Ahib 11 - ÎVUKU RÎA ÛVORO MWARO

Wîtîkio

¹ Wîtîkio nî kûgîa na ûma wa maûndû marîa twîrîgîrîrîte, na kûmenya atî maûndû marîa tûtavotaga kwona nî ma ma.

² Nîûndû wa wîtîkio methe metû ma tene nîmagîre na ngumo mbaro kuuma kûrî Ngai.

³ Nîûndû wa wîtîkio nîtûmenyaga atî Ngai aaûmbire nthî na îgûrû na njîra ya kiugo gîake. Kwoguo kîrîa kîonekaga Kîamthondekirwe kuumana na kîrîa gîtonekaga.

⁴ Wîtîkio nîguo watûmire Abili ategera Ngai îgongoona rîaro gûkîra rîrîa Kaini aategire. Nîûndû wa gwîtîkia Ngai Abili nîwatuirwe mûthingu, nîûndû Ngai nîwetîkîrire maruta make. Na njîra ya wîtîkio Abili nwa waragia wana ethîrwa nî wakuire.

⁵ Nîûndû wa wîtîkio Enoku ndaanakua. Vandû va ûguo ke nîwavirirwe îgûrû nî Ngai, kwoguo gûtirî mûndû wamwonire. Mandîko Matheru maugaga atî, mbere Enoku avirwa îgûrû Ngai nîwakenetue nîke.

⁶ Gûtirî mûndû ûngîvota gûkenia Ngai atarî na wîtîkio. Nîûndû mûndû wa wonthe ûthiîcaga kûrî Ngai nwanginya etîkie atî Ngai arî kuo na nîarathimaga arîa mamûcaragia.

⁷ Wîtîkio nîguo watûmire Nuhu athikîrîrie Ngai vîndî îrîa aamûkaanirie ûvoro wîgiî maûndû marîa atoonete. Nîwathîkîre Ngai na agîtuma îtarû rîrîa ke na andû ake maatûmîre nîguo mavonokue. Na ûguo Nuhu eekire nîwonanirie atî andû a nthî maarî acûku. Nîûndû Nuhu nîwetîkirie nîwatuirwe Mûthingu nî Ngai.

⁸ Nîûndû wa wîtîkio Iburahimu etwa nî Ngai nîwathîkire. Ngai nîwerire Iburahimu aume athiî vûrûrirî ûrîa aamwîrîrîte nî akaamûva. Iburahimu nîwatigire vûrûri wake, nwatî ndaamenyaga kûrîa aathiîte.

⁹ Na njîra ya wîtîkio Iburahimu atûûrire arî ta mûgeni vûrûrirî ûrîa Ngai aamwîrîîre. Aatûûraga magemarî wata ûrîa Isaka na Jakovu maatûûraga, arîa wa nao maaverwe kîîranîro wata kîu nî Ngai.

¹⁰ Iburahimu aatûûraga etererete îtûûra rînene rîrî na mûcingi wa gûtûûra rîtumîtwe nî Ngai.

¹¹ Nîûndû wa wîtîkio Sara nîwagîre na mwana wana ethîrwa aarî nthata nake Iburahimu aarî mûkûrû. Iburahimu nîwetîkîtie atî Ngai nîmwîvokeku na nîakaavingia ûrîa aamwîrîîre.

¹² Wana ethîrwa Iburahimu aarî ta ûyû mûkuû, kuuma kûrî ke nîgwaciarirwe andû maarî eengî ta njata cia îgûrû kana ta mûthanga ûrîa ûtangîtarîka ûrî rûtere rwa îria.

¹³ Andû acio onthe maakwire marî na wîtîkio. Matianyita indo irîa Ngai aamerîrîte, nwatî marî wa kûraca nîmoonaga indo icio na magaikenagîra. Nao nîmeetîkîtie atî nî ageni na evîtûkîri gûkû nthî.

¹⁴ Arîa maragia maûndû ta mau nîmonanagia waro atî nîkwa maracaria vûrûri wao.

¹⁵ Meekaraga matagwîciria ûvoro wîgiî vûrûri ûrîa maaumire. Kethîrwa nîmeekaga guo, nîmangîagîre na kamweke ga gûcoka kuo.

¹⁶ Vandû va ûguo, meeriragîria vûrûri mwaro, vûrûri wa îgûrû. Na nîûndû wa ûguo, Ngai ndangîconoka nî o makîmwîta Ngai wao, nîûndû ke nîamathondekerete îtûûra rînene kûu îgûrû.

¹⁷ Nîûndû wa wîtîkio Iburahimu nîwavecanire mûvîcî Isaka atuîke îgongoona vîndî îrîa Ngai aamûgeririe. Iburahimu nîke wavetwe kîîranîro nî Ngai, nwatî ke nîwevarîrîtie kûvecana mwana wake wa mûmwe atuîke îgongoona.

¹⁸ Ngai nîwamwîrîte atîrî, “Na njîra ya Isaka we nî ûkaagîa na njiarwa irîa naakwîrîre.”

