Ahib 2 - ÎVUKU RÎA ÛVORO MWARO

Ûvonokio mûnene

¹ Nîûndû wa ûguo, nwanginya tûnyitie waro ûvoro wa ma ûrîa twîguîte nîguo tûtikaume kûrî guo.

² Ndûmîrîri îrîa yavecanirwe nî araika kûrî methe metû ma tene, yonekire îrî ya ma. Arîa onthe mataamîathîkîra nîmaaverithirue wata ûrîa kwagîrîrîte.

³ Tûngîrega kûverithua atîa tûngîtiganîria ûvonokio mûnene ta ûyû? Mwathani nîke warî wa mbere kwanîrîra ûvonokio ûyû, natue nîtwamenyithirue atî nî wa ma nî arîa maamwîgwire.

⁴ Ngai wanake nîwongerere ûira wake îgûrû rîao na njîra ya kûringa ciama na morirû ma mîthemba yonthe, na iveo cia Roho Mûtheru irîa aaveere andû kûringana na wendi wake.

Ûrîa ûtûmaga tûvonoke

⁵ Ngai ndaatua araika athani a nthî îrîa îgaaûka îrîa tûraria ûvoro wayo.

⁶ Nwatî, vandû vengî Mandîko matheru maugîte atîrî: “Ngai! Mûndû nî ndûî atî nîguo ûmûmenyagîrîre?

⁷ Gwa kavinda kanini we nîwamûtuire mûnini gûkîra araika; we nîwamwîkîre nthûmbî ya riiri na gîtîîo.

⁸ Nîwamûtwire wa kwatha indo cionthe.” Kuga, “Wa kwatha indo cionthe,” nî kuga atî gûtirî kîndû wanarî kîmwe gîtarî rungu rwa wathani wake. Kûnarî ûguo, tûtionaga indo cionthe irî rungu rwa wathani wake.

⁹ Nwatî twonaga Jesû ûrîa gwa kavinda kanini watuirwe mûnini gûkîra araika, nîguo na njîra ya wega wa Ngai akue nîûndû wa andû onthe. Na rîu tûmwonaga ekîrîte nthûmbî îrî na riiri na gîtîîo nîûndû wa ûrîa aathînirue na agîkua.

¹⁰ Ngai ûrîa ûmbaga na ûtûûragia indo cionthe, nîwonire kwagîrîrîte Jesû atuwe mwagîrîru na njîra ya kûthînîka na gûkua gwake, nîguo atûme andû eengî makinyîrwe nî riiri wake. Nîûndû Jesû nîke ûkinyagia andû ûvonokiorî.

¹¹ Jesû nîke ûtûmaga andû matherue mevia. Ke vamwe na arîa matuîtwe atheru nî a îthe ûmwe. Kwoguo Jesû ndegucaga nthoni akîmeta ariû na aarî a îthe.

¹² Ke eraga Ngai atîrî, “Nie nîngwîra andû etû ûrîa weka; ngaagûkumagia mîcemaniorî yao.”

¹³ Nîacokaga akauga atîrî, “Nie nîngwiga mwîvoko wakwa kûrî Ngai.” Wana nîaugaga atîrî, “Nîrî ava tûrî na ciana irîa Ngai amvete.”

¹⁴ Nîûndû ciana ino nî andû marî na mwîrî na nthakame, Jesû ke mwene nîwatuîkire mûndû wata o. Aatuîkire mûndû nîguo na njîra ya gîkuû gîake, athirie vinya wonthe wa Ngoma îrîa îthagîrwa îrî na ûvoti îgûrû rîa gîkuû.

¹⁵ Na njîra îo nîwovorire arîa onthe maatûûraga marî ngombo ûtûûrorî wao wonthe nîûndû wa kwîgua guoya wa gîkuû.

¹⁶ Nîûndû nî ûvoro wa ma atî ke ndatethagia araika, nwatî atethagia rûciaro rwa Iburahimu.

¹⁷ Ûguo nî kuga atî nwanginya angîatuîkire ta aa mûrwang'ina na aa mwarwang'ina na njîra wa yonthe nîguo atuîke Mûthînjîri-Ngai ûrîa mûnene, mwîvokeku na ûrî ntha wîrarî wa Ngai nîguo atûme andû moverwe mevia mao.

¹⁸ Na rîu ke nwa atethie arîa mageragua, nîûndû ke mwene nîwagerirue na akîthînua.