Ahib 12 - ÎVUKU RÎA ÛVORO MWARO

Ngai Vava wetû

¹ Tûrî na gîkundi kînene Kîam aira gîtûthiûrûrûkîrîtie. Kwoguo nîtwîyaûreni kîrîa kîonthe kîngîtûvînga na mevia marîa matûrigicaga. Tigani tûvinyûre tûrî na ûmîrîru îvenya rîrîa rîrî mbere yetû.

² Nîtûvinyûre tûroretie Jesû ûrîa arî ke Kîammbîrîria na kîrîkîro Kîam wîtîkio wetû. Nîûndû wa gîkeno kîrîa Kîamrî mbere yake, nîwaûmîrîrie gûkua mûtharavarî. Wana ethîrwa gûkua mûtharavarî warî ûndû wa gîconoko, ndoona ûcio ta ûndû. Rîu ekarîte mwena wa ûrîo wa gîtî Kîam ûnene Kîam Ngai.

³ Ta îcirieni ûvoro wake ûcio waûmîrîrie rûmena rûnene kuuma kûrî andû evia. Kwoguo mûtikaûrwe nî vinya kana mûkua ngoro.

⁴ Nîûndû nîmûrûîte na mevia, nwatî mûtirî mûrarûa nginya mûgakinya kavinda ga kûûragwa.

⁵ Anga nîmûriganîrîtwe nî ciugo cia kûmwîkîra vinya irîa Ngai aragia namue ta mûrî ciana ciake? “Mwana wakwa, thikagîrîria rîrîa ûkûrûngwa nî Mwathani, ndûkaûrwe nî vinya rîrîa agûkûverithia.

⁶ Nîûndû Mwathani arûngaga mûndû wa wonthe ûrîa endete, na nîaverithagia mûndû wa wonthe ûrîa amûkagîra ta mwana wake.”

⁷ Ûmîrîriani rîrîa mûkûverithua ta ûrîa mwana aûmagîrîria akîrûngwa nî îthe. Kûverithua kwenyu nîkûronania atî Ngai aramwîka ûguo ta ciana ciake. Gûtirî mwana ûtaverithagua nî îthe.

⁸ Ngai nîaverithagia ciana ciake. Kwoguo ethîrwa mûtiverithagua, ûguo nîkuga mûtirî ake mûrî ciana cia mûndû wîngî.

⁹ Methe metû ma gûkû nthî nîmaatûverithirie na tûkîmava gîtîîo. Kwoguo nîtwagîrîrwe kwathîkîra Vava wa kîîroho mûno makîria nîguo tûtûûre!

¹⁰ Methe metû ma gûkû nthî nîmaatûverithirie gwa kavinda kanini kûringana na ûrîa moonaga kwagîrîrîte. Nwatî Ngai atûverithagia tûgunîke na nîguo tûkaagaa ûtheru wake.

¹¹ Tûtikenaga rîrîa tûkûverithua nîûndû nîtwîgucaga ûrûrû. Nwatî arîa maverithagua na makaûmîrîria nîmagîcaga na kîveo Kîam ûtûûro wa thayû na ûthingu.

Mataaro na Gûkaanua

¹² Kwoguo ûkîrîriani njara cienyu na îgûrû icio nogu na mûkûnjûre maru mau menyu maratetema.

¹³ Thiîrîrani njîrarî nûngarû nîguo kûgûrû kûrîa kwonju gûtikagonyoke, vandû va ûguo kûvonue.

¹⁴ Geragiani kwîthîrwa mwîgucanîte na andû onthe na mûgeragie gûtûûra ûtûûro mûtheru, nîûndû mûndû ûtarî naguo ndakoona Mwathani.

¹⁵ Îîmenyerereni mûndû ndagate wega wa Ngai. Gûtikethîrwe kûrî na mûndû ûgûtuîka ta mûtî mûrûrû ûrîa ûkûraga na ûgatûma kûgîe na mathîna meengî nî ûndû wa ûrogi waguo.

¹⁶ Mûndû wana ûrîkû ndakanatuîke mûmaraa kana mûndû ûtarî na Ûngai ta Esaû. Esaû nîwendirie ûrikithathi wake irio cia îrîa rîmwe.

¹⁷ Mue, nîmwicî atî vuvarî, Esaû nîwendaga îthe amûrathime. Nwatî îthe ndaamûrathima, nîûndû Esaû ndaavota kwona ûndû wa kûgarûra ûrîa eekîte wana ethîrwa nîwaûcaragia akîrîraga methori.

¹⁸ Mue mûtikinyîte vandû mûngîvutia ta ûrîa andû a Isiraeli maakinyire kîrîmarî gîa Sinai kîrîa gîaakanaga mwaki mûnene kûrî na nduma nene na rûkûngi rûnene.

¹⁹ Mûtirî mûregua mûgambo wa karumbeta na mûgambo ûkiugîrîria. Rîrîa andû a Isiraeli meegwire mûgambo ûcio, nîmaaugire matikwenda kwîgua mûgambo wîngî.

²⁰ Maaugire ûguo nîûndû matingîavotire kûmîrîria watho ûrîa waugaga atîrî, “Ethîrwa wana nyamû nîîkûvutia kîrîma kîu, nwanginya îrivwe na mathiga îkue.”

²¹ Ûrîa andû moonire nîwatûmire manyitwe nî guoya mûno, nake Musa nîwaugire atîrî, “Nînîrainaina na ngetigîra!”

²² Vandû va ûguo, nîmûkinyîte kîrîmarî gîa Zayuni îtûûrarî înene rîa Ngai ûrîa ûtûûraga mwoyo. Nîmûkinyîte Jerusalemu îtûûra rîa îgûrû kûrîa kûrî araika ngiri nyîngî.

²³ Nîmûkîte kîgomanorî Kîam andû arîa akenu, na nîo marikithathi ma Ngai. Marîîtwa mao nîmandîkîtwe kûu îgûrû. Nîmûkîte kûrî Ngai ûrîa ûtucagîra andû onthe, na kûrî maroho ma andû arîa athingu arîa maatwirwe akinyanîru.

²⁴ Nîmûkîte kûrî Jesû ûrîa mwîgwithania wa kîrîkanîro kîrîa gîcerû, na kûrî nthakame yake îrîa yetûrûrirwe. Nthakame îo nî îranagîra maûndû maro gûkîra ya Abili.

²⁵ Kwoguo îîmenyerereni na mûtikarege kwîgua mûndû ûrîa ûkwaria. Andû arîa maaregire kwîgua ûrîa wavecanaga ndûmîrîri kuuma kûrî Ngai matiavonoka. Wa natue tûtingîvonoka ethîrwa nwa tûrege kwîgua ûrîa waragia kuuma îgûrû!

²⁶ Mûgambo wake nîwatûmire nthî îthingithe vîndî îo, nwatî rîu eranîrîte atî, “Wa rîngî nîngaathingithia nthî na ndûme wana îgûrû rîthingithe.”

²⁷ Ciugo icio “Wa rîngî” nîironania waro atî indo irîa ciaûmbirwe nî ikaainainua na ithengutue nîguo indo irîa itanginainua itigare.

²⁸ Kwoguo nîtwagîrîrwe nî gûcokia ngatho, nîûndû nîtwamûkagîra ûthamaki ûrîa ûtanginainua. Nîtûcokie ngatho na tûgooce Ngai na njîra îrîa îngîmûkenia tûrî na gîtîîo na kûmwîtigîra,

²⁹ nîûndû Ngai wetû nî mwaki ûrîa ûvîvagia ûkathiria.