Ahib 13 - ÎVUKU RÎA ÛVORO MWARO

Ûrîa tûngîkenia Ngai

¹ Endanagani mûndû na ûrîa wîngî ta ariû na aarî a îthe wetû.

² Ririkanagani kûgwata andû ûgeni kwenyu mîciî. Andû amwe nîmaagwatire araika ûgeni matakûmenya.

³ Ririkanagani arîa marî njeera takwa mûrî njeera nao. Ririkanagani arîa maranyamarua takwa mûranyamarua wata o.

⁴ Kûvikania nîkûvecagwe gîtîîo nî andû onthe. Nwanginya mûthuuri na mûka methagîrwe marî evokeku kûrî mûndû na ûrîa wîngî. Ngai nî agaatuîra avûri ûmaraa na arîa mekaga maûndû ma ûtharia.

⁵ Mûtikende mbeca makîria, nwatî mûndû nîeganagwe nî kîrîa arî nakîo. Nîûndû Ngai augîte atîrî, “Nie ndigaagûtiganîria kana ndiganîrwe nîwe.”

⁶ Kwoguo tûrî na ûmîrîru nwa tuge atîrî, “Mwathani nîke ûndethagia, nie ndigeetigîra. Nî atîa mûndû wana ûrîkû angîmbîka?”

⁷ Ririkanagani atongoria enyu a tene arîa maamûvunjîrie ndûmîrîri ya Ngai. Îcirieni ûrîa maatûûraga na mwîgerekanie nao.

⁸ Jesû Kristû ûrîa arekariî îgoro, nîguo ekariî ûmûnthî na nîatûûra ûguo tene na tene.

⁹ Mûtigetîkîre kûvîtithua nî mîthomithanîrie mîgeni îrîa îrî kuo ya mîthemba mîîngî. Nî waro ngoro igîcage na vinya kuuma kûrî wega wa Ngai, nwatî tî kuumana na kwathîkîra mawatho megiî irio. Nîûndû arîa mathîkagîra mawatho mama matîtethekaga nîmo.

¹⁰ Athînjîri-Ngai arîa matungataga varîa Ayahudi magoocagîra, matirî na rûtha rwa kûrîa kîndû wana kîrîkû kîrîa gîtegagwa metharî yetû ya kîgongoona.

¹¹ Mûthînjîri-Ngai ûrîa mûnene wa Kîyahudi nî aviraga nthakame ya nyamû varîa vatheru Mûno nîguo akamîrute îrî îgongoona rîa mevia. Nwatî mîîrî ya nyamû icio îvîvagîrua na kûu nja ya kûrîa matûûraga.

¹² Nîûndû wa gîtûmi gîkî, Jesû wa nake aakwire arî nja ya îtûûra rîrîa rînene nîguo atherie andû kuuma meviarî mao na nthakame yake.

¹³ Kwoguo nîtûthiîni kûrî ke vau nja ya îtûûra tûconorithue na njîra wata îrîa aaconorithirue nayo.

¹⁴ Nîûndû gûkû nthî tûtirî na îtûûra înene rîa gûtûûra tene na tene, nîgûcaria tûcaragia îtûûra înene rîrîa rîgaaûka.

¹⁵ Kwoguo, na njîra ya Jesû nîtwagîrîrwe tûkumagie Ngai vîndî cionthe. Rîîrî nîrîo îgongoona rîetû rîrîa tûtegagîra Ngai rîrîa tûkûmumbûra na tûnyua twetû atî ke nî Mwathani.

¹⁶ Mûtikariganîrwe nî gwîka waro na gûtethania mûndû na ûrîa wîngî, nîûndû mama nîmo magongoona marîa makenagia Ngai.

¹⁷ Athîkagîrani atongoria enyu na mûrûmagîrîre maûndû marîa mamwathaga mwîke. Nîo mamenyagîrîra mîoyo yenyu na nwanginya makeera Ngai ûrîa maarutaga wîra wao. Ethîrwa mûkaamathîkagîra makaarutaga wîra wao marî na gîkeno. Ethîrwa mûtikaamathîkîra, makaûrutaga matarî na gîkeno na kwoguo mûtingîtetheka.

¹⁸ Tûvoyagîreni. Tûrî nama atî thamiri cietû nî ntheru, nîûndû twendaga gwîka ûrîa kwagîrîrîte mavindarî monthe.

¹⁹ Na nîngûmûthaitha mûno makîria mûvoyage nîguo Ngai andûme kûrî mue narua.

Îvoya rîa mûthiia

²⁰ Ngai nîariûkîtie Mwathani wetû Jesû Kristû ûrîa arî ke Mûrîthi Mûnene wa ng'ondu. Na njîra ya gîkuû gîake nîwarûthire kîrîkanîro gîa gûtûûra tene na tene.

²¹ Ngai mwene thayû aromûva indo cionthe mbaro irîa mûvatarîte nîguo mwîkage wendi wake. Na njîra ya Jesû Kristû arotwîka ûndû ûrîa ûmûkenagia. Nake Kristû arokumagua tene na tene. Ameni!

Ciugo cia Mûthiia

²² Ariû na aarî a îthe wetû, nîngûmûria mûthikîrîrie ndûmîrîri îno ya kûmwîkîra vinya. Maarûa îno namwandîkîra tî ndaca mûno.

²³ Nîngwenda mûmenye atî Mûrû wa îthe wetû Timotheo nî araumire njeera. Ethîrwa nîagûka narua, nîtûgaaûka nake ngîûka kûrî mue.

²⁴ Kethiani atongoria enyu onthe wana etîkia onthe. Ariû na aarî a îthe wetû kuuma Italia nîmamûkethia.

²⁵ Wega wa Ngai ûrogîa namue muonthe. Ameni.