¹⁹ Iburahimu nîwetîkîtie atî Ngai nwa avote kûriûkia Isaka. Kwoguo nwa tuge, Iburahimu nîkwa aamûkîîre Isaka rîngî kuuma kûrî gîkuû.

²⁰ v Nîûndû wa wîtîkio Isaka nîwerîre Jakovu na Esaû irathimo irîa igaûka vuvarî.

²¹ Nî wîtîkio watûmire Jakovu atanakua arathima avîcî a Josefu. Ke nîwarûngamire etirîte na mûragi wake na akîgooca Ngai.

²² Nîûndû wa wîtîkio Josefu ageerie gûkua, nîwaririe ûvoro wîgiî ûrîa andû a Isiraeli makaauma Misiri na akîra andû ûrîa mwîrî wake ûgeekwa akua.

²³ Nîûndû wa wîtîkio aciari a Musa nîmaamûthithire vandû va mîeri îthatû arîkia gûciarwa. Nîmoonire atî ke aarî mwana mûthaka, nao matagwîtigîra nîmaaregire kwathîkîra watho wa mûthamaki.

²⁴ Nîûndû wa wîtîkio, rîrîa Musa aatuîkire mûndû mûgima nîwaregire gûcoka gwîtagwa mûvîcî wa mwarî wa Mûthamaki.

²⁵ Aatuire nî kava gwîkwa maûndû macûku marî vamwe na andû a Ngai gûkîra gûkenera mevia kavinda kanini.

²⁶ Ke nîwamenyire atî kûmenererua nîûndû wa Mesaya kwarî na vata mûno gûkîra mîthithû yonthe ya Misiri nîûndû eekaraga akîriragîria kîveo kîrîa gîkaavecanwa.

²⁷ Wîtîkio nîguo watûmire Musa auma Misiri atagwîtigîra marakara ma mûthamaki. Nîwaregire gûcoka na akîthiî na mbere takwa onete Ngai ûrîa ûtonekaga.

²⁸ Wîtîkio nîguo watûmire Musa athondeka kîrugo Kîam pasaka na akîathana nthakame îminjaminjîrue mîrango, nîguo mûraika ûrîa ûretaga gîkuû ndakaûrage marikithathi ma Isiraeli.

²⁹ Wîtîkio nîguo watûmire andû a Isiraeli maringa îria îtune takwa maathiîrîrîte nthî nyûmû. Rîrîa andû a Misiri maageririe kûringa, onthe nîmaaûrîre manjîrî.

³⁰ Wîtîkio nîguo watûmire nthingo cia Jeriko ciomomoke ciarîkia kûthiûrûrûkwa mîthenya mûgwanja nî andû a Isiraeli.

³¹ Wîtîkio nîguo wagiririe Rahavu mûndûmûka ûrîa warî mûmaraa aûragwe vamwe na andû arîa maaregire kwathîkîra Ngai, nîûndû nîwanyitire athigani a Isiraeli ûgeni.

³² Nie nîmbuga atîa wîngî? Gûtirî na mavinda meganu ma kûgweta ûvoro wa Gideoni, Baraki, Samusoni, Jefitha, Daudi, Samueli na arathi.

³³ Na njîra ya wîtîkio nîmaarûire na mavûrûri monthe na makîmavoota. Nîmeekire ûrîa kwagîrîrîte na Ngai nîwamavere kîrîa aamerîrîte. Nîwavingire tûnyua twa mînyambû,

³⁴ nîwavoririe mîaki yarî mînene na makîvonoka kûragwa na rûviû. Matiarî na vinya, nwatî nîmagîre na vinya. Nîmaarûire na ûcamba mbaararî na makîvoota athigari a mavûrûri mageni.

³⁵ Nîûndû wa wîtîkio aka nîmaamûkîre andû ao arîa maakuîte magîcoka kûriûkua. Engî nao nîmaaûragirwe na njîra ya kûnyarirwa nîûndû nîmaaregire marekererue. Nwatî meekire ûguo nîguo makariûkua magîe na ûtûûro mwaro.

³⁶ Amwe nîmaanyûrûragua na makarivwa na ivoko, na engî nîmoovirwe na mînyororo na makîvirwa njeera.

³⁷ Nîmaarivirwe na mathiga, nîmaatûrirwe icunjî igîrî na mîcumano na makîûragwa na rûviû. Nîmaaûrûraga mekîrîte njûo cia ng'ondu na cia mbûri. Maarî athîni, nîmaanyaririrwe na magîkwa maûndû macûku.

³⁸ Andû acio mationaga vata wa gûtûûra nthî. Maaûrûraga ta ageni werûrî na irîmarî na matûûraga makurungurî na marimarî menjîtwe nthî.

³⁹ Nîûndû wa wîtîkio wao andû acio onthe nîmaagîre na ngumo mbaro. Nwatî matianyita kîrîa Ngai aamerîrîte,

⁴⁰ nîûndû Ngai nîwathondekete mûvango wetû warî mwaro makîria. Wendi wa Ngai nî atî andû acio magaatuwa agîrîru tûrî vamwe nao.