtherirî na matarî mathithe mbere ya metho make. Na nwanginya tûmûtaaragîrie maûndû monthe marîa twîkaga.

Jesû nîke mûnene wa Athînjîri-Ngai

¹⁴ Nîtûnyitie na vinya viû wîtîkio wetû ûrîa tumbûraga nîûndû tûrî na Mûthînjîri-Ngai ûrîa mûnene na nîke Jesû Mûriû wa Ngai. Ke nîwathiîre kûrî Ngai.

¹⁵ Mûthînjîri-Ngai mûnene ûcio wetû ndangîrega gûtwîguîra ntha nîûndû tûtirî vinya. Rîrîa atûûraga gûkû nthî nîwageragua na njîra wa cionthe irîa tûgeragua nacio, nwatî ke ndevia.

¹⁶ Kwoguo nîtûthiîni tûmîrîrîtie tûkinye vakuvî na gîtî Kîam Ngai Kîam ûthamaki, na nîvo varî na wega wake. Vau nîvo tûkeeguîrûa ntha na tûnyite wega wa Ngai wa gûtûtethagia rîrîa rîonthe tûvatarîte.