Ahib 3 - ÎVUKU RÎA ÛVORO MWARO

Jesû nî mûnene gûkîra Musa

¹ Kwoguo ariû a îthe wetû mue arîa atheru na mwîtîtwe nî Mwathani, îcirieni ûvoro wa Jesû ûrîa Ngai aatûmire arî Mûthînjîri-Ngai ûrîa mûnene wa wîtîkio ûrîa tumbûraga.

² Jesû aarî mwîvokeku mbere ya Ngai ûrîa wamûthuurire wata ûrîa Musa aatuîkire mwîvokeku nyombarî ya Ngai.

³ Mûndû ûrîa ûtumaga nyomba nîavecagwa gîtîîo gûkîra nyomba îrîa atumîte. Na njîra wata îno, Jesû nîwagîrîrwe nî kûvewa gîtîîo gûkîra Musa.

⁴ Nyomba wa yonthe îthagîrwa îrî na mûmîtumi, nwatî Ngai nîke ûtumîte indo cionthe.

⁵ Musa aarî mwîvokeku maûndûrî monthe arî ndungata nyombarî ya Ngai. Ke nîwaririe ûvoro wîgiî maûndû marîa Ngai akaaria mavinda marîa magaaûka.

⁶ Nwatî Kristû nîmwîvokeku ta Mûriû ûrîa wathanaga nyombarî ya Ngai. Tue tûrî nyomba ya Ngai ethîrwa nîtûkûthiî na mbere kûmîrîria tûrî na mwîvoko wa kîrîa twîrîgîrîrîte.

Kîvurûko kîa andû a Ngai

⁷ Kwoguo wata ûrîa Roho Mûtheru augîte atîrî, “Ûmûnthî mûngîgua mûgambo wa Ngai,

⁸ mûtikaûmie ngoro ta ûrîa methe menyu meekire, rîrîa maareganire na Ngai, ta ûrîa meekariî mûthenya ûrîa maarî werûrî, rîrîa maageririe Ngai.

⁹ Kûu werûrî nîkuo methe menyu maangereerie, wana ethîrwa nîmoonete maûndû marîa nekîte mîaka mîrongo îna.

¹⁰ Kwoguo nînaarakarirue nî andû acio, na ngiuga atîrî, ‘Aya nî andû matûîre marî aremi, na matiîcî njîra ciakwa.’

¹¹ Nînaarakarire na ngîranîra na mwîvîtwa atîrî: ‘Gûtirî vîndî magaatonya varîa nîngîamavere mavurûke.’ ” Ûguo nîguo Mwathani augîte.

¹² Ariû a îthe wetû, îîmenyerereni atî gûtikethîrwe kûrî na mûndû gatagatîrî kenyu wîna ngoro njûku na îtetîkîtie na ûngîgarûrûka akauma kûrî Ngai ûrîa mûtûûra mwoyo.

¹³ Vandû va ûguo, ûmanagîrîriani mûndû na ûrîa wîngî mûthenya wa mûthenya rîrîa rîonthe kiugo “Ûmûnthî” gîkaagwetagwa gîkîaria ûvoro ûmwîgiî nîguo gûtikagîe mûndû wana ûmwe gatagatîrî kenyu ûkaaûmia ngoro nîûndû wa mevia.

¹⁴ Tuonthe tûrî a ngwatanîro îmwe na Kristû ethîrwe nîtûgûtûûra tûnyitîtie mwîvoko ûrîa twarî naguo kuuma wa Kîammbîrîria.

¹⁵ Nîûndû Mandîko Matheru maugîte atîrî: “Ûmûnthî mûngîgua mûgambo wa Ngai, mûtikaaûmie ngoro cienyu, ta ûrîa methe menyu meekire rîrîa maareganire na Ngai.”

¹⁶ Nî andû arîkû arîa meeguire mûgambo wa Ngai na makîregana nake? Kinthî tî arîa onthe maumire Misiri matongoretue nî Musa?

¹⁷ Nî andû arîkû maarakaririe Ngai kavinda ka mîaka mîrongo îna? Kinthî tî andû arîa meevirie na magîkuîra kûu werûrî?

¹⁸ Rîrîa Ngai eeranîre na mwîvîtwa atîrî, “Matigaatonya vûrûrirî ûrîa nîngîkaamava ûvurûko” ke aaragia ûvoro wa û? Kinthî tî arîa maareganire nake?

¹⁹ Kwoguo nîtûrona atî matiavota gûtonya vûrûri ûcio nîûndû matietîkia.